ទឹកដោះគោ មានចាប់ពីប្រភេទស្រស់ រហូតដល់ប្រភេទម្សៅ។ អ៊ីចឹង តើសារធាតុចិញ្ចឹមក្នុងទឹកដោះគោស្រស់ និងទឹកដោះគោម្សៅយកឆុងផឹក ខុសគ្នាដែរទេ? “Hello គ្រូពេទ្យ” នឹងបកស្រាយប្រាប់!
១- សារធាតុចិញ្ចឹមក្នុងម្សៅទឹកដោះគោ និងទឹកដោះគោស្រស់
ទាំងទឹកដោះគោស្រស់ និងម្សៅទឹកដោះគោ សុទ្ធតែមានផ្ទុកនូវសារធាតុចិញ្ចឹមចាំបាច់សម្រាប់តម្រូវការក្នុងរាងកាយ ឯសារធាតុចិញ្ចឹមក្នុងទឹកដោះគោទាំងពីរប្រភេទនេះ គឺស្ទើរតែដូចគ្នា។ ទឹកដោះគោស្រស់ និងទឹកដោះគោម្សៅមួយពែង អាចផ្តល់ថាមពលឲ្យយើងប្រហែល ៨០ កាឡូរី ប្រូតេអ៊ីនសរុប ៨ ក្រាម និងជាតិកាល់ស្យូមសរុបដល់ទៅ ៣០% នៃតម្រូវការប្រចាំថ្ងៃរបស់រាងកាយ។
២- អត្ថប្រយោជន៍ពីទឹកដោះគោស្រស់
បើនិយាយពីក្រុមវីតាមីន B ក្នុងទឹកដោះគោស្រស់ មានបរិមាណច្រើនជាងតិចតួច បើធៀបនឹងម្សៅទឹកដោះគោ។ ទឹកដោះគោស្រស់មួយពែង មានវីតាមីន B12 ១,២ មីក្រូក្រាម និងវីតាមីន B5 ០,៩ មិល្លីក្រាម។ ឯក្នុងម្សៅទឹកដោះគោ មានផ្ទុកវីតាមីន B12 ០,៩ មីក្រូក្រាម និងវីតាមីន B5 ០,៨ មិល្លីក្រាម។ វីតាមីន B5 អាចជួយរក្សាភ្នាសកោសិកាឲ្យមានសុខភាពល្អ ស្របពេលវីតាមីន B12 មាននាទីសំខាន់ដឹកជញ្ជូនអុកស៊ីហ្សែនក្នុងគ្រាប់ឈាមឲ្យបានគ្រប់គ្រាន់។
គុណសម្បត្តិជាតិផូស្វ័រ និងសេឡេញ៉ូមក្នុងទឹកដោះគោស្រស់ ក៏មានប្រយោជន៍ជាងម្សៅទឹកដោះគោដូចគ្នា។ សារធាតុរ៉ែទាំងពីរនេះ ល្អខ្លាំងសម្រាប់ភ្នាសកោសិកា ការរំលាយអាហារ មុខងារអង់ស៊ីម និងមុខងារក្រពេញទីរ៉ូអ៊ីត។ ក្នុងទឹកដោះគោស្រស់ មានជាតិសេឡេញ៉ូមប្រហែល ៧,៦មីក្រូក្រាម និងសារធាតុផូស្វ័រ ៤៧ មិល្លីក្រាម។ ឯក្នុងម្សៅទឹកដោះគោវិញ មានផ្ទុកសារធាតុ សេឡេញ៉ូមត្រឹម ៦,៣មីក្រូក្រាម និងផូស្វ័រ ២៧ មិល្លីក្រាមប៉ុណ្ណោះ។
៣- អត្ថប្រយោជន៍នៃម្សៅទឹកដោះគោ
ទឹកដោះគោស្រស់ មិនអាចរក្សាទុកបានយូរទេ ស្របពេលទឹកដោះគោម្សៅ អាចរក្សាបានយូរជាង។ ម្សៅទឹកដោះគោ មិនចាំបាច់ត្រូវរក្សាទុកនៅក្នុងទូទឹកកកទេ និងអាចរក្សាគុណប្រយោជន៍សារធាតុចិញ្ចឹមរបស់វាបានយូរទៀតផង។ ម្សៅទឹកដោះគោ ក៏មិនថ្លៃដូចទឹកដោះគោស្រស់ដែរ។
៤- មួយណាសមស្របសម្រាប់ខ្លួនយើងផ្ទាល់
ទឹកដោះគោទាំងពីរប្រភេទ ផ្តល់នូវតម្លៃសារធាតុចិញ្ចឹមស្ទើរតែដូចគ្នា។ បើយើងមិនសូវចូលចិត្តផលិតផលចម្រាញ់ស្រាប់នោះ ទឹកដោះគោស្រស់ គឺជាជម្រើសដ៏ត្រឹមត្រូវ ហើយម្យ៉ាង ទឹកដោះស្រស់គ្មានដាក់សារធាតុរក្សាគុណភាពអាហារ និងសារធាតុសម្លាប់មេរោគ។
តែបើសិនជាយើងជាគិតពីតម្លៃ និងពេលវេលាវិញនោះ គួរជ្រើសយកម្សៅទឹកដោះគោប្រសើរជាង ព្រោះបើយើងចង់ធ្វើភេសជ្ជៈប្រូតេអ៊ីនផឹកដោយខ្លួនឯង ដូចជា ទឹកក្រឡុកជាដើមនោះ ប្រើម្សៅទឹកដោះគោ ល្អជាងទឹកដោះគោស្រស់។
[embed-health-tool-vaccination-tool]
