អំឡុងពពោះ ស្រីៗប្រមាណ ៩០% តែងមានអាការៈហើមជើង ពិសេសនៅត្រីមាសទី៣។ បញ្ហាចោទនេះជាកង្វល់របស់ស្ត្រីគ្រប់រូប ពិសេសម៉ាក់ៗថ្មីថ្មោងដែលពុំសូវមានបទពិសោធ។ លោកសាស្ត្រាចារ្យវេជ្ជបណ្ឌិត គាន់ អូន ប្រធានផ្នែករោគស្ត្រី នៃមន្ទីរពេទ្យកាល់ម៉ែត នឹងពន្យល់លម្អិតអំពីមូលហេតុ និងវិធីកាត់បន្ថយអាការៈហើមជើងអំឡុងពពោះ។

១- មូលហេតុស្រ្តីមានផ្ទៃពោះហើមជើង

ក្នុងខែដំបូង ម៉ាក់ៗមិនសូវមានបញ្ហាចោទហើមជើងនោះទេ តែពេលកូនក្នុងពោះកាន់តែធំជើងងាយនឹងហើម។ នេះបណ្តាលមកពីទម្ងន់នៃគភ៌ ធ្វើឲ្យមានការសង្កត់ទៅលើជើង បណ្តាលឲ្យហើម ម្យ៉ាងវិញទៀត ការដែលម៉ាក់ៗអង្គុយ ឬដើរច្រើនពេកក៏អាចបង្កឲ្យហើមជើងដែរ។

២- ធ្វើដូចម្តេចបើហើមជើង?

លោកវេជ្ជបណ្ឌិតបានលើកទឹកចិត្តឲ្យស្រីៗមានផ្ទៃពោះសម្រាកឲ្យបានច្រើន មិនត្រូវធ្វើការធ្ងន់ៗ ហើយត្រូវគេងផ្អៀងមកខាងឆ្វេង មិនត្រូវអង្គុយ ឬឈរយូរពេកទេ ត្រូវឧស្សាហ៍ងើបដើរឲ្យបានច្រើន នោះអាការៈហើមជើងក៏មិនសូវខ្លាំងប៉ុន្មានដែរ។

ពពោះហើមជើងមកពីអ្វី?

៣- ហើមឡើងខ្លាំងអំឡុងពពោះគ្រោះថ្នាក់ទេ?

បើម៉ាក់ៗហើមជើងតិចតួច ឬហើមជើងតែមួយមុខ មិនមានអ្វីគួរឲ្យបារម្ភនោះទេ គ្រាន់ធ្វើតាមការណែនាំខាងលើប៉ុណ្ណោះ។ ប៉ុន្តែក្នុងករណីម៉ាក់ៗហើមជើង ហើយមានជំងឺទឹកនោមប្រៃ (លើសជាតិសាច់) និងលើសឈាមទៀតនោះអាចងាយនឹងបង្កឲ្យមានជំងឺបម្រុងក្រឡាភ្លើង និងពេលខ្លះវិវត្តទៅជាជំងឺក្រឡាភ្លើង ដែលអាចឲ្យស្រី្តប្រឈមនឹងគ្រោះថ្នាក់កាន់តែខ្លាំង។ ដូច្នេះត្រូវតែប្រយ័ត្នប្រយែងឲ្យមែនទែន ឆាប់ទៅពិគ្រោះជាមួយគ្រូពេទ្យ។

អត្ថបទពាក់ព័ន្ធ៖

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ស្រីៗ​ពពោះ ឧស្សាហ៍​ហើម​ជើង មក​ពី​អ្វី? គ្រោះ​ថ្នាក់​ទេ?

ស្រីៗពពោះ ឧស្សាហ៍ហើមជើង មកពីអ្វី? គ្រោះថ្នាក់ទេ?