មហារីកសុដន់ប៉ះពាល់អីខ្លះលើផែនការមាន បេប៊ី?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
“Hello គ្រូពេទ្យ” ធ្លាប់បញ្ជាក់ប្រាប់ស្រីៗគ្នាយើងរួចហើយពាក់ព័ន្ធនឹងមហារីកសុដន់ ព្រមទាំងមូលហេតុបង្កឲ្យមានជំងឺកាចសាហាវនេះ។ ក្រោយព្យាបាលជា តើវាជះឥទ្ធិពលអ្វីខ្លះចំពោះសុខភាព និងការបង្កកំណើតរបស់យើង?
ខាងក្រោមនេះ ជាចំណុចមួយចំនួនពាក់ព័ន្ធមហារីកសុដន់ និងការពពោះសម្រាប់គ្នាយើងមានផែនការចង់បានកូន។
១- ព្យាបាលពនិងការមានផ្ទៃពោះ
ព្យាបាលមហារីកសុដន់ មានច្រើនប្រភេទ ដូចជា ព្យាបាលដោយគីមី វាអាចមានឥទ្ធិពលអាក្រក់ទៅលើអូវែបង្កឲ្យអសមត្ថភាពក្នុងការបញ្ចេញមេជីវិត។ ទោះជាយ៉ាងនេះក្តី គ្នាយើងខ្លះនៅតែអាចមានលទ្ធភាពមានអាអូនគួរឲ្យស្រលាញ់នឹងគេ បន្ទាប់ពីព្យាបាលដោយគីមី។
២- ពពោះអាចធ្វើឲ្យមហារីករើឡើងវិញទេ?
បើតាមវេជ្ជសាស្ត្រ មហារីកសុដន់មានទំនាក់ទំនងជាមួយអត្រាអ័រម៉ូន អឺស្ត្រូសែន។ អ៊ីចឹងហើយទើបគ្នាយើងមួយចំនួនយល់ថា ពេលមានផ្ទៃពោះ មហារីកអាចលាប់សារជាថ្មី។ មិនបាច់បារម្ភទេព្រោះការស្រាវជ្រាវរកឃើញថា ករណីលាប់មហារីកមិនទាក់ទងនឹងការមានកូនទេ ដូចគ្នានឹងការបំបៅដោះកូនអ៊ីចឹងដែរ គ្មានអ្វីគួរឲ្យបារម្ភទេ។
៣- ត្រូវចាំយូរប៉ុនណាទើបអាចយកកូនបាន?
មិនទាន់មានការបំភ្លឺជាក់លាក់ណាមួយក៏ពិតមែន ប៉ុន្តែគ្រូពេទ្យតែងណែនាំឲ្យគ្នាយើងរង់ចាំយ៉ាងហោចណាស់ ២ ឆ្នាំ មុនសម្រេចចិត្តយកកូន ព្រោះថាគ្នាយើងខ្លះអាចលាប់ឡើងវិញ អំឡុងពេលនេះ ទោះជាការព្យាបាលចុងក្រោយជោគជ័យក៏ដោយ។ ម្យ៉ាងទៀត គឺអាស្រ័យលើកត្តាផ្សេងៗ ដូចជា អាយុ ប្រភេទមហារីក និងហានិភ័យអាចកើតមានដោយចៃដន្យ។
៤- ម៉ាក់ៗកើតមហារីកសុដន់កូនប៉ះពាល់ដែរអត់?
ករណីនេះនៅតែមិនមានការអះអាងច្បាស់លាស់ អាចបង្កគ្រោះថ្នាក់ដល់អាអូនក្នុងផ្ទៃទេ។ ផ្ទុយទៅវិញ បើមានកូនដោយចៃដន្យក្នុងអំឡុងពេលព្យាបាលមហារីក ទើបជាគ្រោះថ្នាក់។ ហេតុនេះ អាស្រ័យលើស្ថានភាពយើងជាក់ស្ដែង សូមប្រឹក្សាយោបល់ជាមួយគ្រូពេទ្យថា តើត្រូវបន្តការព្យាបាលឬយ៉ាងណា?
៥- បំបៅដោះចោទជាបញ្ហាទេ?
ក្រោយព្យាបាលសះស្បើយ យើងនៅតែអាចបំបៅដោះកូនដូចធម្មតា លើកលែងតែយើងទទួលការប្រឈមនឹងការព្យាបាលដោយគីមី និងសារធាតុវិទ្យុសកម្មក្នុងកម្រិតមួយដែលអាចប៉ះពាល់លើការផលិតទឹកដោះប៉ុណ្ណោះ។ បើយើងប្រើថ្នាំគីមីបន្ត ត្រូវសាកសួរគ្រូពេទ្យ ព្រោះថ្នាំខ្លះអាចចូលតាមទឹកដោះ និងបង្កគ្រោះថ្នាក់ដល់កូនបាន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម