ស្ត្រីពពោះប្រហែល ៥០% ត្រូវបានអ្នកស្រាវជ្រាវជឿថា ទទួលផលប៉ះពាល់ពីបញ្ហាគេងមិនលក់រ៉ាំរ៉ៃ។ នេះក៏ព្រោះតែ ភាពមិនស្រួលក្នុងរាងកាយ ការផ្លាស់ប្ដូរអ័រម៉ូន ការរំភើបលាយឡំជាមួយក្ដីបារម្ភពីការក្លាយជាម្ដាយថ្មីថ្មោងជាដើម។ ទោះជាយ៉ាងណាក៏ដោយ ម៉ាក់ៗអាចចៀសផុតពីបញ្ហាគេងមិនលក់បាន ដោយបង្កើតទម្លាប់គេងពេលពពោះល្អៗ ដែលជួយសម្រួលការគេងពីមួយយប់ទៅមួយយប់។
ហេតុអ្វីបានការគេងសំខាន់សម្រាប់ស្ត្រីពពោះ?
ការគេងបានគ្រប់គ្រាន់ពេលមានផ្ទៃពោះ ពិតជាមានសារសំខាន់ណាស់សម្រាប់ម្ដាយ និងទារកក្នុងផ្ទៃ។ ចំពោះម្ដាយ ការគេងបានគ្រប់គ្រាន់ជួយឲ្យប្រព័ន្ធការពាររាងកាយរឹងមាំ កាត់បន្ថយជំងឺបម្រុងក្រឡាភ្លើង ជំងឺបេះដូង ទប់ស្កាត់កូនកើតមុនខែ កើតទឹកនោមផ្អែមពេលពពោះ និងការពារបញ្ហាគេងកិកកុកកើតឡើងលើកូនក្រោយសម្រាល។
ទម្លាប់គេងពេលពពោះល្អៗ ជួយដល់ម៉ាក់ៗ
ការមានទម្លាប់គេងពេលពពោះល្អ ពិតជាសំខាន់ជាងពេលណាៗទាំងអស់សម្រាប់ស្ត្រី។ ក្រៅពីទម្លាប់គេងល្អៗ ស្ត្រីគួរអនុវត្តតាមខាងក្រោមនេះ យកល្អម៉ាក់ៗអាចបន្ថែមជាខ្នើយកើយពេលពពោះ ឬរបាំងបិទភ្នែកពេលគេង ដើម្បីកាត់បន្ថយបញ្ហាគេងមិនលក់ និងកែលម្អគុណភាពនៃការគេងទាំងមួលតែម្ដងដូចជា៖
- រក្សាបន្ទប់គេងឲ្យត្រជាក់ ងងឹត និងស្ងប់ស្ងាត់ ហើយកំណត់គ្រែសម្រាប់តែគេង និងការរួមភេទ
- ផ្ដល់អាទិភាពដល់ដំណេក និងប្រកាន់ខ្ជាប់នូវពេលវេលាចូលគេងជាប់លាប់
- បើគេងថ្ងៃ កុំគេងកៀកម៉ោងពេលល្ងាច ដើម្បីកុំឲ្យរំខានដល់ការគេងពេលយប់
- អានសៀវភៅ ងូតទឹក ឬធ្វើសកម្មភាពស្រាលៗណាមួយផ្សេងទៀត ដើម្បីត្រៀមចូលគេ
- ប្រើភ្លើងមានពន្លឺតិចៗ ពេលត្រូវក្រោកទៅបន្ទប់ទឹកពេលយប់ ដើម្បីឲ្យងាយស្រួលគេងវិញ
- ចៀសវាងញ៉ាំអាហារមានជាតិកាហ្វេអ៊ីន និងអាហារហឹរ ដើម្បីកាត់បន្ថយហានិភ័យជំងឺចាល់ទឹកក្រពះ GERD
- ចៀសវាងប្រើគ្រឿងអេឡិចត្រូនិកពេលជិតចូលគេង យ៉ាងហោចណាស់មួយម៉ោងមុនគេង
- ហាត់ប្រាណទៀងទាត់នៅពេលព្រឹកព្រលឹម
- ញ៉ាំទឹកឲ្យបានច្រើនពេញមួយថ្ងៃ តែកាត់បន្ថយញ៉ាំទឹកពេលយប់មុនចូលគេង ដើម្បីកុំឲ្យចូលបន្ទប់ទឹកញឹកយប់ឡើង
- បើម៉ាក់ៗមិនអាចគេងលក់ គួរក្រោកចេញពីគ្រែ ហើយធ្វើអ្វីផ្សេងសិនរហូតដល់ងងុយគេងវិញ។
[embed-health-tool-pregnancy-weight-gain]
