ចំពោះម៉ាក់ៗពពោះគ្រប់រូប ទាមទារឲ្យមានការចាក់វ៉ាក់សាំងមុន និងអំឡុងពេលពពោះ ចៀសវាងឆ្លងមេរោគ បង្កជាផលពិបាកដល់ការពពោះ ឬអាចប៉ះពាល់ដល់គភ៌។ ប៉ុន្តែបើម៉ាក់ៗចាក់វ៉ាក់សាំងណាមួយមិនគ្រប់គ្រាន់ ឬមិនបានចាក់ដូចជា វ៉ាក់សាំងតេតាណូស ជាដើម នឹងងាយប្រឈមនឹងការឆ្លងមេរោគប៉ះពាល់ដល់សុខភាព។
ពពោះ ឆ្លងមេរោគតេតាណូសប្រឈមផលប៉ះពាល់ដល់ជីវិតទាំងម្ដាយ និងកូន
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ទាក់ទងនឹងបញ្ហានេះ លោកវេជ្ជបណ្ឌិត ឃួន សុវណ្ណារិទ្ធ ឯកទេសផ្នែកសម្ភព និងរោគស្ត្រី បានបកស្រាយឲ្យដឹងថា បាក់តេរី Clostridium tetani ជាបាក់តេរីបង្កជំងឺតេតាណូស ធ្វើឲ្យប៉ះពាល់ដល់ប្រព័ន្ធសរសៃប្រសាទ អាចធ្វើឲ្យកន្ត្រាក់សាច់ដុំ និងបណ្ដាលឲ្យមានការឈឺចាប់ ជាពិសេស សាច់ដុំថ្គាម និងក។
បើម្ដាយមិនបានចាក់វ៉ាក់សាំងតេតាណូស ឬចាក់មិនគ្រប់នៅពេលពពោះ ផលប៉ះពាល់ដល់សុខភាពគឺអាស្រ័យទៅលើចំនួនមេរោគដែលឆ្លងចូលទៅក្នុងខ្លួន។ ជួនកាល ស្ត្រីពពោះធ្វើការមិនប្រយ័ត្ន ធ្វើឲ្យមុតដៃ មុតជើង ជាមួយសម្ភារៈប្រើប្រាស់ផ្សេងៗ បើវត្ថុនោះស្អាត វាមិនសូវបង្កជាហានិភ័យខ្ពស់ទេ តែបើវត្ថុនោះកខ្វក់ (កាំបិតច្រែះ ដែកគោលចាស់ៗ…) អាចបណ្ដាលឲ្យស្ត្រី៖
– ប្រឈមបញ្ហាផ្លូវដង្ហើម
– ពិបាកដកដង្ហើម
– ប្រកាច់ ឬអាចបាត់បង់ជីវិត។ល។
លោកវេជ្ជបណ្ឌិត បន្តថា លើសពីនេះ ជំងឺតេតាណូសក៏អាចផ្ដល់ផលប៉ះពាល់មិនល្អទៅដល់ទារកដែរ ដោយទារកអាចឆ្លងរោគតេតាណូស នៅពេលកាត់ទងសុក ជាហេតុបណ្ដាលឲ្យមានប៉ះពាល់ដល់ផ្លូវដង្ហើម ខួរក្បាល ឬអាចស្លាប់ក៏មាន។ ទោះយ៉ាងណា បញ្ហានេះកើតឡើងចំពោះម្ដាយដែលមិនបានចាក់វ៉ាក់សាំងតេតាណូសប៉ុណ្ណោះ បើម៉ាក់ៗពពោះបានចាក់តាមការណែនាំត្រឹមត្រូវរបស់គ្រូពេទ្យហើយនោះ មិនគួរបារម្ភពេកទេ។
វេជ្ជបណ្ឌិតសម្ភពរូបនេះបញ្ជាក់ថា គ្រប់វ៉ាក់សាំងដែលចាក់ទៅក្នុងខ្លួន ជួយបង្កើតអង់ទីករការពាររាងកាយម្ដាយ និងគភ៌ពីការឆ្លងមេរោគណាមួយ ហើយបើទៅពិនិត្យត្រឹមត្រូវពេលពពោះ គ្រូពេទ្យច្បាស់ជាណែនាំឲ្យចាក់វ៉ាក់សាំងដែលត្រូវចាក់ ព្រោះការចាក់វ៉ាក់សាំងសម្រាប់ស្ត្រីពពោះទាំងអស់សុទ្ធតែមាននៅក្នុងកម្មវិធីជាតិអស់ហើយ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម