ជំងឺរាករូស ជាជំងឺទូទៅមួយ អាចកើតលើមនុស្សគ្រប់វ័យ មិនរើសពេល ក៏មិនចម្លែកទេ បើកើតស្រីៗកំពុងពពោះ ព្រោះពេលខ្លះអាចមកពីការផ្លាស់ប្ដូរអ័រម៉ូន និងរាងកាយ ពេលខ្លះអាចមកពីការឆ្លងមេរោគ ឬពោះវៀនដំណើរការខុសប្រក្រតី។ ចុះបើរាករូស អំឡុងពេលពពោះ គួរឲ្យបារម្ភអត់ តើត្រូវធ្វើម៉េច? ចង់ដឹង អានអត្ថបទ “Hello គ្រូពេទ្យ’ ដឹងថា។

១- រាកដោយសារផ្លាស់ប្ដូរអ័រម៉ូន

នៅពេលពពោះ អ័រម៉ូន Prostaglandin ដូចជា Oxytocin កើនឡើង ដើម្បីជួយភ្ញោចការកន្ត្រាក់ក្នុងស្បូន ទន្ទឹមនឹងនោះ ក៏បង្កើនចលនាប្រព័ន្ធរំលាយអាហារដែរ។ បើសិនលាមកឆ្លងកាត់តាមពោះវៀនធំលឿនពេក នឹងបណ្ដាលទៅជារាក។

២- រាកដោយសារមេរោគក្នុងពោះវៀន

មេរោគក្នុងពោះវៀន បង្កឡើងដោយពពួកសរីរាង្គតូចល្អិត ដូចជា ពពួកបាក់តេរី Escherichia, Coli Campylobacter, Salmonella ឬ Shigella Genera ក៏ដូចជាពពួកវីរុស និងប៉ារ៉ាស៊ីត Giardia lamblia Cryptosporidium enteritis ជាដើម។ ពួកវាចម្លងចូលក្នុងខ្លួនយើង តាមរយៈការញុាំចំណីអាហារ ឬទឹកមិនស្អាត។ ស្រីពពោះមានផ្ទុកមេរោគទាំងនេះ តែងមានរោគសញ្ញា ដូចជា បត់ជើងចេញឈាម ក្អួតចង្អោរ គ្រុនក្ដៅ ឬវិលមុខធេងធោង។

អត្ថបទពាក់ព័ន្ធ៖

៣- រាកដោយសារពោះវៀនដំណើរការខុសប្រក្រតី

ជំងឺរាករ៉ាំរ៉ៃ អាចបង្កឡើងដោយសារជំងឺក្រពះពោះវៀនធ្ងន់ធ្ងរ ដូចជា ជំងឺរលាកពោះវៀន ដំបៅពោះវៀនធំ ឬជំងឺហើមពោះ ហើយវាមានរោគសញ្ញា ដូចជា ចុករមួលពោះ ហើម ឬឆ្អល់ពោះ ស្រកទម្ងន់ ហេវហត់ អស់កម្លាំង ក្អួតចង្អោរ មានបញ្ហាស្បែក ឬសន្លាក់ និងស្លេកស្លាំង។

៤- រាកដោយសារកត្តាផ្សេងៗ

ក្រៅពីកត្តាធំៗខាងលើ ស្រីៗកំពុងពពោះ អាចមានអាការៈរាករូសដោយសារបញ្ហាមួយចំនួនទៀតដូចជា៖

– ប្រតិកម្មអាហារ

– ការផ្លាស់ប្ដូររបបអាហារ

– តានតឹង តប់ប្រមល់

– ការប្រើប្រាស់ថ្នាំមួយចំនួន

– ញុាំអាហារមានជាតិស្ករខ្ពស់ និងផឹកគ្រឿងស្រវឹង។

ជំងឺរាក_ស្ដ្រីពពោះ_Hello_គ្រូពេទ្យ

៥- រាកអំឡុងពេលពពោះត្រូវធ្វើម៉េច?

ជំងឺរាករូស អាចបណ្ដាលឲ្យស្រីៗពពោះ ខ្សោះជាតិទឹក និងខ្វះជីជាតិ អាចប៉ះពាល់សុខភាពទាំងម៉ាក់ៗ និងគភ៌។ សូមប្រញាប់ជួបពិគ្រោះជាមួយគ្រូពេទ្យ បើសិនមានធ្វើទុកក្នុងខ្លួនដូចខាងក្រោម៖

– បត់ជើងមកមានឈាម ឬសំបោរ

– រាកយូរលើសពី ៤៨ម៉ោង

– រាកចាប់ពី ៦ដង ក្នុងមួយថ្ងៃ

– គ្រុនក្ដៅលើសពី ៣៩អង្សារសេ

– ឧស្សាហ៍ក្អួត

– ចុកពោះខ្លាំង

– ស្ងួតមាត់ ស្រេកទឹកមិនបាត់ បត់ជើងតូចតិច និងមានពណ៌ក្រមៅ។

ថ្វីត្បិតអាការៈរាក ជារឿងសាមញ្ញ តែងស្រីៗកំពុងពពោះ មិនត្រូវធ្វេសប្រហែសទេ គួរពិភាក្សាជាមួយគ្រូពេទ្យជំនាញ បើមានរោគសញ្ញាសង្ស័យគ្រោះថ្នាក់ដូចបានរៀបរាប់ខាងលើ មិនត្រូវផ្សំថ្នាំ ឬលេបថ្នាំដែលគ្មានវេជ្ជបញ្ជាត្រឹមត្រូវនោះទេ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ឧស្សាហ៍រាកពេលពពោះ មានមូលហេតុអីខ្លះ?