អាការៈក្អួតចង្អោរ ជាសញ្ញាមួយនៃសុខភាពកូនដែលធ្វើឲ្យម៉ាក់ប៉ាបារម្ភ ពិសេសបើអាអូនក្អួតនៅពេលយប់។ កូនក្អួតពេលយប់អាចបាត់ទៅវិញដោយខ្លួនឯង ប៉ុន្តែពេលខ្លះ វាអាចបញ្ជាក់ពីបញ្ហាធ្ងន់ធ្ងរដទៃទៀតក៏ថាបាន។ ហេតុអ្វីបានអាអូនក្អួតពេលយប់? គួរយកទៅពេទ្យ ឬដោះស្រាយតាមវិធីណា?

មូលហេតុបណ្ដាលឲ្យកូនក្អួតពេលយប់

ដើម្បីរកដំណោះស្រាយត្រឹមត្រូវមួយទប់ទល់នឹងកូនក្អួតពេលយប់ ម៉ាក់ប៉ាត្រូវដឹងពីមូលហេតុដែលបង្កឲ្យមានអាការៈក្អួតជាមុនសិនដូចជា៖

១. ពុលចំណីអាហារ

ពេលខ្លះ កូនក្អួតអាចជាសញ្ញាថា រាងកាយអាអូនបដិសេធនឹងអាហារណាមួយដែលកូនបានញ៉ាំនៅពេលថ្ងៃ។ ទាំងអាហារឆៅ ឬឆ្អិនសុទ្ធតែអាចបណ្ដាលឲ្យអាអូនពុល ប្រសិនបើវាជាអាហារទុកចោលយូរ ចម្អិនមិនបានឆ្អិនល្អ ឬគ្មានអនាម័យជាដើម។

២. បញ្ហាក្រពះពោះវៀន

ជំងឺនៅក្រពះពោះវៀនឧស្សាហ៍កើតនៅលើកុមារណាស់ ហើយភាគច្រើនធ្វើទុក្ខនៅពេលយប់។ រោគសញ្ញាចម្បងនៃជំងឺនេះគឺក្អួត បូករួមនឹងសញ្ញាដទៃទៀត មាន ចុកពោះ ក្ដៅខ្លួនស្ទីញៗ រាករូស និងឈឺក្បាល។

៣. ក្អកខ្លាំង

បើសិនអាអូនក្អកខ្លាំងពេលយប់ វាអាចរំញោចដល់រ៉េផ្លិចបំពង់ករបស់កូនបណ្ដាលឲ្យក្អួតចេញមក។ ក្នុងករណីដែលអាអូនដកដង្ហើមតាមមាត់ពេលគេង មាត់ និងបំពង់ករបស់អាអូននឹងស្ងួត ធ្វើឲ្យរមាស់កនាំឲ្យកូនក្អក ជាហេតុបណ្ដាលឲ្យអាអូនក្អួតពេលយប់។

៤. ជំងឺហឺត

ប្រសិនអាអូនមានជំងឺហឺត នោះកូននឹងក្អក ពិបាកដង្ហើមពេលគេង។ នេះដោយសារផ្លូវដង្ហើមអាអូនកាន់តែឆាប់រងផលរំខាននៅពេលយប់ អាអូនកំពុងគេងលក់ ហើយរោគសញ្ញាមានដូចជាក្អក ថប់បារម្ភ ពិបាកគេង អាចធ្វើឲ្យអាអូនក្អួតពេលយប់បាន។

វិធីដោះស្រាយកូនក្អួតពេលយប់

ជាធម្មតា អាការៈកូនក្អួតពេលយប់កើតឡើងតែ ១-២ដង/យប់ ដែលអាចបាត់ទៅវិញដោយខ្លួនឯង ពេលអាអូនគេងលក់វិញ។ ប៉ុន្តែ យើងអាចជួយដោះស្រាយបញ្ហានេះបានដោយ ឲ្យកូនញ៉ាំទឹក ព្រោះក្អួតធ្វើឲ្យរាងកាយកូនខ្សោះជាតិទឹក ផ្ដល់អាហារស្រាលចំពោះក្រពះឲ្យកូនញ៉ាំដូចជា បបរ ដើម្បីកុំឲ្យកូនឃ្លាន ឬឲ្យអាអូនសម្រាកឲ្យបានច្រើនជាដើម។ ម៉ាក់ប៉ាត្រូវចាំថា ក្រៅពីទឹកធម្មតា មិនគួរផ្ដល់ភេសជ្ជៈផ្អែមៗដល់កូន ក្រោយពេលក្អួតរួចទេ។

ពេលណាគួរទៅជួបពេទ្យ?

បញ្ហាក្អួត ជាទូទៅធ្វើឲ្យរាងកាយបាត់បង់ជាតិទឹក វាកាន់តែជាបញ្ហាធំប្រសិនបើអាអូនក្អួតផង រាកផង រួមផ្សំនឹងរោគសញ្ញាដទៃខាងក្រោមនេះទៀត ម៉ាក់ប៉ាគួរតែនាំកូនទៅពិនិត្យជាមួយគ្រូពេទ្យដូចជា៖

ក្ដៅខ្លួនខ្លាំង
ក្អកមិនឈប់
មិនសូវសកម្ម សន្លឹមៗ
ចុកពោះ ឬឈឺក្បាលខ្លាំង
ពិបាកដកដង្ហើម
ឡើងកន្ទួលក្រហមលើស្បែក។

ឃើញកូនក្អួតពេលយប់ អាចបណ្ដាលមកពីមូលហេតុប៉ុន្មាននេះ

មូល​ហេតុ​បណ្ដាល​ឲ្យ​កូន​ក្អួត​ពេល​យប់

១. ពុល​ចំណី​អាហារ

២. បញ្ហាក្រពះពោះវៀន

៣. ក្អក​ខ្លាំង

៤. ជំងឺ​ហឺត

វិធី​ដោះស្រាយ​​កូន​ក្អួត​ពេល​យប់

ពេល​ណា​គួរ​ទៅ​ជួប​ពេទ្យ?