ចាស់ៗចំណាំនិយាយថា ស្រីៗដែលញ៉ាំលៀស ខ្ចៅ ខ្យង ឬគ្រុំអំឡុងពពោះ នោះពេលកូនកើតមកច្បាស់ជាហៀរទឹកមាត់ ដូចខ្ចៅខ្យងដែរហើយ ដូច្នេះហើយគ្នាយើងមួយចំនួនទោះជាឃ្លានយ៉ាងណាក៏មិនហ៊ានញ៉ាំដែរ។ តើពិតជាអ៊ីចឹងមែនឬ?
ការដែលកូនកើតមកហៀរទឹកមាត់មិនឈប់នោះ មិនមែនមកពីការញ៉ាំខ្ចៅ ខ្យង លៀស នោះទេ នេះបើតាមបកស្រាយរបស់លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ។
លោកវេជ្ជបណ្ឌិតថា ករណីដែលក្មេងមួយចំនួនកើតមកមានហៀរទឹកមាត់មិនឈប់នោះអាចមកពី ក្មេងមានអណ្តាតធំ មានការបង្ករោគនៅក្រពេញទឹកមាត់ រលាកបំពង់ក ច្រាលទឹកអាសុីដក្រពះ ឬមានបញ្ហាប្រព័ន្ធសរសៃប្រសាទជាដើម។
អត្ថបទពាក់ព័ន្ធ៖
- បម្រាមចំពោះស្រីៗមានផ្ទៃពោះ ម៉ាក់ៗត្រូវធ្វើឲ្យបាន
- កុំចូលចិត្តញ៉ាំលៀស ខ្ចៅ ខ្យង ពេក ព្រោះអាចឆ្លងសត្វល្អិតទៅក្នុងពោះវៀន
ទោះជាការញ៉ាំពពួកសត្វអត់មានឈាមទាំងនោះមិនធ្វើឲ្យកូនកើតមានហៀរទឹកមាត់ក៏ដោយ ក៏ម៉ាក់ៗមិនត្រូវញ៉ាំដែរ។ លោកវេជ្ជបណ្ឌិតថា សត្វទាំងនោះមិនសម្បូរជីវជាតិ ឬប្រូតេអ៊ីនទេ វារស់នៅក្នុងទឹកកខ្វក់ សំបកមានជាប់ដី ឬស្លែខ្មៅៗ និងសត្វល្អិតមកជាមួយ កាលយើងលាងមិនស្អាត ឬចម្អិនមិនឆ្អិនល្អទៀត ធ្វើឲ្យឆ្លងព្រូន អៀន តេនញ៉ា ញ៉ាំទៅម៉ាក់ៗអាចឈឺពោះ រាករូស ឬកើតជំងឺផ្សេងទៀត ប៉ះពាល់ដល់កូនក្នុងផ្ទៃ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
