បន្ទាប់ពីបានប្រមូលទិន្នន័យអស់រយៈពេលជាច្រើនខែ ក្រុមអ្នកវិទ្យាសាស្រ្តបានឯកភាពគ្នាថាវីរុសកូវីដ១៩ បំប្លែងថ្មីDelta ជាប្រភេទវ៉ារ៉្យង់ឆ្លងលឿនបំផុតមួយក្នុងត្រកូលវីរុសកូរ៉ូណា។ វីរុសបំប្លែងថ្មីនេះអាចរាលដាលលឿនជាងវីរុសកូវីដ១៩ ដែលរកឃើញដំបូងរហូតដល់២២៥ភាគរយ។
អ្នកមិនទាន់ចាក់វ៉ាក់សាំងកូវីដ១៩ ប្រឈមខ្ពស់នឹងវ៉ារ្យ៉ង់ Delta
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ការសិក្សាថ្មីមួយចេញផ្សាយនៅដើមខែកក្កដា ឆ្នាំ២០២១ នេះបានពន្យល់លម្អិតពីមូលហេតុដែលវីរុសកូវីដ១៩ បំប្លែងថ្មីនេះឆ្លងលឿន។ វីរុសបំប្លែងថ្មី Delta មិនត្រឹមតែចម្លងលឿនប៉ុណ្ណោះទេ តែវាក៏វិវត្តលូតលាស់លឿននៅក្នុងប្រព័ន្ធផ្លូវដង្ហើមរបស់អ្នកជំងឺលឿន និងក្នុងកម្រិតខ្ពស់។ នេះបើតាមការបញ្ជាក់របស់ក្រុមអ្នកស្រាវជ្រាវមជ្ឈមណ្ឌលគ្រប់គ្រង និងបង្ការជំងឺឆ្លងរបស់ខេត្តGuangdong ប្រទេសចិន។
ការសិក្សាបញ្ជាក់ទៀតថា ពេលមនុស្សណាម្នាក់ឆ្លងវីរុសបំប្លែងថ្មីប្រភេទDelta វ៉ារ្យ៉ង់ កម្រិតវីរុសឆ្លងក្នុងប្រព័ន្ធផ្លូវដង្ហើមមាន១ ០០០ដងខ្ពស់ជាងវីរុសកូវីដ១៩ ដែលរកឃើញដំបូងៗ។
បន្ថែមពីនេះ អ្នកឆ្លងDelta វ៉ារ្យ៉ង់ ហាក់មានចេញរោគសញ្ញាលឿនភ្លាមៗដែរ។ ជាមធ្យម វ៉ារ្យ៉ង់ប្រភេទDeltaនេះអាចរកឃើញក្នុងរយៈពេលបួនថ្ងៃ ខណៈវ៉ារ្យ៉ង់ដើម អាចរកឃើញក្នុងរយៈពេលប្រាំមួយថ្ងៃ។ ការសិក្សារកឃើញទៀតថា អ្នកឆ្លងវ៉ារ្យ៉ង់ Delta អាចចម្លងនៅអ្នកផ្សេងបានភ្លាមៗបន្ទាប់ពីឆ្លងរួចដែរ។
ក្រុមអ្នកស្រាវជ្រាវលើកជាយោបល់ថា អ្នកបានប៉ះពាល់ដោយផ្ទាល់ជាមួយអ្នកវិជ្ជមានកូវីដ១៩ ក្នុងដំណាក់កាលនេះត្រូវធ្វើចត្តាឡីស័ក១៤ថ្ងៃភ្លាមៗដែរ។ មួយវិញទៀត ក្រុមអ្នកវិទ្យាសាស្រ្តជំរុញឲ្យគ្រប់គ្នាទៅទទួលការចាក់វ៉ាក់សាំងឲ្យបានពេញលេញ។ តាមរយៈតួលេខនៅសហរដ្ឋអាមេរិក អ្នកដែលស្លាប់ដោយសារកូវីដ១៩ បំប្លែងថ្មីប្រភេទDelta ៩៩,៥% ជាអ្នកមិនទាន់បានចាក់វ៉ាក់សាំង។
អ្នកជំនាញរបស់CDC អាមេរិក អះអាងថា៖ «យើងក៏បានរកឃើញថាវ៉ាក់សាំងបានបង្ការកុំឲ្យអ្នកឆ្លងធ្លាក់ខ្លួនឈឺធ្ងន់ ឬត្រូវសង្គ្រោះនៅមន្ទីរពេទ្យ ឬក៏ស្លាប់ដោយសារវ៉ារ្យ៉ង់Delta»។
ប្រហាក់ប្រហែលគ្នានេះដែរ ទីភ្នាក់ងារសុខភាពសាធារណៈរបស់អង់គ្លេសបានរកឃើញដែរថាវ៉ារ្យ៉ង់Delta អាចធ្វើឲ្យអ្នកឆ្លងមានហានិភ័យខ្ពស់ត្រូវសង្គ្រោះនៅមន្ទីរពេទ្យពីរដងខ្ពស់ជាងវ៉ារ្យ៉ង់ប្រភេទAlpha ហើយអ្នកមិនទាន់បានទទួលវ៉ាក់សាំងមានហានិភ័យខ្ពស់បំផុត។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម