រលាកបំពង់ក ជាជំងឺរលាកផ្នែកខាងលើផ្លូវដង្ហើមដែលរលាកបំពង់សំឡេង និងបំពង់អាហារផ្នែកខាងលើក្នុងពេលតែមួយ។ យើងអាចសង្កេតឃើញថា ក្មេងៗឧស្សាហ៍ឈឺជំងឺរលាកបំពង់កនេះមែនទែន ជួនកាលរលាកខ្លាំងដល់ក្ដៅខ្លួនប្រកាច់ក៏មាន។ មួយវិញទៀត អាអូនក៏អាចកើតទៅជាជំងឺសើស្បែកមួយប្រភេទដោយសារជំងឺរលាកបំពង់កបានដែរ។
ទាក់ទងនឹងបញ្ហានេះ លោកវេជ្ជបណ្ឌិត ហ៊ាង រតនា ជំនាញជំងឺទូទៅ និងកុមារបានបកស្រាយឲ្យដឹងថា តាមការសង្កេតមើល ក្រោយពេលមានជំងឺរលាកបំពង់ក ឬរលាកផ្លូវដង្ហើម (មេរោគជាមូលហេតុ) វាអាចបង្កឲ្យកើតជំងឺសើស្បែក ពីទីរីយ៉ាស៊ីស រូសៀ (Pityriasis rosea) ហើយវាក៏អាចកើតឡើងបានដោយសារការប្រតិកម្មថ្នាំមួយចំនួនបានដែរ។
លោកវេជ្ជបណ្ឌិតបន្តថា ជំងឺ ពីទីរីយ៉ាស៊ីស រូសៀ គឺជាជំងឺដែលមើលទៅគួរឲ្យខ្លាច តែការព្យាបាលបានជោគជ័យខ្ពស់ល្អ និងមិនងាយបន្សល់ស្លាកស្នាម ហើយអត្រារើឡើងវិញតែ២%ប៉ុណ្ណោះ។ យើងអាចដឹងថា អ្នកជំងឺមានជំងឺពីទីរីយ៉ាស៊ីស រូសៀនេះបានតាមរយៈ៖
– ឡើងកន្ទួលលើស្បែក(លើទ្រូង ក្បាលពោះ ខ្នង…)
– អស់កម្លាំង
– ឈឺខ្លួន
– រមាស់
រោគសញ្ញានៃជំងឺនេះ អាចមើលទៅដូចជាបញ្ហាស្បែក ឬបញ្ហាសុខភាពដទៃទៀតដែរ ប៉ុន្តែ ចំពោះក្មេងដែលមានបញ្ហាសើរស្បែកពីទីរីយ៉ាស៊ីស រូសៀនេះ អាចមានរោគសញ្ញាខុសៗគ្នាទៅតាមបុគ្គលម្នាក់ៗ។
វេជ្ជបណ្ឌិតដដែលបានបន្ថែមទៀតថា ការព្យាបាលបញ្ហានេះ គឺត្រូវបំបាត់មូលហេតុដែលនាំឲ្យកើតជំងឺ ព្យាបាលតាមរោគសញ្ញា និងត្រូវផ្ដល់សំណើមដល់ស្បែក។ លើសពីនេះ បើសិនកូនមានចេញសញ្ញាប៉ុន្មាននេះ ម៉ាក់ប៉ាគួរតែនាំកូនទៅជួបគ្រូពេទ្យជំនាញក្មេង៖
- កូនឈឺខ្លាំង
- ឡើងកន្ទួលអាក្រក់ទៅៗ
- រមាស់ខ្លាំង ឬចេញសញ្ញាណាមួយដែលអាអូនមិនស្រួលខ្លាំង
- ឆ្លងមេរោគនៅកន្លែងកន្ទួល។ល។
[embed-health-tool-vaccination-tool]
