ទឹកភ្លោះ ជាវដ្តជីវិតរបស់កូន វាកើតឡើងពីទឹករងៃ និងឈាមរបស់ម្តាយដែលជ្រាបចូលតាមរយៈសុក តាំងពីសប្តាហ៍ដំបូងនៃការមានគភ៌។ ទារកក្នុងផ្ទៃត្រូវបានការពារដោយថង់ទឹកភ្លោះ ហើយគេវាស់បរិមាណទឹកភ្លោះគិតជាសង់ទីម៉ែត្រ ដែលវានឹងពង្រីកមាឌបន្តិចម្តងៗរហូតដល់កៀកថ្ងៃសម្រាល។
បើតាមការរៀបរាប់របស់ប្រធានផ្នែករោគស្ត្រី នៃមន្ទីរពេទ្យកាល់ម៉ែត លោកវេជ្ជបណ្ឌិត គាន់ អូន ពេលពពោះស្រីៗមួយចំនួនស្រាប់តែមានទឹកភ្លោះតិច ឬក៏ច្រើនពេក សុទ្ធតែមានបញ្ហា នេះក៏ដោយសារតែកូនលូតលាស់មិនប្រក្រតី សុកម្តាយមានបញ្ហា និងឥរិយាបថរបស់ម្តាយដែលញ៉ាំអាហារមិនគ្រប់គ្រាន់ ឬគ្មានជីវជាតិ។
អត្ថបទពាក់ព័ន្ធ៖ បែកទឹកភ្លោះមុនឈឺពោះសម្រាល មកពីអ្វី? គ្រោះថ្នាក់ទេ?
ក្នុងករណីដែលស្រីៗពពោះអត់មាន ឬមានទឹកភ្លោះតិចតួចអំឡុង ៣ ខែដំបូង នោះ លោកវេជ្ជបណ្ឌិត គាន់ អូន ថា កូនលូតលាស់ខុសប្រក្រតី កូនក្នុងពោះគ្មានតម្រងនោម ឬគ្មានក្រលៀន មិនអាចនោមបាននោះទេ។
ចំណែកឯទឹកភ្លោះច្រើនពេក មានន័យថាកូនក្នុងពោះមិនបានផឹកទឹកភ្លោះនោះទេ ធ្វើឲ្យចាល់បរិមាណទឹកភ្លោះ ពោះម៉ាក់ៗធំខុសធម្មតា កូនសម្រាលមុនកំណត់ កូនអត់មានក្រពះ មានបំពង់រំលាយអាហារ ឬស្ទះពោះវៀន។
ការពិនិត្យអេកូរៀងរាល់ខែ គ្រូពេទ្យនឹងវាស់បរិមាណទឹកភ្លោះ តើមានបញ្ហាឬអត់? ក្នុងករណីដែលបរិមាណទឹកភ្លោះមានពី ១០-១៥ សង់ទីម៉ែត្រ នោះមិនមានបញ្ហាទេ។ កៀកដល់ថ្ងៃសម្រាលទឹកភ្លោះនឹងអស់បន្តិចម្តងៗ ដែលនៅសល់ប្រហែល ៨-៩ សង់ទីម៉ែត្រ ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
