នាមជាម៉ាក់ប៉ាគ្មានអ្វីសប្បាយស្មើនឹងឃើញកូនៗមានសុខភាពល្អ ថែមទាំងឆ្លាតវាងវៃនោះទេ តែការចិញ្ចឹមបីបាច់កូនឲ្យបានល្អ ដូចគិត ដូចចង់បានបែបនេះ មិនមែនជារឿងងាយឡើយ។ តើកូនៗយើងអាចឆ្លាតទៅបានអាស្រ័យលើកត្តារួមផ្សំអីខ្លះ? ហើយធ្វើម៉េចទើបដឹងថាកូនយើងឆ្លាត ឬមិនឆ្លាតនោះ?
១. កត្តាជំរុញឲ្យកូនឆ្លាត
មានកត្តារួមផ្សំជាច្រើនដែលធ្វើឲ្យកូនយើងក្លាយក្មេងឆ្លាតបាន ក្នុងនោះរាប់បញ្ចូលទាំងសុខភាពម្តាយ ជាពិសេសអំឡុងពេលបង្កកំណើត មិនមែនពាក់ព័ន្ធការថែទាំ ឬបំប៉នកូនក្រោយពេលកើតតែមួយមុខទេ។ នេះបើតាមការបញ្ជាក់របស់លោកវេជ្ជបណ្ឌិត អ៊ុន យូ ឯកទេសកុមារ បញ្ចប់ការសិក្សាពីបារាំង និងកូរ៉េ។ លោកបានបញ្ជាក់ថា កត្តារួមផ្សំធ្វើឲ្យកូនឆ្លាត ប្រាជ្ញាវាងវៃមាន៖
– ហ្សែន៖ ពិតណាស់ បើម៉ាក់ប៉ាមានហ្សែនល្អ នោះកូនកើតមកក៏លូតលាស់បានល្អតាមហ្នឹងដែរ។ មិនខុសទេ ករណីកូនដែលកើតពីហ្សែនខ្សោយ ធ្វើឲ្យការលូតលាស់ផ្នែករាងកាយ ស្មារតី និងខួរក្បាលក៏យឺតទៅតាមនោះដែរ។
– ចំណីអាហារ៖ របបអាហាររបស់កូនដើរតួនាទីសំខាន់ណាស់ក្នុងជំរុញការលូតលាស់ទាំងផ្នែករាងកាយ និងស្មារតីរបស់ពួកគេ បែបនោះហើយម៉ាក់ប៉ាត្រូវតែបំប៉នអាហារកូនឲ្យគ្រប់គ្រាន់ ចម្រុះមុខ និងឲ្យកូនញ៉ាំអាហារណាដែលមានផលប្រយោជន៍ចំពោះសុខភាព ជាពិសេស អាហារសម្បូរ DHA ដែលមានក្នុងទឹកដោះគោ។ ចំពោះកូនដែលកើតមកខ្វះការលូតលាស់អ័រម៉ូន ឬខ្វះអាហារូបត្ថម្ភ ពិសេសពពួកជីវជាតិដែលជួយដល់ប្រព័ន្ធការពាររាងកាយ និងខួរក្បាលទៀតនោះ សុខភាពកូនងាកឈឺៗ ខ្សោយបញ្ញាស្មារតី ការលូតលាស់មិនប្រក្រតី ឬកម្ពស់ទាប ជាដើម។
– សកម្មភាពរាងកាយ និងខួរក្បាល៖ ការធ្វើសកម្មភាពរាងកាយ និងខួរក្បាលរបស់ក្មេង ក៏ជាចំណែកដ៏សំខាន់ជួយដល់ការវិវត្តខួរក្បាលកូនដែរ។ ការហ្វឹកហាត់សកម្មភាពរាងកាយរបស់ក្មេង មានដូចជា ការហាត់ប្រាណ លេងកីឡា ឬធ្វើសកម្មភាពផ្សេងៗទៀត ចៀសវាងឲ្យកូនរស់នៅក្នុងបរិយាកាសអាប់អួ ឬស្មោកគ្រោក មិនស្អាត។ ចំណែកសកម្មភាពខួរក្បាលវិញ យើងត្រូវនិយាយលេង ឬសួរនាំកូនឲ្យច្រើន និងត្រូវជំរុញឲ្យកូនប្រើខួរក្បាលទាំងខាងឆ្វេង និងខាងស្តាំ។
២. មើលម៉េចទើបដឹងថាកូនឆ្លាត?
យើងអាចសម្គាល់ថា កូនយើងជាក្មេងឆ្លាត ឬមិនឆ្លាតបាន ដោយសង្កេតមើលរបៀបនៃការនិយាយស្តីរបស់កូន និងការឆ្លើយតបរបស់កូនមកយើងវិញ។ លោក Christopher Lee ស្ថានិកអង្គការ HEDC អន្តរជាតិ ថា ក្មេងឆ្លាត ជាក្មេងដែលពូកែសួរនាំ និយាយច្រើន ប្រៀបបាននឹងទស្សនវិទូ។ លោកបានលើកឡើងថា ឪពុកម្តាយភាគច្រើននិយាយច្រើនជ្រុល មិនទុកឱកាសឲ្យកូននិយាយច្រើនទេ នេះជាកំហុសឆ្គងធំមួយ។
“បើនិយាយយើងជាឪពុកម្តាយនិយាយច្រើន កូនយើងនឹងឈប់និយាយ ផ្ទុយទៅវិញ បើយើងព្យាយាមស្តាប់កូនៗនិយាយ ដូចជាពេលគេត្រលប់មកពីសាលាវិញ យើងសួរនាំកូននូវសំណួរណាមួយ ឲ្យគេស្តាប់ រួចឆ្លើយ នោះគេនឹងក្លាយទៅជាក្មេងនិយាយច្រើន ហើយឆ្លាតវាងវៃ”។
លោកChristopher Lee បានបន្តថា តួនាទីរបស់ម៉ាក់ប៉ាត្រូវស្តាប់កូនឲ្យច្រើន ហើយបំផុសនូវសេចក្តីក្លាហាន ដោយឲ្យគេនិយាយឲ្យបានច្រើន ដោយសួរនូវសំណួរវិញ។ ទោះបីជាពេលខ្លះចម្លើយយើងដឹងហើយក៏ដោយ ក៏យើងនៅតែសួរកូននូវសំណួរដដែលនេះ ដើម្បីឲ្យខួរក្បាលកូនវិវត្តទៅមុខជានិច្ច។
ចង់បានចំណេះដឹង វិធីសាស្ត្រ និងគន្លឹះផ្សេងៗអំពីអាហារូបត្ថម្ភ ការចិញ្ចឹមបីបាច់កូនឲ្យលូតលាស់ល្អ ចាប់ពីពេលពពោះ រហូតដល់កូនអាយុ ៥ឆ្នាំ។ កុំភ្លេចចុះឈ្មោះជាមួយកូនឆ្លាតក្លឹប!
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
