ប៉ាម៉ាក់ត្រូវដឹង អាហារទាំងនេះគ្មានសុវត្ថិភាពចំពោះក្មេងតូចៗទេ

បើនិយាយពីរបបអាហារ ធម្មតាយើងគិតដល់អាហារសុខភាព អាហារសម្បូរវីតាមីន ប្រូតេអ៊ីន ដែលចាំបាច់សម្រាប់ការលូតលាស់ និងអភិវឌ្ឍន៍ចំពោះកូនយើងតូចៗ។ ហេតុនេះ ប៉ាម៉ាក់ ត្រូវបែងចែកឲ្យច្បាស់អាហារណាល្អ ណាមិនល្អចំពោះកូនយើង ហើយបើទោះដឹងថា អាហារទាំងនោះល្អក៏ដោយ ក៏ត្រូវប្រយ័ត្នជាមួយក្មេងបន្តិច ព្រោះអាចធ្វើឲ្យកូនស្លាក់។ “Hello គ្រូពេទ្យ’ ប្រាប់ពីប្រភេទអាហារគ្មានសុវត្ថិភាពចំពោះកូនតូចៗឲ្យគ្នាយើងដឹង។

១- អាហារក្មេងតូចត្រូវចៀសវាង

– ទឹកដោះគោមានជាតិខ្លាញ់តិច៖ ក្មេងទើបចេះដើរភាគច្រើន ត្រូវការជាតិខ្លាញ់ និងកាឡូរីពីទឹកដោះគោសុទ្ធ ដើម្បីអភិវឌ្ឍរាងកាយ និងការលូតលាស់។ ពេលកូនយើងដល់អាយុ ២ឆ្នាំ បើសង្កេតឃើញ មិនមានបញ្ហាលូតលាស់មិនប្រក្រតីនោះទេ ប៉ាម៉ាក់អាចចាប់ផ្ដើមឲ្យអូនតូចញ៉ាំទឹកដោះគោមានជាតិខ្លាញ់តិចបាន តែបើកូនលើសទម្ងន់ មានជំងឺបេះដូងទៀតនោះ ពេទ្យអាចណែនាំឲ្យប្រើទឹកដោះគោប្រភេទនេះ តាំងពីមុនគេអាយុ ២ឆ្នាំ មកម្ល៉េះ។

– អាហារទំហំធំៗ ឬច្រើនៗ៖ អាហារមានទំហំធំជាងគ្រាប់សណ្ដែក និងមានចំនួនច្រើន អាចធ្វើឲ្យស្លាក់ជាប់ក្នុងបំពង់កក្មេងបាន។ បន្លែដូចជាការ៉ុត បន្លែស្ពៃ Celery និងសណ្ដែកខៀវ គួរតែកាត់ឲ្យតូច ច្រៀកជាចំណិតតូចៗ ឬចម្អិនសិន មុនឲ្យទៅអូនតូចញ៉ាំ។ កាត់ផ្លែឈើ ដូចជាទំពាំងបាយជូរ ប៉េងប៉ោះ ឲ្យតូចៗ (Cherry tomatoes) និងដុំឪឡឹក ជាបួនចំណែកតូចៗ មុននឹងឲ្យញ៉ាំ ហើយច្រៀក ឬកាត់សាច់ និងដុំឈីស ជាចម្រៀកឲ្យតូចៗមែនទែន។

– អាហាររឹងតូចៗ៖ ស្ករគ្រាប់រឹង គ្រាប់ធញ្ញជាតិ និងពោតលីង ងាយនឹងធ្វើឲ្យក្មេងស្លាក់ខ្លាំងណាស់។ គ្រាប់រុក្ខជាតិ អាចនឹងតូចខ្លាំង មិនអាចស្លាក់បាន ប៉ុន្តែក៏អាចស្ទះជាប់នឹងបំពង់ខ្យល់ក្មេង ហើយបង្កឲ្យករោគបាន។

– អាហារទន់ និងស្អិត៖ ចៀសវាងកុំឲ្យអូនតូចទំពាស្ករកៅស៊ូ និងអាហារទន់ៗ ដូចជា ចាហ៊ួយ ឬស្ករចាហ៊ួយ ព្រោះអាចធ្វើស្អិតក្នុងបំពង់ក។

– ប៊ឺរសណ្ដែកដី៖ សូម្បីតែប៊ឺរសណ្តែកដី ក៏ត្រូវប្រុងប្រយ័ត្នដែរ ពេលឲ្យកូនតូចយើងញ៉ាំប៊ឺរសណ្ដែកធំៗ ឬប្រភេទប៊ឺរធ្វើពីគ្រាប់ធញ្ញជាតិផ្សេងទៀត សុទ្ធតែអាចធ្វើឲ្យក្មេងតូចៗពិបាកលេប។ ផ្ទុយទៅវិញ បើបៀកប៊ឺរប្រភេទនេះលើនំប៉័ង ឬនំស្រួយឲ្យពួកគេញ៉ាំ ជារឿងប្រសើរជាង ហើយគួរលាយវាជាមួយនឹងទឹកប៉ោម មុននឹងបៀកជាមួយនំបុ័ង។

អត្ថបទពាក់ព័ន្ធ៖

ចម្អិនអាហារឲ្យកូន ម៉ាក់ៗត្រូវគិតលើចំណុច ៣ នេះជាសំខាន់
ប្រភេទអាហារធ្វើឲ្យកូនតូចញ៉ាំទៅទល់លាមក និងវិធីដោះស្រាយ

២- ការពារករណីក្មេងស្លាក់ផ្សេងទៀត

ត្រូវចៀសវាងកុំឲ្យកូនញ៉ាំអាហារនៅក្នុងឡាន ព្រោះពិបាកក្នុងការគ្រប់គ្រងណាស់ពេលយើងកំពុងបើកបរ។ បើមានថ្នាំពេទ្យ ត្រូវត្រដុសនឹងធ្មេញ ត្រូវប្រុងប្រយ័ត្នចំពោះកូនតូច ព្រោះថ្នាំនេះអាចធ្វើឲ្យកូនយើងស្ពឹកបំពង់អាហារ ហើយធ្វើឲ្យពិបាកលេប។ ខាងក្រោមនេះ ជាប្រភេទអាហារមិនមានសុវត្ថិភាពចំពោះកូនតូចៗ ដូចជា៖

– ហតដក (លើកលែងតែច្រៀកជាបួន ហើយកាត់ជាចំណិតតូចៗ)

– ស្ករគ្រាប់រឹង

– គ្រាប់ធញ្ញជាតិ

-ប៊ឺរសណ្ដែកដីដុំធំៗ

– ពោតលីង

– ការ៉ុត ស្ពៃ Celery សណ្ដែកខៀវឆៅ

– គ្រាប់រុក្ខជាតិ ដូចជា គ្រាប់ល្ពៅ ឬគ្រាប់ផ្កាឈូករ័ត្ន

– ទំពាំងបាយជូរ ឬប៉េងប៉ោះតូចទាំងមូល

– ដុំអាហារធំៗ ដូចជា ដុំសាច់ ដំឡូង ឬបន្លែផ្លែឈើស្រស់។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ គឹម កាណែល · កែ 19/08/2019