បច្ចុប្បន្ន ទាំងទារក និងក្មេងតូចៗ ពុំសូវម៉ឹមទឹកដោះម្តាយបានគ្រប់គ្រាន់ទេ ដោយសារម៉ាក់ៗ រវល់នឹងការងារ និងការរកស៊ី ម្យ៉ាងទៀតមានម្សៅទឹកដោះគោ ដែលអាចឆុងឲ្យកូនតូច បៅជំនួសបាន។
ប៉ុន្ដែតាមគោលការណ៍ណែនាំរបស់សមាគមជាច្រើន នៅអាមេរិក ផ្នែកកុមារ និងអាហារូបត្ថម្ភ លើកឡើងថា ក្មេងៗអាយុក្រោម ៥ឆ្នាំ គួរចៀសវាងផឹកទឹកដោះគោផលិតពីធញ្ញជាតិ (Plant-based Milk)។ ទឹកដោះគោផលិតពីធញ្ញជាតិ រួមមានប្រភេទទឹកដោះគោផលិតចេញពីស្រូវ ស្រូវសាឡី ដូង រួមជាមួយសារធាតុលាយមួយចំនួនទៀត។ ប៉ុន្ដែលើកលែងទឹកដោះគោផលិតពីសណ្ដែកសៀង។
សមាគមគាំពារផ្នែកសុខភាពខាងលើ បញ្ជាក់ថា ទឹកដោះគោផលិតពីធញ្ញជាតិ ពុំមានសារធាតុបំប៉នសំខាន់ៗ និងគ្រប់គ្រន់ ដូចជាវីតាមីន D និងកាល់ស្យូម សម្រាប់ការវិវត្តដំបូងរបស់ក្មេងតូចៗទេ។ ជាមួយគ្នានេះ អ្នកជំនាញ ក៏ណែនាំកុំឲ្យក្មេងផឹកភេសជ្ជផ្អែម ទឹកដោះគោមានក្លិន ឬប្រភេទភេសជ្ជៈអត់ស្ករជាដើម។
ការប្រកាសគោលការណ៍ណែនាំនេះ ដោយសាររយៈពេល ៥-១០ឆ្នាំចុងក្រោយនេះ មានការប្រើប្រាស់ទឹកដោះគោផលិតពីធញ្ញជាតិយ៉ាងច្រើន។ ប៉ាម៉ាក់ៗកាន់តែច្រើន បានប្រើប្រាស់ទឹកដោះគោប្រភេទនេះ ដោយផ្អែកលើមូលហេតុចម្រុះជាច្រើន ក៏ដូចជាការយល់ខុសថា ប្រភេទទឹកដោះគោផលិតពីធញ្ញជាតិ ល្អដូចទឹកដោះម្ដាយ ឬទឹកដោះគោចម្រាញ់ចេញពីសត្វគោផងដែរ។
អត្ថបទពាក់ព័ន្ធ៖
- មុនជ្រើសរើសម្សៅទឹកដោះគោឲ្យកូនបៅ ម៉ាក់ៗត្រូវគិតពីបញ្ហាទាំងនេះ
- ពេទ្យថា ទម្លាប់ឲ្យកូនបៀមដបទឹកដោះគោ គ្រោះថ្នាក់ខ្លាំងណាស់
ទោះយ៉ាងណា គោលការណ៍ណែនាំនេះ ក៏លើកលែងដែរ ប្រសិនបើក្មេងតូចៗ មានបញ្ហាអាលែកហ្ស៊ីទឹកដោះគោ ឬជាតិឡាក់តូស ឬត្រូវគោរពតាមសាសនាជាដើម។ ក្នុងករណីនេះ ប៉ាម៉ាក់ ត្រូវទៅពិគ្រោះជាមួយអ្នកជំនាញផ្នែកកុមារ ឬរបបអាហារ។
[embed-health-tool-vaccination-tool]
