អំឡុងពេលនេះម៉ាក់ប៉ាច្បាស់ជាបារម្ភខ្លាំងពីសុខភាពកូន ខ្លាចអាអូនឆ្លងកូវីដ-១៩ តែការប្រើជែល ឬអាល់កុលលាងដៃលើទារក និងក្មេងក្រោមអាយុ ៥ឆ្នាំ មិនល្អនោះទេ។ ដោយសារកូនក្មេងអាចពុលនឹងជាតិអាល់កុល បើសិនជាច្រឡំដាក់ដៃចូលក្នុងមាត់បន្ទាប់ពីលាងអាល់កុល ឬជែលរួចភ្លាមៗ នេះបើតាមការលើកឡើងរបស់ American Academy of Pediatrics (AAP)។
វិធីនេះល្អបំផុត លាងដៃកូនតូចបានស្អាត មិនបារម្ភអាអូនពុលអាល់កុល
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ជំនួសដោយការប្រើជែល និងអាល់កុលលាងដៃលើទារក និងក្មេងតូចៗ ម៉ាក់ប៉ាអាចងាកមកប្រើសាប៊ូ និងទឹកស្អាតវិញ។ នេះជាតិចនិកល្អបំផុតសម្រាប់សម្អាតដៃកូន ហើយយើងមិនព្រួយថា កូនអាចពុលជាតិអាល់កុលដូចការប្រើជែល ឬអាល់កុលលាងដៃ ពេលអាអូនដាក់ដៃចូលមាត់ទេ។ និយាយដល់ត្រង់តិចនិកលាងដៃកូន មជ្ឈមណ្ឌលត្រួតពិនិត្យ និងបង្ការជំងឺឆ្លង (CDC) អាមេរិក បានណែនាំពីតិចនិកលាងដៃកូនឲ្យបានត្រឹមត្រូវដូចជា៖
១. ដាក់ដៃកូនឲ្យសើម រួចដាក់សាប៊ូលើដៃកូន
២. យកដៃយើងដុសលើដៃកូនឲ្យគ្រប់សព្វ ទាំងបាតដៃ ខ្នងដៃ ចន្លោះម្រាមដៃ និងក្រចកដៃ
៣. ដុសសម្អាតដៃកូនយ៉ាងតិច ២០វិនាទី
៤. លាងសម្អាតដៃកូនឲ្យស្អាតជាមួយទឹកស្អាត
៥. ជូតសម្អាតដៃកូនជាមួយកន្សែង ឬ កំណាត់ស្អាត
វេជ្ជបណ្ឌិត Patricia Garcia ឯកទេសជំងឺកុមារ នៃមជ្ឈមណ្ឌលវេជ្ជសាស្ត្រកុមារ Connecticut នៃសហរដ្ឋអាមេរិក បានឲ្យដឹងថា ក្នុងករណីដែលយើងនៅកន្លែងគ្មានបន្ទប់ប្រើប្រាស់ យើងអាចលាងសម្អាតដៃដោយសាប៊ូ និងទឹកដបបរិសុទ្ធយើងញ៉ាំក៏បានដែរ រួចជូតសម្អាតដោយក្រដាស ឬកន្សែង។ល។
តិចនិកមួយទៀតណែនាំដោយ AAP នោះគឺ ជូតសម្អាតដៃកូនដោយសាប៊ូ ជាមួយកន្សែងសើម សម្អាតចុះឡើងឲ្យគ្រប់ជ្រុងនៃដៃកូនប្រហែល ២០វិនាទី រួចលាងចេញជាមួយទឹកស្អាត។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម