កុមារអាយុចាប់ពី ៦ ខែ ឡើងទៅ តាមគោលការណ៍របស់ក្រសួងសុខាភិបាល ណែនាំឲ្យញ៉ាំបបរខាប់គ្រប់គ្រឿង បន្ថែមពីការបំបៅដោះកូន ឬទឹកដោះគោ។ បបរខាប់គ្រប់គ្រឿងត្រូវតែផ្សំជាមួយអាហារ ៣ ក្រុម ក្នុងនោះមានអាហារថាមពល អាហារស្ថាបនា និងអាហារការពាររាងកាយ។
ការជ្រើសរើសបន្លែត្រីសាច់ និងរបៀបចម្អិនបបរខាប់គ្រប់គ្រឿង ឲ្យកូនញ៉ាំទៅមានសុខភាពល្អ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ម៉ាក់ៗដែលទើបតែមានកូនដំបូង ប្រហែលជាមិនដឹងថា បបរខាប់គ្រប់គ្រឿងសម្រាប់បញ្ចុកកូនមានរូបមន្តផ្សំអីខ្លះនោះទេ ឯរបៀបចម្អិនក៏ស្រពិចស្រពិលដែរមែនទេ? មិនបាច់បារម្ភទេ ខាងក្រោមនេះជារបៀបនៃការជ្រើសរើសបន្លែត្រីសាច់ និងរបៀបចម្អិនបបរខាប់គ្រប់គ្រឿង ចងក្រងដោយកម្មវិធីជាតិអាហារូបត្ថម្ភ នៃក្រសួងសុខាភិបាល។
រាល់ពេលចម្អិនបបរខាប់គ្រប់គ្រឿង យើងអាចប្រើ៖
– សាច់តែមួយមុខ ដូចជា សាច់ត្រី ឬត្រីល្អិត សាច់ជ្រូក សាច់គោ ស៊ុត ឬសាច់មាន់។
– បន្លែពណ៌បៃតងចាស់ ដូចជា ផ្ទី ត្រកួន ស្លឹកបាស់ ឬស្ពៃ។
– បន្លែពណ៌លឿងទុំ ដូចជា ផ្លែល្ពៅ ដំឡូងជ្វាពណ៌លឿង ឬការ៉ុត។
បន្ទាប់ពីដាំបបរឲ្យរីកអង្ករល្អ ដាក់ត្រីសាច់ និងបន្លែចូលគ្នាឆ្អិនល្អហើយ យើងត្រូវដាក់ប្រេងឆា ឬខ្លាញ់បន្តិចក្នុងបបរ។ ម៉ាក់ប៉ាត្រូវចាំថា បបរខាប់គ្រប់គ្រឿងសម្រាប់ទារកតូចមិនត្រូវដាក់អំបិល ទឹកត្រី ទឹកស៊ីអ៊ីវ ប៊ីចេង ម្សៅស៊ុប ឬដុំស៊ុបខ្នរចូលឡើយ។ ម្យ៉ាងវិញទៀតម៉ាក់ប៉ាត្រូវលាងសម្អាតដៃឲ្យបានស្អាត មុនពេលចម្អិនអាហារ និងរៀបចំអាហារឲ្យកូន។ ចំណែកឯកូនវិញ យើងត្រូវលាងសម្អាតដៃកូនជាមួយសាប៊ូ និងទឹកស្អាតមុនពេលបញ្ចុកបបរ។
ទារក និងកុមារត្រូវតែមានចាន ស្លាបព្រា ម្នាក់ៗដាច់តែឯង ម៉ាក់ប៉ាមិនគួរដួសបបរ១ចានមកបញ្ចុកកូនតូចៗរួមគ្នានោះទេ ហើយត្រូវដួសបបរដាក់ក្នុងចានកូនឲ្យសមល្មមកម្រិតកូនញ៉ាំ។ ចំណែកឯពេលបញ្ចុកបបរកូនវិញ យើងត្រូវដាក់កូននៅលើភ្លៅ និងត្រូវសម្លឹងចំភ្នែកកូន លួងលោមកូន បន្ទាប់មកចំណាយពេលបញ្ចុកកូនឲ្យគ្រាប់គ្រាន់រហូតកូនញ៉ាំបបរអស់ពីចាន។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម