រយៈពេល២ថ្ងៃប៉ុណ្ណោះ ពោលគឺថ្ងៃទី៣១ កក្កដា និងថ្ងៃទី០១ សីហា ២០២១ ប្រទេសកម្ពុជាបានរកឃើញអ្នកឆ្លងវីរុសបំប្លែងថ្មីប្រភេទ Delta ចំនួន ១០៩ករណី នេះបើតាមការលើកឡើងរបស់លោកជំទាវ ឱ វណ្ណឌីន អ្នកនាំពាក្យ និងជារដ្ឋលេខាធិការ ក្រសួងសុខាភិបាល។
លោកជំទាវបានបន្តថា ជារឿងគួរបារម្ភ និងត្រូវប្រុងប្រយ័ត្ន ការរាតត្បាតនៃវីរុសកូវីដ-១៩ បំប្លែងថ្មី ប្រភេទ Delta ដែលពិភពលោកកំពុងតែមានការព្រួយបារម្ភនេះ បានកំពុងវាយលុកយ៉ាងសកម្មនៅកម្ពុជាយើងដែរ។ ដ្បិតតែមិនទាន់រីកសាយភាយខ្លាំងក៏ពិតមែន ប៉ុន្តែបានឆ្លងចូលក្នុងសហគមន៍តាមកន្លែង ជាដុំៗហើយ ក្្នុងនោះក៏ការឆ្លងដល់ក្រុមគ្រូពេទ្យផងដែរ។
ដោយឡែក បើគិតចាប់ពីថ្ងៃទី៣១ មីនា មកដល់ថ្ងៃទី០១ សីហា ២០២១ កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងថ្មី Delta សរុបចំនួន ២២៣នាក់ ក្នុងនោះមានស្ត្រី ១០៧នាក់។
រោគសញ្ញាវីរុសបំប្លែង Delta
វីរុសបំប្លែងថ្មី Delta មានសភាពឆ្លងលឿន និងមានភាពកាចសាហាវជាងជំងឺកូវីដ ១៩ ធម្មតា យោងតាមការសិក្សាពីមុនមក អ្នកស្រាវជ្រាវសង្កេតឃើញថា រោគសញ្ញាវីរុសបំប្លែង Delta មានភាពខុសគ្នារវាងអ្នកចាក់វ៉ាក់សាំងរួច និងអ្នកមិនទាន់ចាក់វ៉ាក់សាំងនៅពេលឆ្លងវីរុសបំប្លែងនេះដូចជា៖
អ្នកចាក់វ៉ាក់សាំងរួច៖ ឈឺក្បាល ហៀរសម្បោរ កណ្ដាស់ និងឈឺ ឬរមាស់ក និងមិនសូវមានរោគសញ្ញាកូវីដ ១៩ ធម្មតាកើតឡើងទេរួមមាន ហិតមិនដឹងក្លិន ញ៉ាំមិនដឹងរសជាតិ ក្ដៅខ្លួន និងដង្ហក់។
អ្នកមិនទាន់ចាក់វ៉ាក់សាំង៖ ឈឺក្បាល ហៀរសម្បោរ ក្ដៅខ្លួន ក្អកញឹកញាប់ និងរោគសញ្ញាដូចកូវីដ ១៩ធម្មតាផ្សេងទៀត។
[embed-health-tool-bmi]
