ពេលមានគភ៌ ម៉ាក់ៗភាគច្រើនតែងមានអារម្មណ៍ថាក្ដៅៗក្នុងខ្លួនជាប្រចាំ ដែលនេះគឺជាការព្រួយបារម្ភមួយរបស់ស្ដ្រី ព្រោះខ្លាចកើតមានបញ្ហាសុខភាពមិនប្រក្រតីផ្សេងៗ។ ទាក់ទិននឹងបញ្ហានេះដែរ លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅបានឲ្យដឹងថា នោះជារឿងទូទៅរបស់ស្រីៗមានផ្ទៃពោះ។
លោកបានបន្តទៀតថា មូលហេតុដែលធ្វើឲ្យស្រីៗមានផ្ទៃពោះចេះតែមានអារម្មណ៍ថាក្ដៅខ្លួន ព្រោះបម្រែបម្រួលអ័រម៉ូន ហើយមួយវិញទៀតដោយសារការធ្វើមេតាបូលីសមានការកើនឡើងខ្លាំងអំឡុងពេលមានផ្ទៃពោះនេះ ទើបធ្វើឲ្យកម្ដៅក្នុងខ្លួនចេះតែកើនឡើង។
វេជ្ជបណ្ឌិតរូបនេះក៏បញ្ជាក់ទៀតដែរថា ម្យ៉ាងទៀតដោយសារពពួកអ័រម៉ូនអឺស្រ្តូហ្សែនធ្លាក់ចុះអំឡុងពេលនេះ បូករួមនឹងលំហូរឈាមទៅកាន់ស្បែកមានការកើនឡើង ពោលគឺស្បែកសម្បូរទៅដោយសរសៃឈាមតែម្ដងទើបប៉ះទៅចេះតែក្ដៅរហូត។
អត្ថបទពាក់ព័ន្ធ៖ ពេលពពោះ ស្រីៗច្រើនតែតូចចិត្ត យំដោយសាររឿងទាំងនេះ
នៅពេលមានអាការៈបែបនេះជាប្រចាំ អាចធ្វើឲ្យស្រីៗពពោះអស់កម្លាំង និងខ្វះជាតិទឹក នាំឲ្យមិនស្រួលក្នុងខ្លួន។ ដូចនេះដើម្បីដោះស្រាយបញ្ហានេះ គួរតែឧស្សាហ៍ផឹកទឹកឲ្យបានញឹកញាប់ ញ៉ាំផ្លែឈើសម្បូរជាតិទឹក ងូតទឹកត្រជាក់ៗ ដើម្បីឲ្យអារម្មណ៍ស្រស់ថ្លាឡើងវិញ និងចៀសវាងអាហារដែលនាំឲ្យកើនកម្តៅក្នុងខ្លួន ដូចជាអាហារហឹរ មីជាដើម។
មួយវិញទៀតគួរគប្បីស្ថិតនៅកន្លែងដែលមានសីតុណ្ហភាពត្រជាក់ល្មម មិនក្ដៅពេក ហើយបើមិនចាំបាច់កុំចេញទៅខាងក្រៅ បើអាកាសធាតុកំពុងឡើងកម្ដៅខ្លាំង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
