នាយករដ្ឋមន្ត្រីចេញបញ្ជាឲ្យផ្អាកពិធីរៀបការ និងជួបជុំទូទាំងប្រទេស

ប្រមុខរាជរដ្ឋាភិបាលកម្ពុជា សម្ដេចហ៊ុន សែន បានបញ្ជាឱ្យអភិបាលខេត្ត-រាជធានី ពិចារណាបិទពិធីមង្គលការ និងពិធីជួបជុំទាំងអស់ជាបណ្តោះអាសន្ន តាមរយៈសារជាសំឡេងនៅរសៀលនេះ។

កាលពីពេលកន្លងទៅនាយករដ្ឋមន្ត្រីបានផ្តល់អំណាចដល់អភិបាលខេត្តក្នុងការបិទ ឬបើកពិធី ឬក៏ជួបជុំអ្វីមួយក្នុងដែនដីរបស់ខ្លួន ក្នុងនោះក៏រាជធានី ខេត្តមួយចំនួនក៏បានចាត់វិធានការផ្អាកការជួបជុំ ការរៀបចំមង្គល ខណៈខេត្តខ្លះក៏មិនទាន់បានចាត់ចែង។

ប៉ុន្តែករណីថ្មីៗមានអ្នកកូវីដ ១៩ ទៅចូលរួមពិធីការនៅខេត្តតាកែវ ដែលកណីនេះតម្រូវបិទសាលាអស់ជាច្រើនក្នុងខេត្តនេះ ដែលនាំទៅដល់ហានិភ័យនៃការឆ្លងរាលដាលជំងឺកូវីដ ១៩។

សម្តេចនាយករដ្ឋមន្ត្រី ស្នើឲ្យពលរដ្ឋយោគយល់ ពីព្រោះគ្រាន់តែក្នុងករណីនៅខេត្តតាកែវមួយធ្វេីអោយមានហានិភយច្រើនណាស់ទៅហេីយ ដូច្នេះសូមអោយអភិបាលខេត្តទាំងអស់ ពិចារណាចេញបទបញ្ជាផ្អាកអាពាហ៍ពិពាហ៍ និងពិធីជួបជុំនានានៅក្នុងខេត្តរបស់ខ្លួនជាបណ្តោះអាសន្ន។