ទារកខ្លះទើបកើតភ្លាមឃើញមានសាច់មានឈាមទ្រលុកទ្រលន់ និង ២-៣ ថ្ងៃក្រោយក៏ប្រែជាស្រកសាច់វិញ។ តើនោះអាចមកពីប៉ុន្មានថ្ងៃដំបូងដែលម៉ាក់ៗសម្រាលកូនរួចមិនទាន់មានទឹកដោះបរិបូរណ៍ឬ? ហើយត្រូវធ្វើម៉េច?

យោងតាមអត្ថបទផ្សាយរបស់មន្ទីពេទ្យ កាល់ម៉ែត បានឲ្យដឹងថា សម្រាលកូនរួចភ្លាម ម៉ាក់ៗមិនទាន់មានទឹកដោះច្រើន មិនមែនជារឿងគួរឲ្យបារម្ភនោះ ទោះមិនចេញទឹកដោះក៏ដោយត្រូវឲ្យបឺតជញ្ជក់ដោះឲ្យបានញឹកញាប់ នោះទើបអាចជំរុញឲ្យក្រពេញដោះឆាប់បញ្ចេញទឹកដោះ។ ចំណែកទារកដែលមិនទាន់ចេះបៅ ក៏ប៉ាម៉ាក់ត្រូវតែព្យាយាមដាក់ទារកលើទ្រូងស្បែកប៉ះស្បែក រួចសាកល្បងបង្រៀនឲ្យជញ្ជក់ម្តងទៀត ដោយមិនត្រូវកំណត់ម៉ោងបំបៅទេ។ ការដាក់កូនបៅត្រូវធ្វើឡើងនៅពេលកូនភ្ញាក់ពីដំណេកត្រឹមត្រូវ ដោយបើកភ្នែក ខ្លួនមានចលនា ដៃជើងកម្រើក។

តាមអត្ថបទបានបញ្ជាក់ទៀតថា ម៉ាក់ប៉ាគួរតែដាក់ឲ្យកូនបៅក្នុងមួយម៉ោងដំបូងនៃកំណើតកូន ទោះមិនចេញ ឬចេញតិចតួចក៏ដោយ ព្រោះទារកមួយចំនួនធំអាចបឺតជញ្ជក់ដោះម្ដាយបានដោយខ្លួនឯង ម្យ៉ាងវិញទៀតចាប់ពីថ្ងៃដំបូងនៃថ្ងៃសម្រាលកូន អ័រម៉ូនមួយចំនួនជួយជំរុញឲ្យបញ្ចេញទឹកដោះដំបូង (Colostrum)។ Colostrum មានពណ៌លឿង ថ្លា ផ្ទុកទៅដោយវីតាមីនជាច្រើន និងជាតិរ៉ែព្រមទាំង អង់ទីករ (Anticorps) ការពារទារកពីការឆ្លងរោគ។

បំបៅដោះកូន

ចំណែកករណីកូនកើតបាន ២-៣ ថ្ងៃក្រោយ ហើយសង្កេតឃើញស្បែកចាប់ផ្ដើមជ្រួញ សូមកុំបារម្ភចំពោះការថមថយទម្ងន់កូនអី ដោយសារទារកត្រូវសម្របខ្លួននឹងបរិយាកាសខាងក្រៅ ទារកត្រូវការពេលដើម្បីរៀនបឺតជញ្ជក់ក្បាលដោះ ដែលខុសពីនៅក្នុងផ្ទៃម្តាយ។

យើងគួរទុកពេលឲ្យកូនសម្របខ្លួននឹងពិភពលោកដែលគេទើបនឹងបានស្គាល់ នោះទម្ងន់គាត់នឹងឡើងមកវិញនៅថ្ងៃទី ៤ ឬទី ៥។

ខាងក្រោមនេះជាទំហំក្រពះកូន និងបរិមាណទឹកដោះដែលអាចបញ្ជាក់បានថា ទឹកដោះម៉ាក់ៗគ្រប់គ្រាន់សម្រាប់ទារក ២-៣ ថ្ងៃដំបូង។

– ថ្ងៃទី ១ ក្រោយកើត ក្រពះកូនមានទំហំប្រហែលជា ៥-៧ ម.ល ឯម៉ាក់ៗវិញអាចបង្កើតទឹកដោះដំបូងបានប្រហែលពី ១០-១០០ ម.ល

– ថ្ងៃទី ២ ក្រពះកូនមានទំហំប្រហែលជា ១០-១៣ ម.ល ឯទឹកដោះដំបូងបានប្រហែល ១០-១០០ ម.ល

– ថ្ងៃទី ៣ ក្រពះកូនមានទំហំប្រហែល ២២-២៧ ម.ល ឯទឹកដោះមានប្រហែល ២០០ ម.ល

– ថ្ងៃទី ៤ ក្រពះកូនមានទំហំប្រហែល ៣៦-៤៦ ម.ល ឯទឹកដោះមានប្រហែល ៤០០ ម.ល

– ថ្ងៃទី ៥ ក្រពះកូនមានទំហំប្រហែល ៤៧-៥៧ ម.ល ឯទឹកដោះម៉ាក់ផលិតបានប្រហែល ៦០០ ម.ល។

អត្ថបទពាក់ព័ន្ធ៖ ហេតុផលសំខាន់បែបនេះ ទើបម៉ាក់ៗចាំបាច់បំបៅដោះកូនឲ្យបាន៦ខែ

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

សម្រាលកូនរួច ម៉ាក់ៗមិនចេញទឹកដោះ ធ្វើម៉េច?