ពាក់ព័ន្ធរឿងពន្យារកំណើត “Hello គ្រូពេទ្យ’ ធ្លាប់ប្រាប់ស្រីៗពីវិធីសាស្ត្រជាច្រើន ដើម្បីបង្ការឲ្យកុំមានកូនទាំងមិនទាន់រៀបចំផែនការ។ ដូចដឹងហើយ ការពន្យារកំណើតតាមបែបវេជ្ជសាស្ត្រ ទោះក្នុងរូបភាពណា ទោះតិច ឬច្រើន អាចមានផលរំខាន អ៊ីចឹងហើយ យើងគួរស្វែងយល់ពីវិធីពន្យារកំណើតបែបធម្មជាតិវិញម្តង ដែលគេហៅថា ពន្យារកំណើតតាមប្រតិទិន។
១- អ្វីជាវិធីពន្យារកំណើតតាមប្រតិទិន?
ពន្យារកំណើតតាមប្រតិទិន សំដៅលើវិធីសាស្រ្តពន្យារកំណើតបែបធម្មជាតិ ផ្អែកលើថ្ងៃមករដូវតាមប្រតិទិន គឺត្រូវតាមដានថ្ងៃអាចបង្កកំណើត ដើម្បីការពារកុំឲ្យមានផ្ទៃពោះ។ ស្រីៗ គួរមានទម្លាប់តាមដានវដ្តរដូវរបស់ខ្លួនក្នុងរយៈពេល ៦ ខែម្តង ហើយដើម្បីតាមដានវដ្តនីមួយៗ ត្រូវគិតពីថ្ងៃដំបូងនៃការមករដូវ។ វិធីសាស្រ្តនេះ ជួយឲ្យស្រីៗដឹងពីថ្ងៃអាចមានផ្ទៃពោះ ដើម្បីបញ្ចៀសការរួមភេទចំថ្ងៃទាំងនោះ ខណៈវិធីសាស្រ្ត អាចបែងចែកបានជា ២ ដូចជា៖
– ថ្ងៃស្តង់ដារ (Standard Days)៖ វិធីសាស្រ្តនេះ ប្រើចំពោះស្រីៗគ្នាយើងមានរដូវទៀងទាត់ ចង់ការពារកុំឲ្យមានផ្ទៃពោះ និងជួយឲ្យរដូវនៅតែបន្តទៀងទាត់។ ទោះជាយ៉ាងណា វិធីសាស្រ្តថ្ងៃស្តង់ដារ គួរប្រើដោយប្រុងប្រយ័ត្ន ពិសេសស្រីៗមានវដ្តរដូវមិនទៀងទាត់។
– ចង្វាក់ប្រតិទិន (Calendar Rhythm)៖ ផ្ទុយពីវិធីសាស្រ្តស្តង់ដារ ចង្វាក់ប្រតិទិន គឺជាវិធីមួយសម្រាប់គណនាពីថ្ងៃស្រីៗអាចបង្កកំណើតបាន (ថ្ងៃមេជីវិតញីទុំជ្រុះ) និងថ្ងៃដែលមិនអាចបង្កកំណើតបាន តាមរយៈវដ្តរដូវ។ វិធីសាស្រ្តនេះ ត្រូវបានប្រើលើស្រីៗមានរដូវមិនទៀង ដែលអាចមករដូវរយៈពេលខ្លី ឬយូរជាងធម្មតា។
អត្ថបទពាក់ព័ន្ធ៖
- ត្រូវដឹង មធ្យោបាយពន្យារកំណើតសម័យថ្មី មានច្រើនបែប ឯចំណុចល្អផ្សេងៗគ្នា
- ចង់បានកូន គួររួមភេទពេលណា ទើបល្អ?
២- របៀបប្រើវិធីសាស្ត្រពន្យារកំណើតតាមប្រតិទិន
– ថ្ងៃស្តង់ដារ (Standard Days)៖
- សម្គាល់ថ្ងៃដំបូងនៃការមករដូវ
- ប្រើប្រតិទិនដើម្បីតាមដានវដ្តរដូវ
- ចៀសវាងរួមភេទដោយមិនការពារអំឡុងថ្ងៃទី ៨-១៩ នៃវដ្តរដូវ ឬប្រើវិធីពន្យារកំណើតដើម្បីជំនួសអំឡុងពេលនោះ
- វិធីសាស្រ្តនេះមានប្រសិទ្ធភាពដល់ទៅ ៩៥% ចន្លោះថ្ងៃទី ១-៧ នៃវដ្តរដូវ និងចាប់ពីថ្ងៃទី ២០ មុនរដូវបន្ទាប់មកដល់។
– ចង្វាក់ប្រតិទិន (Standard Days)៖
- ពិនិត្យរយៈពេលវដ្តរដូវនីមួយៗ ឲ្យបាន ៦ខែ នឹងកត់ត្រាពីចំនួនថ្ងៃនៃវដ្តរដូវឲ្យបានត្រឹមត្រូវ (រាប់ចាប់ពីថ្ងៃមករដូវដំបូង ដល់ថ្ងៃមករដូវបន្ទាប់)។
- ចំពោះគ្នាយើងមានវដ្តរដូវខ្លី គួរតែដក ១៨ថ្ងៃ ពីចំនួនថ្ងៃនៃវដ្តរដូវ ដើម្បីគណនាពីថ្ងៃដំបូងនៃវដ្តរដូវ ឧទាហរណ៍ បើយើងមានវដ្តរដូវ ២៦ថ្ងៃ គឺសល់ ៨ថ្ងៃ ហើយរាប់ពីថ្ងៃទី ១ វដ្តរដូវចាប់ផ្តើមធ្លាក់ ថ្ងៃទី ៨ ក៏ជាថ្ងៃដំបូងមេជីវិតញីអាចទុំធ្លាក់ដើម្បីបង្កកំណើត។
- សម្រាប់គ្នាយើងមានពីវដ្តរដូវវែង ដើម្បីគណនា គួរដក ១១ ថ្ងៃ ឧទាហរណ៍ បើវដ្តរដូវមានរយៈពេល ៣២ថ្ងៃ គឺនៅសល់ ២១ថ្ងៃ មានន័យថា រាប់ពីថ្ងៃទី ១ នៃរដូវចាប់ផ្តើមធ្លាក់ ថ្ងៃទី ២១ ជាថ្ងៃចុងក្រោយរបស់មេជីវិតញីទុំធ្លាក់ដើម្បីបង្កកំណើត។
៣- ផលវិបាកពីវិធីពន្យារកំណើតតាមប្រតិទិន
– វិធីសាស្រ្តទាំងនេះគ្មានប្រសិទ្ធភាពទាំងស្រុងទេ ព្រោះមានស្រីៗមួយចំនួន មានវដ្តរដូវមិនទៀងទាត់។
– គ្មានប្រសិទ្ធភាពការពារពីជំងឺកាមរោគ ហេតុនេះ ប្រើស្រោមអនាម័យ តែត្រូវគេណែនាំឲ្យប្រើក្នុងករណីនេះ។
– តាមដានកាលបរិច្ឆេទវដ្តរដូវ អាចជាបញ្ហាខ្លះចំពោះស្រីៗមួយចំនួន។
ក្នុងករណីមានសំណួរ ឬមន្ទិលសង្ស័យជុំវិញបញ្ហាសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Groupមិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
