backup og meta

លម្អិតពីមូលហេតុក្មេងស្ទះបំពង់បង្ហូរទឹកភ្នែក និងដំណោះស្រាយ

ត្រួតពិនិត្យដោយ វេជ្ជ. ចាន់ ស៊ីណេត · ម​ន្ទីរពេទ្យបង្អែកមិត្តភាពកម្ពុជា-ចិន សែនសុខ


អត្ថបទ​ដោយ ដេត ធន្នី · កែ Nov 25, 2020

    លម្អិតពីមូលហេតុក្មេងស្ទះបំពង់បង្ហូរទឹកភ្នែក និងដំណោះស្រាយ

    ក្មេង​ស្ទះ​បំពង់​បង្ហូរ​ទឹក​ភ្នែក បណ្តាល​ឲ្យ​ហូរ​ទឹក​ភ្នែក​រហូត ដោយ​ក្មេង​ខ្លះ​ស្ទះ​បំពង់​បង្ហូរ​ទឹក​ភ្នែក​តែ​មួយ​ចំហៀង ឯ​ខ្លះ​ទៀត​ស្ទះ​ទាំង​សង​ខាង។ នេះ​ជា​ការ​លើក​ឡើង​របស់​លោកស្រី​វេជ្ជបណ្ឌិត គុជ ឆោមដាលីន ឯកទេស​រោគ​កុមារ។ ជា​ធម្មតា​នៅ​ផ្នែក​ខាង​លើ​ភ្នែក​មាន​ក្រពេញ​មួយ​សម្រាប់​ផលិត​ទឹក​ភ្នែក ហើយ​ពី​ភ្នែក​មក​ច្រមុះ​មាន​ប្រព័ន្ធ​បង្ហូរ​ទឹក​ភ្នែក​មួយ កាល​ណា​បំពង់​ទឹក​ភ្នែក​ស្ទះ ធ្វើ​ឲ្យ​មាន​ទឹក​ភ្នែក​ដក់​នៅ​នឹង​ភ្នែក។

    លោកស្រី​វេជ្ជបណ្ឌិត​ឯកទេស​រោគ​កុមារ ដែល​​ធ្លាប់​បម្រើ​ការងារ​នៅ​មន្ទីរពេទ្យ​កុមារ​អង្គរ ខេត្ត​សៀមរាប​នេះ​បន្ត​ថា ការ​ស្ទះ​បំពង់​បង្ហូរ​ទឹកភ្នែក​របស់​ក្មេង​តូចៗ ជា​ជំងឺ​មក​ពី​កំណើត វា​មិន​មែន​ជា​ជំងឺ​អី​ធ្ងន់ធ្ងរ​នោះទេ ក្នុង​នោះ​ជំងឺ​នេះ​នឹង​ជា​ទៅវិញ​សឹង​តែ ៩០% ពេល​ក្មេង​មាន​អាយុ​១​ឆ្នាំ។ គេ​សង្កត​ឃើញ​ថា ក្នុង​ចំណោម​ក្មេង ១០០ នាក់ មាន​ ៥​ នាក់ ​កើត​ជំងឺ​ស្ទះ​បំពង់​បង្ហូរ​ទឹក​ភ្នែក។

    ១. រោគ​សញ្ញា​ក្មេង​ស្ទះ​បំពង់​បង្ហូរ​ទឹក​ភ្នែក

    ក្មេង​មាន​ជំងឺ​ស្ទះ​បំពង់​បង្ហូរ​ទឹក​ភ្នែក មិន​ហើម​ភ្នែក មិន​ក្រហម​​ភ្នែក ឬ​មាន​អាចម៍​ភ្នែក​ជាប់​រហូត​នោះ​ទេ តែ​មាន​សញ្ញា​សម្គាល់​ខាង​ក្រោម​នេះ។

    – ហៀរ​ទឹក​ភ្នែក​ជាប់​រហូត

    – មាន​ទឹក​ភ្លែក​ថ្លា ឬ​ស្អិត​ជាប់​ភ្នែក។

    – ត្របក​ភ្នែក​ស្អិត​ជាប់​គ្នា (ពិបាក​បើក​ភ្នែក)។

    ២. ត្រូវ​ធ្វើ​ម៉េច បើ​ក្មេង​ស្ទះ​បំពង់​បង្ហូរ​ទឹកភ្នែក?

    វិធីសាស្ត្រ​​សម្រាប់​ព្យាបាល​ជំងឺ​ស្ទះ​បំពង់​បង្ហូរ​ទឹក​ភ្នែក​ចំពោះ​កូនក្មេង មាន​២​សំខាន់ គឺ១ ម៉ាស្សា​លើ​ត្របក​ភ្នែក និង​ទី​២ ត្រូវ​រង់ចាំ​ដល់​ថ្ងៃ​ក្មេង​ធំ​បន្តិច វា​នឹង​ជា​ដោយ​ឯក​ឯង​នៅ​ពេល​អូន​តូច​អាយុ​បាន​ ១​ឆ្នាំ។

    ៣. របៀប​​ម៉ាស្សា​ភ្នែក​ក្មេង​ស្ទះ​បំព​ង់បង្ហូរ​ទឹក​​ភ្នែក

    មុន​នឹង​ម៉ាស្សា​ភ្នែក​កូន ម៉ាក់ប៉ា​ត្រូវ​កាត់​ក្រចក​ដៃ​ឲ្យ​ខ្លី លាង​ដៃ​ឲ្យ​ស្អាត ដោយ​ចាប់​ផ្តើម​ម៉ាស្សា​ពី​គល់​ភ្នែក​មក​ចុង​ច្រមុះ ដោយ​ធ្វើ​បែប​នេះ​ចំនួន​ ១៥​ដង/ម្តង និង​ត្រូវ​ម៉ាស្សា ២ដង/ថ្ងៃ ក្រោយ​ពី​ងូត​ទឹកហើយ គឺ​នៅ​ពេល​ព្រឹក និង​ពេល​ល្ងាច។ បើ​កូន​មាន​បញ្ហា​ភ្នែក​ខាង​ណា​ត្រូវ​ម៉ាស្សា​ខាង​នោះ បើ​ស្ទះ​បង្ហូរ​ទឹក​ភ្នែក​ទាំង​២ ត្រូវ​តែ​ម៉ាស្សា​ទាំង​២ ការ​ម៉ាស្សា​នេះ​សំខាន់​ណាស់ ជួយ​ពន្លឿន​ឲ្យ​ភ្នែក​ឆាប់​ជា​សះ​ស្បើយ​ពី​បញ្ហា​ស្ទះ​បំពង់​បង្ហូរ​ទឹក​ភ្នែក។

    រលាក​ភ្នែក​ទារកHello_គ្រូពេទ្យ

    ៤. ពេល​ណា​ត្រូវ​ទៅ​ជួប​ពេទ្យ

    ក្នុង​ករណី​កូន​អាយុ​បាន​១ឆ្នាំ តែ​នៅ​មាន​បញ្ហា​ដដែល ទោះ​បី​ជា​ម៉ាក់ៗ​ព្យាយាម​ម៉ាស្សា​រាល់​ថ្ងៃ​ក៏​ដោយ បែប​នេះ​លោកស្រី​វេជ្ជបណ្ឌិត​ណែនាំ​ឲ្យ​ប្រញាប់​នាំ​កូន​ទៅ​ជួយ​គ្រូពេទ្យ។ ម្យ៉ាងវិញ​ទៀត​បើ​ភ្នែក​កូន​មាន​សញ្ញា​មិន​ប្រក្រតី ដូចជា​ភ្នែក​ឡើង​ក្រហម ហើម ឈាម ខ្ទុះ ក៏​ត្រូវ​នាំ​កូន​ទៅ​ពេទ្យ​បន្ទាន់​ដែរ។

     

    បដិសេធ

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    ត្រួតពិនិត្យដោយ

    វេជ្ជ. ចាន់ ស៊ីណេត

    · ម​ន្ទីរពេទ្យបង្អែកមិត្តភាពកម្ពុជា-ចិន សែនសុខ


    អត្ថបទ​ដោយ ដេត ធន្នី · កែ Nov 25, 2020

    advertisement iconផ្សព្វផ្សាយពាណិជ្ជកម្ម

    តើអត្ថបទនេះមានប្រយោជន៍ដែរទេ?

    advertisement iconផ្សព្វផ្សាយពាណិជ្ជកម្ម
    advertisement iconផ្សព្វផ្សាយពាណិជ្ជកម្ម