ជាទូទៅស្រីៗពពោះពេទ្យបានកំណត់យក ៤០ សប្តាហ៍ក្រោយការបាត់រដូវជាថ្ងៃសម្រាល។ ចុះក្នុងករណីម៉ាក់ៗមួយចំនួនកូនចាស់ខែ លើសពី ១ សប្តាហ៍ហើយនៅតែមិនមានសញ្ញាឈឺពោះទៀត តើអាចនឹងមានបញ្ហាទេ?
តាមការបកស្រាយរបស់លោកស្រី អួង លីដា នាយសាលនៅផ្នែកបន្ទប់សម្រាល នៃមជ្ឈមណ្ឌលជាតិគាំពារមាតា និងទារក ករណីដែលស្រីៗពពោះដល់ថ្ងៃកំណត់សម្រាលលើសពី ៤០ សប្តាហ៍ហើយពុំមានឈឺពោះ ឬបែកទឹកភ្លោះទេ ត្រូវតែមកជួបគ្រូពេទ្យដើម្បីពិនិត្យអេកូម្តងទៀត ដើម្បីតាមដានបរិមាណទឹកភ្លោះ តើនៅគ្រប់គ្រាន់អត់? សុខភាពកូនយ៉ាងម៉េចដែរ? បើលទ្ធផលទាំង២នេះមិនចោទជាបញ្ហាទេនោះ គ្រូពេទ្យនឹងរង់ចាំមើលយ៉ាងយូរ ១ សប្តាហ៍ទៀត។
តែប្រសិនបើរយៈពេលរង់ចាំ ១ សប្តាហ៍នេះ ម៉ាក់ៗនៅតែគ្មានសញ្ញាឈឺពោះទេ ត្រូវប្រញាប់មកជួបគ្រូពេទ្យ ព្រោះបើបណ្តោយឲ្យកូនចាស់ខែជាងនេះ កូនកាន់តែធំ ទឹកភ្លោះរីងទៅជាខាប់ ធ្វើឲ្យកូនពិបាកដកដង្ហើម-ធ្វើចលនា ឯការបញ្ជូនអុកស៊ីសែនពីម្តាយទៅកូនកាន់តែតិច កូនអាចស្លាប់ក្នុងពោះ។
“ចាប់ពីគភ៌អាយុ ៣៨-៤០ សប្តាហ៍ ទឹកភ្លោះចាប់ផ្តើមរីងហើយ នៅពេលទឹកភ្លោះនៅសល់ប្រមាណជា ៨០០ មិល្លីលីត្រ ស្រីៗនឹងចាប់ផ្តើមឈឺពោះ ក្នុងករណីកូនចាស់ខែ តែម៉ាក់ៗអត់ឈឺពោះអត្រាគ្រោះថ្នាក់ខ្លាំងណាស់ តម្រូវឲ្យតាមដានជាមួយគ្រូពេទ្យ’។
អត្ថបទពាក់ព័ន្ធ៖
- ម៉ាក់ៗធ្វើបាន៥ចំណុចនេះ អាចកាត់បន្ថយការឈឺចាប់ពេលសម្រាលកូនបានច្រើន
- មានបញ្ហាអីខ្លះ ម៉ាក់ៗត្រូវតែសម្រាលកូនដោយវះកាត់?
លោកស្រីថា យើងអាចទុកកូនក្នុងពោះត្រឹម ៤១ សប្តាហ៍ប៉ុណ្ណោះ បើមិនឈឺពោះទេ គ្រូពេទ្យនឹងរកវិធីជួយសង្គ្រោះម្តាយ និងកូន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
