ចម្ងល់ដែលម៉ាក់ៗថ្មីថ្មោងចង់ដឹងនោះ តើពពោះប៉ុន្មានសប្តាហ៍ទើបគេហៅ គ្រប់ខែ ចុះកូនកើតអំឡុងប៉ុន្មានសប្តាហ៍ ហៅថាកើតមិនគ្រប់ខែ ចំណែកកូនចាស់ខែវិញប៉ុន្មានសប្តាហ៍?

Hello គ្រូពេទ្យ នឹងលម្អិតអំពីករណីកូនកើតមុនខែ កូនគ្រប់ខែ និងកូនចាស់ខែ ជាមួយអ្នកគ្រូពេទ្យឆ្មប ដែលជានាយសាលនៅផ្នែកបន្ទប់សម្រាល នៃមជ្ឈមណ្ឌលជាតិគាំពារមាតា និងទារក លោកស្រី អ៊ួង លីដា។

១- កូនគ្រប់ខែ

ក្បូនពេទ្យរាប់ពីថ្ងៃទី១ នៃរដូវដែលមកខែចុងក្រោយគេ ជាថ្ងៃមានគភ៌ ដោយកំណត់រយៈពេល ៤០ សប្តាហ៍ ជាថ្ងៃគ្រប់ខែសម្រាលកូន ដែលត្រូវជា ៩ខែ១០ថ្ងៃ។ តែទោះជាកំណត់បែបនេះក្តី បើកូនសម្រាលក្រោយ ៣៧ សប្តាហ៍ទៅ ក៏ពេទ្យចាត់ទុកថា គ្រប់ខែដែរ។

ថ្ងៃទី ១ នៃរដូវចុងក្រោយៈ

អត្ថបទពាក់ព័ន្ធ៖ សញ្ញាសំខាន់ៗពេលពពោះ និងសម្រាលកូន ម៉ាក់ៗថ្មីថ្មោងត្រូវដឹង

២- កូនកើតមុនខែ

កូនកើតមុនខែ ឬការសម្រាលកូនមុនកំណត់ សំដៅទៅលើការសម្រាលកូននៅមុនរយៈពេល ៣៧ សប្តាហ៍នៃការពពោះ។ ម៉ាក់ៗដែលសម្រាលកូនមុនខែ អាចគ្រោះថ្នាក់ទាំងម្តាយទាំងកូន ដោយកូនអាចស្លាប់ ឬកូនកើតមកខ្សោយ មានបញ្ហាប្រព័ន្ធដង្ហើម ប្រព័ន្ធរំលាយ អាហារ ងាយឆ្លងមេរោគ ស្លេកស្លាំង ខាន់លឿង ខួរក្បាលមិនសូវលូតលាស់ ឯម្តាយវិញអាចប្រឈមនឹងការសម្រាលកូនមិនគ្រប់ខែពេលពពោះលើកក្រោយៗទៀត និងមានបញ្ហាផ្លូវចិត្ត។

អត្ថបទពាក់ព័ន្ធ៖ ស្រីៗគ្នាយើងកំពុងពពោះប្រយ័ត្នមែនទែន រឿងកូនកើតមិនគ្រប់ខែ

សម្រាលកូន

៣- កូនចាស់ខែ

ការពពោះ ឬសម្រាលកូនលើសពីរយៈពេល ៤០ សប្តាហ៍ទៅ នោះគេហៅថា កូនចាស់ខែហើយ។ គ្រូពេទ្យតម្រូវឲ្យម៉ាក់ៗទុកកូនក្នុងពោះយ៉ាងយូរបំផុតត្រឹម ៤១សប្តាហ៍៣ថ្ងៃប៉ុណ្ណោះ ទោះជាមិនឈឺពោះ ឬបែកទឹកភ្លោះក៏ដោយ។ ចំពោះមូលហេតុដែលគ្រូពេទ្យណែនាំឲ្យពពោះយ៉ាងយូរត្រឹម ៤១សប្តាហ៍៣ថ្ងៃនោះ ដោយសារ កូនចាស់ខែកាន់តែធំ ឯទឹកភ្លោះក៏រីង ធ្វើឲ្យកូនពិបាកធ្វើចលនា និងដកដង្ហើម ចំណែកការបញ្ជូនអុកស៊ីសែនពីម្តាយទៅកូនកាន់តែតិច កូនខ្សោយ ក្នុងករណីម៉ាក់ៗបណ្តែតបណ្តោយទុកយូរទៀត អាចមានគ្រោះថ្នាក់កូនស្លាប់ក្នុងពោះ។

អត្ថបទពាក់ព័ន្ធ៖ កូនចាស់ខែ ម៉ាក់ៗអាចទុកកូនក្នុងពោះ យ៉ាងយូរបំផុតប៉ុន្មាន?

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

លម្អិតពីករណីកូនកើតមុនខែ កូនគ្រប់ខែ និងចាស់ខែ ម៉ាក់ៗថ្មីថ្មោងត្រូវដឹង