បើនិយាយដល់ពន្លឺព្រះអាទិត្យគ្នាយើងច្បាស់ជាដឹងហើយថាវាផ្ដល់ឲ្យមនុស្សយើងនូវវីតាមីន D និងជួយដល់ផ្លូវអារម្មណ៍របស់មនុស្សយើងទៀតផង។ ប៉ុន្តែការត្រូវកាំរស្មីព្រះអាទិត្យច្រើនពេកក៏អាចនាំឲ្យមានជំងឺមហារីកស្បែកដូចគ្នា។
កម្ដៅព្រះអាទិត្យ បង្កជាជំងឺមហារីកស្បែកបែបណា?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. អ្វីជាជំងឺមហារីកស្បែក?
ជំងឺមហារីកស្បែក ជាការលូតលាស់ខុសប្រក្រតីនៃកោសិកាស្បែក។ ជំងឺមហារីកស្បែកមានពីរប្រភេទ គឺជំងឺមហារីកស្បែកប្រភេទ (Non-melanoma) និងជំងឺមហារីកស្បែកប្រភេទ (Melanomas)។
ជំងឺមហារីកស្បែកប្រភេទ Non-melanoma ជាជំងឺមហារីកស្បែកដែលលូតលាស់យឺតនៅស្រទាប់ស្បែកផ្នែកខាងលើ ហើយជំងឺមហារីកប្រភេទនេះកម្រនឹងរាលដាលទៅកន្លែងផ្សេងនៃរាងកាយណាស់។
ចំណែកជំងឺមហារីកប្រភេទ Melanomas វិញបង្កគ្រោះថ្នាក់ខ្លាំងជាងប្រភេទ Non-melanoma ដោយជំងឺមហារីកនេះ អាចរាលដាលទៅកាន់សរីរាង្គផ្សេងទៀតនៃរាងកាយ។
២. តើកាំរស្មីព្រះអាទិត្យបង្កជាជំងឺមហារីកស្បែកបែបណា?
ជាង៨០ភាគរយនៃជំងឺមហារីកស្បែកបង្កដោយការត្រូវកាំរស្មីព្រះអាទិត្យUVច្រើនខ្លាំងពេក។ កាំរស្មីព្រះអាទិត្យអាចបំផ្លាញDNA ក្នុងកោសិកាស្បែករបស់យើង ដែលអាចធ្វើឲ្យមានចំនួនការខូចខាតចេះតែកើនឡើង និងបង្កជាហានិភ័យនៃការបំប្លែងហ្សែន ដែលនាំឲ្យមានជំងឺមហារីកស្បែក។
ការត្រូវកម្ដៅថ្ងៃខ្លាំង ឬមានការរលាកដោយសារកម្ដៅថ្ងៃកាន់តែញឹកញាប់ ការខូចខាតស្បែកក៏កាន់តែច្រើន និងបង្កហានិភ័យកើតជំងឺមហារីកកាន់តែខ្ពស់។ ការសិក្សាខ្លះបានលើកឡើងថាត្រឹមការរលាកដោយកម្ដៅថ្ងៃម្ដងក្នុងរយៈពេលពីរឆ្នាំ ក៏អាចបង្កឲ្យមានហានិភ័យកើតជំងឺមហារីកស្បែកកើនឡើងដល់ទៅបីដង។
៣. វិធីចៀសវាងពីកម្ដៅថ្ងៃ
ប្រសិនជាយើងសម្គាល់ឃើញថាស្បែកប្រែជាពណ៌ផ្កាឈូក ឬឡើងក្រហម យើងគួរស្វែងរកម្លប់ កុំឲ្យត្រូវកម្ដៅថ្ងៃបន្តទៀត ដើម្បីបញ្ឈប់ការបំផ្លាញស្បែក។ ការលាបឡេការពារកម្ដៅថ្ងៃនឹងមិនមានប្រសិទ្ធភាពការពារស្បែកឲ្យសុវត្ថិភាពទាំងស្រុងទេបើយើងនៅតែនៅក្រោមកម្ដៅថ្ងៃខ្លាំង។
ថ្វីបើឡេការពារកម្ដៅថ្ងៃអាចថាជួយឲ្យយើងមានអារម្មណ៍ល្អប្រសើរបន្តិចមែន តែថាឡេមិនអាចជួយជួសជុលDNA ដែលខូចបាននោះទេ។ ការរលាកស្បែកដោយកម្ដៅម្ដងមិនមែនមានន័យថាយើងអាចកើតជំងឺមហារីកស្បែកនោះទេ ប៉ុន្តែបើរលាកស្បែកដោយកម្ដៅថ្ងៃច្រើនដង ឱកាសកើតជំងឺមហារីកស្បែកក៏កាន់តែខ្ពស់ដែរ។ ដើម្បីកាត់បន្ថយហានិភ័យការរលាកដោយកម្ដៅថ្ងៃ និងការពារស្បែកទៅថ្ងៃមុខ គ្នាយើងគួរចៀសវាងត្រូវកម្ដៅថ្ងៃពេលថ្ងៃកំពុងក្ដៅខ្លាំង នៅក្នុងម្លប់ ស្លៀកសម្លៀកបំពាក់ជិតៗល្អ និងប្រើឡេកាពារកម្ដៅថ្ងៃ រួមគ្នា។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម