ពេលពពោះ រាងកាយរបស់មនុស្សស្រីប្រឈមខ្ពស់នឹងការខ្វះគ្រាប់ឈាមក្រហម ដោយសារតែខ្វះជាតិដែក។ ហេតុអ្វីពេលពពោះ ស្រីៗមានបញ្ហាខ្វះគ្រាប់ឈាមក្រហម? ខ្វះគ្រាប់ឈាមក្រហមប៉ះពាល់អីខ្លះ? ធ្វើម៉េចកុំឲ្យខ្វះគ្រាប់ឈាមក្រហមពេលពពោះ?
កង្វះគ្រាប់ឈាមក្រហមអំឡុងពពោះ បណ្តាលមកពីកង្វះជាតិដែក ដែលរាងកាយរបស់មនុស្សស្រីយើងប្រើជាតិដែកដើម្បីផលិតអេម៉ូក្លូប៊ីន (ប្រូតេអ៊ីននៅក្នុងកោសិកាឈាម)។ អេម៉ូក្លូប៊ីនមានតួនាទីដឹកជញ្ជូនអុកស៊ីសែនទៅចិញ្ចឹមជាលិកា និងកោសិកានានាពេញសារពាង្គកាយយើង។ នេះបើតាមការពន្យល់របស់លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ។
លោកវេជ្ជបណ្ឌិតថា ពេលមានផ្ទៃពោះ ស្រីៗត្រូវការជាតិដែកទ្វេដង ដើម្បីជួយដល់ទារកក្នុងការផលិតគ្រាប់ឈាមក្រហម។ កង្វះជាតិដែកពេលពពោះធ្វើឲ្យម៉ាក់ៗទៅជាស្លេកស្លាំង ឯសុខភាពម្តាយ និងកូនក្នុងពោះក៏ចុះខ្សោយ។
១- ខ្វះគ្រាប់ឈាមក្រហមប៉ះពាល់អីខ្លះ?
ស្រីៗដែលមានកូនច្រើនហើយញឹក ស្រីៗដែលជួបអាការៈចាញ់កូនធ្ងន់ធ្ងរ ស្រីៗដែលមានកូនភ្លោះ ស្រីៗដែលមានប្រវត្តិហូរឈាមរដូវច្រើនមុនពេលមានផ្ទៃពោះ និងស្រីៗដែលញ៉ាំជាតិដែកមិនគ្រប់គ្រាន់ សុទ្ធតែប្រឈមនឹងជំងឺខ្វះគ្រាប់ឈាមក្រហមពេលពពោះ។ ខ្វះគ្រប់ឈាមក្រហម ធ្វើឲ្យម៉ាក់ៗវិលមុខ ហត់ អស់កម្លាំង ខ្សោយ ស្លេកស្លាំងខុសធម្មតា សុខភាពចុះខ្សោយ ឯកូនវិញក៏រងផលប៉ះពាល់ដែរ អាចឲ្យកូនកើតមកមិនគ្រប់គីឡូ កើតមិនគ្រប់ខែ ឬកូនកើតមកមិនឆ្លាត។
អត្ថបទពាក់ព័ន្ធ៖
- ថ្នាំជាតិដែកសំខាន់ចំពោះម៉ាក់ៗ និងបេប៊ី វីតាមីនមិនអាចជំនួសបានទេ
- នេះជាពពួកវីតាមីនស្រីៗពពោះ ត្រូវការចាំបាច់បំផុត
២- ធ្វើដូចម្តេចកុំឲ្យខ្វះគ្រាប់ឈាមក្រហម?
ដើម្បីបង្ការកុំឲ្យខ្វះគ្រាប់ឈាមក្រហមពេលពពោះ ក្រសួងសុខាភិបាលបានតម្រូវឲ្យស្រីៗលេបថ្នាំជាតិដែកចំនួន ៩០ គ្រាប់ ចាប់តាំងពីដឹងថាមានផ្ទៃពោះដំបូង និង ៤២ គ្រាប់ ក្រោយពេលសម្រាល ដែលថ្នាំនេះផ្តល់ឲ្យដោយឥតគិតថ្លៃនៅតាមមណ្ឌលសុខភាព និងមន្ទីរពេទ្យរដ្ឋ។
ក្រៅពីញ៉ាំថ្នាំជាតិដែក ស្រីៗមានផ្ទៃពោះក៏អាចបន្ថែមជាតិដែកនៅក្នុងរបបអាហារប្រចាំថ្ងៃបានផងដែរ ដូចជា ពពួកសាច់ក្រហមគ្មានខ្លាញ់ សាច់មាន់ ត្រី គ្រប់ធញ្ញជាតិ សណ្តែក និងបន្លែបៃតង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
