ពេលពពោះ ម៉ាក់ៗមួយចំនួនបែរជាជួបរឿងអកុសល ដោយកូនស្លាប់ក្នុងពោះទាំងមិនឲ្យសញ្ញា ឬក៏មានសញ្ញាខ្លះៗ។ កូនស្លាប់ក្នុងពោះ អាចបណ្តាលមកពីគភ៌លូតលាស់មិនប្រក្រតី សុក ឬទងសុកមានបញ្ហា មានការឆ្លងរោគ ឬសកម្មភាពរបស់ម៉ាក់ៗ។
ដើម្បីបង្ការករណីកូនស្លាប់ក្នុងពោះ ម៉ាក់ចាំបាច់ត្រូវធ្វើតាមការណែនាំ ៥ ចំណុច ខាងក្រោមនេះ៖
១- តាមដានសុខភាពឲ្យបានទៀងទាត់
ការតាមដានសុខភាព និងពិនិត្យផ្ទៃពោះជាប្រចាំជាមួយគ្រូពេទ្យជំនាញពិតជាសំខាន់ណាស់ ព្រោះអាចដឹងពីការលូតលាស់របស់គភ៌ ភាពមិនប្រក្រតីរបស់គភ៌ បើមានបញ្ហានោះអាចជួយបានទាន់ពេលវេលា។ ចាប់ពីពេលពពោះ រហូតដល់ថ្ងៃសម្រាល ស្រីៗត្រូវទៅពិនិត្យផ្ទៃពោះយ៉ាងហោចឲ្យបាន ៤ ដង។
២- ហាមប្រើថ្នាំផ្តេសផ្តាសដោយគ្មានវេជ្ជបញ្ជា
ប្រើថ្នាំផ្តេសផ្តាសអំឡុងពពោះដោយគ្មានពិគ្រោះជាមួយគ្រូពេទ្យ ឬគ្មានវេជ្ជបញ្ជា មានផលប៉ះពាល់ច្រើនណាស់ ដែលក្នុងករណីធ្ងន់ធ្ងរកូនអាចរលូត ឬស្លាប់ក្នុងពោះ។ ការពិគ្រោះយោបល់ជាមួយគ្រូពេទ្យមុននឹងប្រើថ្នាំអ្វីមួយពិតជាសំខាន់ ព្រោះមុននឹងឲ្យថ្នាំ ឬចេញវេជ្ជបញ្ជានោះ គ្រូពេទ្យបានមើលពីស្ថានភាពសុខភាពម្តាយ និងកូន ពីអាយុគភ៌ តើអាចប្រើថ្នាំប្រភេទនេះបានអត់ ប្រើកម្រិតណាទើបមិនប៉ះពាល់កូន។
អត្ថបទពាក់ព័ន្ធ៖ ពេលពពោះលេបថ្នាំផ្តេសផ្តាស ឬតាមគ្នា គ្រោះថ្នាក់ខ្លាំងបំផុត
៣- កុំជក់បារី និងផឹកស្រា
ការជក់បារី និងផឹកស្រា ពេលពពោះបង្កគ្រោះថ្នាក់ខ្លាំងណាស់ ក្រៅពីធ្វើឲ្យទារកលូតលាស់មិនប្រក្រតី កូនកើតមិនគ្រប់ខែ ក៏អាចបង្កឲ្យកូនស្លាប់ក្នុងពោះដែរ។
អត្ថបទពាក់ព័ន្ធ៖ ស្រីៗពពោះ បើនៅជិតអ្នកជក់បារី គ្រោះថ្នាក់ធំខ្លាំងដល់គភ៌
៤- គេងផ្អៀងទៅខាងឆ្វេង
ហេតុផលដែលគ្រូពេទ្យណែនាំឲ្យម៉ាក់ៗគេងផ្អៀងទៅខាងឆ្វេង ដើម្បីជួយសម្រួលដល់កម្លាំងសង្កត់ទៅលើសរសៃឈាមធំនៅក្នុងទ្រូង និងការប៉ះទង្គិចទៅកូនពេលចំកោងម្តងៗ។ ការគេងផ្អៀងទៅខាងឆ្វេង ជួយពង្រឹងដល់របត់ឈាមរត់ បង្កើនលំហូរឈាមបានកាន់តែច្រើនដល់គភ៌ បេះដូង និងតម្រងនោម ពិសេសអាការៈហើមជើង។
៥- កុំទៅជិតអ្នកជំងឺឆ្លង
ស្រីៗមានផ្ទៃពោះមិនត្រូវនៅជិតអ្នកជំងឺឆ្លងគ្រប់ប្រភេទ ពិសេសអ្នកកើតជំងឺស្អូច ឬអុតស្វាយ ព្រោះជំងឺនេះឆ្លងតាមរយៈតំណក់ទឹកមាត់ ក្អក ឬកណ្តាស់អ្នកជំងឺ។ បើឆ្លង ឬកើតជំងឺទាំង២នេះអាចប៉ះពាល់ដល់កូន ធ្វើឲ្យកូនស្លាប់ក្នុងពោះ ឬកើតមកមិនគ្រប់លក្ខណៈ ដូចជាក្បាលតូច ឬធំ ថ្លង់ មានបញ្ហាភ្នែក ត្រចៀក សួត បេះដូង ប្រព័ន្ធប្រសាទជាដើម។
អត្ថបទពាក់ព័ន្ធ៖ ស្រីៗកំពុងពពោះ បើកើតស្អូច គ្រោះថ្នាក់ធំដល់កូនក្នុងផ្ទៃណាស់
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
