ពេលពពោះមនុស្សស្រីត្រូវជួបបញ្ហា និងភាពឈឺចុកចាប់ច្រើនយ៉ាង ក្នុងនោះដែរករណីឈឺបង្ហួរនោម គឺម៉ាក់ៗភាគច្រើនតែងជួប។ មានរឿងបែបនេះកើតឡើង យើងប្រាកដជាចង់ដឹងថាមកពីមូលហេតុ និងវិធីព្យាបាលដែលអាចឲ្យស្ថានភាពប្រសើរឡើងវិញ។
ដើម្បីឲ្យអស់ចម្ងល់ លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រី នៃមន្ទីរពេទ្យបង្អែកមិត្តភាពកម្ពុជា-ចិន សែនសុខ បានបកស្រាយថា អាការៈឈឺត្រង់តំបន់បង្ហួរនោមរបស់ស្ត្រីមានផ្ទៃពោះ អាចបណា្តលមកពីការរលាកបង្ហួរនោមដោយមានការឆ្លងរោគតាមផ្លូវទឹកនោម។ អ្នកខ្លះមានស្ថានភាពធ្ងន់ធ្ងររហូតគ្រាន់តែដើរ ឬដេកក៏ឈឺដែរ។
អត្ថបទពាក់ព័ន្ធ៖ ពេលពពោះម៉ាក់ៗញ៉ាំហឹរ កូនកើតមកឈឺភ្នែក ពិតអត់?
ក្រៅពីមានការឆ្លងមេរោគ អាចមកពីហេតុផលមួយទៀត គឺការសង្កត់ទៅលើប្លោកនោមពេលស្បូនរីកធំ ហើយទូទៅស្ត្រីមានហានិភ័យជំងឺរលាកបង្ហួរទឹកនោមច្រើនជាងបុរស ដោយសារតែ បង្ហួរនោមរបស់ស្ត្រីខ្លីជាងបង្ហួរនោមបុរសនិងមួយទៀតទាក់ទងនិងការធ្វើអនាម័យរបស់ស្រី្តនៅពេលបន្ទោរបង់។
ចំពោះរោគសញ្ញាដែលបញ្ជាក់ថារលាកបង្ហួរទឹកនោម មានដូចជា ឈឺស្ទុំៗនៅផ្នែកខាងក្រោមពោះ ឬចំផ្នែកកណ្ដាលពោះ ក្រហាយនៅពេលកំពុងនោម នោមញឹកខុសធម្មតា ទឹកនោមមានខ្ទុះ ឈាម ឬ ពណ៌ស្រអាប់។
ជំងឺនេះពេលខ្លះអាចជាខ្លួនឯងដោយមិនមានការព្យាបាល ដោយគ្រាន់តែផឹកទឹកឲ្យច្រើន តែបើស្ថានភាពធ្ងន់ធ្ងរមានក្ដៅខ្លួន ឈឺចុកចាប់ខ្លាំងផ្នែកចង្កេះមួយចំហៀង នោមមានឈាម ស្ទះនោម ឬនោមអត់ចេញ គួរតែទៅជួបជាមួយគ្រូពេទ្យ ហើយគ្រូពេទ្យនឹងផ្ដល់តំបូលន្មានការអប់រំផ្សេងៗឬក៏គ្រូពេទ្យនឹងចេញវេជ្ជបញ្ជាឲ្យប្រើប្រាស់ប្រភេទថ្នាំផ្សះទៅតាមប្រភេទជំងឺនិងរោគសញ្ញា។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
