គ្រោះថ្នាក់! "មូស" តូចមែន តែអាចចម្លងជំងឺកាចសាហាវជាច្រើន

ប្រុងប្រយ័ត្នផងគ្នាយើង! មូសខាំ មិនត្រឹមតែរមាស់ គួរឲ្យរំខានប៉ុណ្ណោះទេ ជំងឺកាចសាហាវជាច្រើន សុទ្ធចម្លងដោយសារអាសត្វចង្រៃនេះតែម្តង អាចគម្រាមកំហែងអាយុជីវិតទៀតផង។ ចង់ដឹងថា មូស អាចចម្លងជំងឺអ្វីខ្លះ? គួរការពារដោយវិធីណា? កុំរំលងអត្ថបទនេះឲ្យសោះ។

១- ជំងឺហ្ស៊ីកា

វីរុសហ្ស៊ីកា បានរកឃើញលើកដំបូងនៅទ្វីបអាហ្វ្រិក នៅក្នុងទសវត្សរ៍ឆ្នាំ ១៩៤០។ តាំងពីពេលនោះមក វាបានរាលដាលទៅកាន់ទ្វីបអាមេរិកខាងត្បូង អាមេរិកកណ្តាល ប្រទេសម៉ិចស៊ិចកូ តំបន់ការីបប៊ីន អាស៊ីអាគ្នេយ៍ និងប្រជុំកោះនៅមហាសមុទ្រប៉ាស៊ីហ្វិក។ យើងពិបាកនឹងដឹងថា តើយើងមានឆ្លងរោគដោយវីរុស ហ្ស៊ីកា ឬអត់ណាស់ ខណៈរោគសញ្ញាឆ្លងរោគដោយវីរុស ហ្ស៊ីកា គឺមានសភាពស្រាល តាមធម្មតា នឹងបាត់ទៅវិញដោយឯកឯង អំឡុងពេលមួយសប្តាហ៍។ រោគសញ្ញាឃើញមានជាញឹកញាប់ ដូចជា ឈឺចាប់នៅសន្លាក់ និងសាច់ដុំ គ្រុនក្តៅ ឈឺភ្នែកក្រហម ពេលខ្លះកន្ទួលរោលស្បែក។ ទោះយ៉ាងណា វិរុស ហ្ស៊ីកា មានទំនាក់ទំនងជាមួយបញ្ហាសុខភាពធ្ងន់ធ្ងរ ដូចជា ប្រជុំរោគសញ្ញា Guillain-Barre និងអូនៗកើតមកមានលលាដ៍ក្បាលតូច។

– Guillain-Barre៖ ជាវិបត្តិមិនធម្មតានៃប្រព័ន្ធប្រសាទ បណ្តាលឲ្យមានភាពទន់ខ្សោយ និងខ្វិនពិការ ប៉ុន្តែ ស្ថានភាពនេះគ្រាន់តែបណ្តោះអាសន្នប៉ុណ្ណោះ ដោយអ្នកមានរោគសញ្ញាសឹងគ្រប់គ្នាបានជាងើបចេញពីជំងឺនេះបាន។

– លលាដ៍ក្បាលតូច៖ ជាភាពខុសប្រក្រតីពីកំណើត បង្កឲ្យបេប៊ីកើតមកមានក្បាលតូចខុសធម្មតា និងមិនមានការលូតលាស់រាងកាយពេញលេញ។ បេប៊ីមានលលាដ៍ក្បាលតូច ជារឿយៗរងគ្រោះដោយសារភាពយឺតយ៉ាវ ក្នុងការវិវឌ្ឍសតិ បញ្ញា និងបញ្ហាសុខភាពដទៃទៀត។

ជំងឺហ្ស៊ីកា ត្រូវជឿថា បណ្តាលឲ្យមានលលាដ៍ក្បាលតូចនៅលើទារក ដែលម៉ាក់ៗបានឆ្លងរោគក្នុងអំឡុងពេលមានផ្ទៃពោះ។

ដោយសារតែគ្មានថ្នាំបង្ការប្រឆាំងវីរុស ហ្ស៊ីកា មជ្ឈមណ្ឌលគ្រប់គ្រង និងបង្ការជំងឺ បានណែនាំដូចតទៅ៖

– ស្ត្រី មានផ្ទៃពោះ គួរចៀសវាងធ្វើដំណើរទៅកាន់តំបន់ណា ដែលមានវីរុស ហ្ស៊ីកា កំពុងរាតត្បាត។

– ក្នុងករណីចាំបាច់ត្រូវធ្វើដំណើរទៅកាន់តំបន់ទាំងនោះ គួរពិគ្រោះជាមួយវេជ្ជបណ្ឌិតជាមុនសិន ហើយត្រូវតែម៉ត់ចត់ កុំធ្វែសប្រហេស អនុវត្តវិធានការ ដើម្បីចៀសវាងពីមូសខាំ។

– ទាំងស្រីៗ និងប្រុសៗ កំពុងព្យាយាមយកអូនៗ គួរតែធ្វើដូចគ្នា ត្រូវចៀសវាងទៅកាន់តំបន់មានវីរុសហ្ស៊ីកា ហើយអនុវត្តតាមជំហានៗ ដើម្បីចៀសវាងមូសខាំ ប្រសិនបើការធ្វើដំណើរ មិនអាចចៀសផុតទេ។

– ដោយសារជំងឺ ហ្ស៊ីកា អាចចម្លងតាមរយៈការរួមភេទដែរនោះ គ្នាយើងទាំងអស់ កំពុងរស់នៅ ឬធ្វើដំណើរទៅកាន់តំបន់មានការរាតត្បាត និងដៃគូមានផ្ទៃពោះត្រូវតែប្រើប្រាស់ស្រោមអនាម័យ ឬតមរួមភេទអំឡុងពេលមានគភ៌។

២- ជំងឺគ្រុនឈីក

វីរុសគ្រុនឈីក មានកំណើតដើមនៅតំបន់ ការីបប៊ីន និងទ្វីបអាមេរិកខាងត្បូង។ យ៉ាងណា បច្ចុប្បន្ន វីរុសប្រភេទនេះ អាចរកឃើញនៅក្នុង សហរដ្ឋអាមេរិក និងកន្លែងជាច្រើនទៀត។ ប៉ុន្តែ ករណីផ្ទុះឡើងជំងឺនេះ កើតមានឡើងនៅឯបណ្តាប្រទេសក្នុងទ្វីបអាហ្វ្រិក អាស៊ី អឺរ៉ុប តំបន់ជាច្រើននៅមហាសមុទ្រឥណ្ឌា និងមហាសមុទ្រប៉ាស៊ីហ្វិក។ ការបង្ករោគគ្រុនឈីក បណ្តាលឲ្យមានឈឺចាប់សន្លាក់ធ្ងន់ធ្ងរ មិនព្រមបាត់រយៈពេលច្រើនសប្តាហ៍។ រោគសញ្ញាដទៃផ្សេងទៀតអាចរួមមានឈឺក្បាល ឈឺសាច់ដុំ និងកន្ទួលរោលស្បែក។

គ្នាយើងដែលឆ្លងរោគ ត្រូវការសម្រាក និងផឹកទឹកឲ្យបានច្រើន។ ថ្នាំបំបាត់ការឈឺចាប់ អាចប្រើបានសម្រាប់ព្យាបាលជំងឺគ្រុនឈីក ហើយស្ទើរតែគ្រប់ករណីទាំងអស់ មិនបណ្តាលឲ្យស្លាប់ឡើយ។ ចាប់តាំងពីឆ្នាំ ២០១៣ ជំងឺគ្រុនឈីក បានរាលដាលទៅកាន់ប្រទេសចំនួន ៤៥ និងមានករណីប្រមាណ ២លាន ត្រូវបានរាយការណ៍កើតជំងឺនេះ។

៣- ជំងឺគ្រុនឈាម

ជំងឺគ្រុនឈាម បណ្តាលឲ្យមានគ្រុនក្តៅធ្ងន់ធ្ងរភ្លាមៗ និងមានហូរឈាមរឹមៗ ចេញតាមច្រមុះ ឬអញ្ចាញធ្មេញ។ វិធីល្អបំផុត អាចប្រយុទ្ធប្រឆាំងជំងឺគ្រុនឈាម ត្រូវសម្រាក និងគ្រប់គ្រងរោគសញ្ញាឲ្យត្រឹមត្រូវ។ គ្នាយើងមួយចំនួន អាចជួបប្រទះជំងឺគ្រុនឈាម មានអាការៈហូរឈាម។ ស្ថានភាពនេះ ដោយសារសរសៃឈាមតូចៗជ្រាប ហើយសារធាតុរាវបាន ចាល់ផ្តុំនៅក្នុងពោះ និងសួត។

គ្រុនឈាម មានហូរឈាម ទាមទារការយកចិត្តទុកដាក់ព្យាបាលបន្ទាន់ ហើយជំងឺ គ្រុនឈាម អាចបង្កឡើងដោយវីរុសមួយ ក្នុងចំណោមវីរុសគ្រុនឈាមទាំងបួនប្រភេទ (វីរុសគ្រុនឈាមប្រភេទ ១, ២, ៣ ឬ ៤)។ ហេតុនេះ មនុស្សម្នាក់អាចត្រូវបានបង្ករោគដោយជំងឺគ្រុនឈាមរហូតដល់ ៤ ដង។

ការបង្ករោគគ្រុនឈាម ជាមូលហេតុធំជំងឺ ដែលឆក់យកជីវិតមនុស្សជាច្រើន ក្នុងបណ្តាប្រទេសតំបន់ត្រូពិច និងតំបន់ក្បែរៗនោះ។ រោគសញ្ញាជំងឺគ្រុនឈាម អាចមានយ៉ាងរហ័ស ពីស្រាលទៅធ្ងន់។ អ្វីសំខាន់ ត្រូវស្វែងរករោគសញ្ញាឲ្យបានលឿនបំផុត បើប្រទះឃើញរោគសញ្ញាកាន់តែអាក្រក់ត្រូវស្វែងរកការព្យាបាលឲ្យបានលឿនបំផុត តាមអាចធ្វើទៅបាន។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ Meng Vatana · កែ 21/02/2019

គ្រោះថ្នាក់! "មូស" តូចមែន តែអាចចម្លងជំងឺកាច​សាហាវ​ជាច្រើន

គ្រោះថ្នាក់! "មូស" តូចមែន តែអាចចម្លងជំងឺកាចសាហាវជាច្រើន