ការរលូតកូន គឺជាបទពិសោធន៍ដ៏ឈឺចាប់មួយដែលម៉ាក់ៗ ពិបាកនឹងបំភ្លេចបាន។ មានស្រីៗខ្លះព្យាយាមចង់បានកូនម្ដងទៀតភ្លាម ដើម្បីជួយឲ្យអារម្មណ៍ប្រសើរឡើងវិញ ឬអាចរង់ចាំរយៈពេលពីរបីខែ បន្ទាប់ពីយើងអាចធ្វើចិត្តបាន។
តើយើងគួរចាប់ផ្ដើមយកកូននៅពេលណាទើបល្អ?
គ្រូពេទ្យមួយចំនួនណែនាំឲ្យរង់ចាំរហូតដល់យើងមានវដ្ដរដូវឡើងវិញ ដើម្បីងាយស្រួលកំណត់ថ្ងៃ ប្រសិនបើចង់មានផ្ទៃពោះភ្លាមៗ។ ចំណែកឯស្រីៗខ្លះ ត្រូវរង់ចាំមួយរយៈពេលសិន ពីព្រោះតែស្ថានភាពសុខភាពរបស់ខ្លួន។
យ៉ាងណាមិញ យោងតាមការស្រាវជ្រាវបានបង្ហាញថា ការមានគភ៌នៅក្នុងរយៈពេល៦ខែ បន្ទាប់ពីរលូត អាចជាឱកាសល្អបំផុតសម្រាប់ការមានផ្ទៃពោះដែលមានសុខភាពល្អ។ បន្ថែមពីនេះ ការមានគភ៌នៅក្នុងរយៈពេល៦ខែ មានលទ្ធផលនៃការបន្តពូជល្អបំផុត ក៏ដូចជាមានអត្រាផលវិបាកទាបបំផុត នៅពេលមានផ្ទៃពោះបន្ទាប់ផងដែរ។
ពិតណាស់ ការព្យាយាមក្នុងការមានផ្ទៃពោះសារជាថ្មី គឺមិនត្រឹមតែទាមទារឲ្យយើងមានទឹកចិត្តរឹងមាំឡើងវិញនោះទេ រាងកាយរបស់យើងក៏ត្រូវរឹងមាំដូចគ្នា។ ប្រសិនបើយើងរលូតកូននៅពេលដែលចាប់ផ្ដើមមានផ្ទៃពោះ ស្រីៗយើងនឹងបញ្ចេញពងអូវុលភ្លាមនៅក្នុងរយៈពេល២សប្តាហ៍ ក្រោយរលូត។ ប៉ុន្តែ បើរលូតចាប់ពីសប្ដាហ៍ទី២៨ឡើងទៅ វាត្រូវការពេលពីរបីខែដើម្បីឲ្យអ័រម៉ូន និងវដ្ដរដូវត្រលប់មករកសភាពធម្មតាវិញ។
តិចនិកសម្រាប់ការព្យាយាមយកកូនម្ដងទៀត បន្ទាប់ពីរលូត
ដើម្បីបង្កើនឱកាសក្នុងការមានផ្ទៃពោះប្រកបដោយសុខភាពល្អ ស្រីៗយើងគប្បីត្រូវផ្លាស់ប្ដូរបែបបទក្នុងការរស់នៅ មុនពេលដែលយើងព្យាយាមយកកូន។
- បង្កើនការស្រូបយកហ្វូឡេត
- កុំញ៉ាំគ្រឿងស្រវឹង
- ឈប់ជក់បារី
- កាត់បន្ថយការញ៉ាំជាតិកាហ្វេអ៊ីន
- សម្រាកឲ្យបានច្រើន
- ញ៉ាំអាហារដែលមានតុល្យភាព និងសុខភាពល្អ
- ហាត់ប្រាណជាទៀងទាត់
- កាត់បន្ថយកម្រិតស្រ្តេស
តើអ្នកធ្លាប់រលូតកូន អាចរលូតម្ដងទៀតដែរឬទេ?
ទោះបីជាយើងធ្លាប់រលូតកូនរួចមកហើយក្ដី ក៏មិនមានន័យថាយើងត្រូវរលូតកូនម្ដងទៀតដែរ។ ប៉ុន្តែនៅក្នុងករណីដែលមានការរលូតកូនម្ដងទៀត យើងអាចនឹងត្រូវធ្វើតេស្តរកការផ្លាស់ប្តូរហ្សែន MTHFA ដែលប៉ះពាល់ដល់ការប្រើប្រាស់អាស៊ីដហ្វូលិក និងទម្រង់ផ្សេងទៀតនៃអាស៊ីតហ្វូលិកនៅក្នុងរាងកាយ។ បញ្ហានេះអាចបណ្ដាលឲ្យមានការរលូតកូន និងបញ្ហាផ្ទៃពោះដទៃផ្សេងទៀត។
[embed-health-tool-due-date]
