អាលែកហ្ស៊ី ជាបញ្ហាមួយបង្កផលពិបាកច្រើនគួរសមសម្រាប់យើង បើមិនប្រយ័ត្ន វាអាចប៉ះពាល់ធ្ងន់ធ្ងរដល់សុខភាព។ បញ្ហាអាលែកហ្ស៊ីមួយនេះ អាចកើតឡើងចំពោះយើងគ្រប់វ័យ ជាពិសេសទៅលើក្មេងៗ និងអ្នកដែលមានជំងឺហឺត។ ស្របគ្នានេះ ខាងក្រុមគ្រូពេទ្យសង្កេតឃើញថា ក្មេងៗរស់នៅក្នុងទីក្រុង ងាយប្រឈមនឹងកើតអាលែកហ្ស៊ីជាងក្មេងៗរស់នៅតាមជនបទ។
ទាក់ទងនឹងបញ្ហានេះ លោកវេជ្ជបណ្ឌិត សូរ ប៉េង នៃគ្លីនិកកុមារ មុនីឃីត បានឲ្យដឹងថា ឥឡូវនេះ ពីមួយថ្ងៃទៅមួយថ្ងៃ ជំងឺអាលែកហ្ស៊ីនៅលើកូនក្មេងមានការកើនឡើងបន្តិចម្ដងៗ។ កត្តាដែលធ្វើឲ្យកូនតូចៗងាយកើតជំងឺអាលែកហ្ស៊ីនោះគឺ៖
ទី១.កត្តាហ្សែន៖ អាចកើតមកតាមម៉ាក់ប៉ា តែមិនមែនមានន័យថា បើម៉ាក់ប៉ាកើតអាលែកហ្ស៊ីសុទ្ធតែអាចចម្លងទៅកូនទាំងអស់ទេ។
ទី២.កត្តាបរិយាកាស៖ ក្មេងៗដែលរស់នៅស្អាតពេក ក៏ងាយកើតអាលែកហ្ស៊ីដែរ។ ជួនកាល ក្មេងៗដែលនៅតែក្នុងបន្ទប់ ឬមិនសូវប្រឈមនឹងបរិយាកាសខាងក្រៅ ក៏ប្រឈមកើតជំងឺអាលែកហ្ស៊ីដូចគ្នា។
លើសពីនេះ បញ្ហាអាលែកហ្ស៊ីអាចកើតឡើងបានដោយកត្តាច្រើនទៀតដូចជា ធូលី រោមសត្វ អាហារ សត្វទិច ឬប្រភេទថ្នាំមួយចំនួន។ល។
លោកថា ចំពោះការដែលថា ក្មេងៗទីក្រុងងាយកើតអាលែកហ្ស៊ីនោះដោយសារ អាអូនរស់នៅទីក្រុងមិនសូវប្រឈមនឹងបរិយាកាសខាងក្រៅ ត្រូវថ្ងៃ ត្រូវខ្យល់ច្រើនដូចក្មេងៗនៅតាមស្រែចំការទេ។ ជាទូទៅ ក្រៅពីចេញ/ចូល សាលរៀន និងផ្ទះ ក្មេងៗទីក្រុងនៅតែក្នុងផ្ទះ ជាហេតុធ្វើឲ្យអាអូនមិនស៊ាំទៅនឹងបរិយាកាសខាងក្រៅ ទើបងាយប្រតិកម្មជាមួយបរិយាកាសប្លែកខាងក្រៅ។
វេជ្ជបណ្ឌិតជំនាញរោគកុមាររូបនេះ បន្តឲ្យដឹងថា ចំពោះបញ្ហាអាលែកហ្ស៊ីនេះ មានច្រើនប្រភេទណាស់រួមមាន អាលែកហ្ស៊ីប្រព័ន្ធផ្លូវដង្ហើមខាងលើ អាលែកហ្ស៊ីស្បែក អាហារ លម្អងផ្កា ឬឡាក់តិច ជាដើម។ បញ្ហាអាលែកហ្ស៊ីដែលអាអូនតូចកើតច្រើនជាងគេនោះ គឺអាលែកហ្ស៊ីប្រព័ន្ធផ្លូវដង្ហើមខាងលើ និងបញ្ហាអាលែកហ្ស៊ីស្បែក។
ដើម្បីកាត់បន្ថយបញ្ហាអាលែកហ្សីលើអាអូនតូចៗបាន គ្រាន់តែត្រូវចៀសវាងមូលហេតុដែលបង្កឲ្យកូនមានបញ្ហា និងទប់ស្កាត់តាមការណែនាំរបស់គ្រូពេទ្យបានហើយ ប៉ុន្តែបញ្ហាអាលែកហ្ស៊ីនេះ មិនអាចព្យាបាលឲ្យជាដាច់ពេញមួយជីវិតទេ។ ក្នុងករណីដែលកូនមានចេញសញ្ញាអាសន្នប៉ុន្មានខាងក្រោមនេះ គួរនាំកូនទៅជួបគ្រូពេទ្យភ្លាម៖
- ហើមមាត់ ឬអណ្ដាត
- ពិបាកនិយាយ ឬលេបអាហារ
- ពិបាកដកដង្ហើម
- ចុកពោះ
- ក្អួត ចង្អោរ
- រាករូស
- វិលមុខ ឬសន្លប់។ល។
[embed-health-tool-vaccination-tool]
