វីតាមីន C យើងដឹងហើយថា គឺជាសារធាតុចិញ្ចឹមសំខាន់ ដែលមានប្រភពមកពីបន្លែ ផ្លែឈើ ហើយវីតាមីននេះ គឺមានសារសំខាន់ខ្លាំងក្នុងការរក្សាប្រព័ន្ធភាពស៊ាំក្នុងរាងកាយយើង។ បន្ថែមពីនោះ យើងដឹងថា វីតាមីន C នៅក្នុងជីវភាពរស់នៅប្រចាំថ្ងៃ គឺវាជួយបង្ការយើងពីការឈឺផ្តាសាយទូទៅ។
ក្រៅតែពីប្រយោជន៍ខាងលើនេះ តាមការលើកឡើងពីគ្រូពេទ្យជំនាញជាច្រើនបានឱ្យដឹងថា វីតាមីន C ក៏មាននាទីសំខាន់ផងដែរក្នុងការជួយជំរុញឱ្យមុខរបួសឆាប់ជាសះស្បើយ ជួយរក្សាឆ្អឹងឱ្យនៅរឹងមាំ និងជំរុញតួនាទីខួរក្បាលឱ្យដំណើរការសកម្មបានប្រសើរ។
អត្ថបទពាក់ព័ន្ធ៖
- វីតាមីន C ជួយកាត់បន្ថយហានិភ័យពីជំងឺផ្សេងៗជាច្រើនមុខ
- មិនសូវចូលចិត្តញ៉ាំបន្លែមែនទេ សាកវិធីនេះវិញក្រែងជួយបានខ្លះ
- វីតាមីន C លាក់កំពូលអត្ថប្រយោជន៍ អាចជួយស្បែកឲ្យស ភ្លឺរលោង
យ៉ាងណាមិញ ក្នុងករណីដែលការទទួលនូវវីតាមីនប្រភេទនេះច្រើនទៅក្នុងរាងកាយ ក៏នឹងបង្កផលវិបាកផងដែរ ដែលផលវិបាកទាំងនោះ គឺប៉ះពាល់ទៅលើដំណើរប្រព័ន្ធរំលាយអាហារ និងតម្រងនោម។
វេជ្ជបណ្ឌិតជាច្រើនបានពន្យល់ថា វីតាមីន C ជាប្រភេទវីតាមីនអាចរលាយបាននៅក្នុងទឹក ដូចនេះវាពុំអាចស្តុកទុកក្នុងរាងកាយបានទេ ដោយវាធ្វើដំណើរតាមសារធាតុរាវក្នុងរាងកាយទៅជ្រាបចូលក្នុងជាលិកា ប្រតិកម្មរួចវាចេញទៅក្នុងទឹកនោម ចេញពីរាងកាយរបស់យើង។ ប៉ុន្តែ គួរសម្គាល់ថា ការញ៉ាំវីតាមីន C លើសកម្រិតធម្មតា ដែលរាងកាយគួរទទួលប្រចាំថ្ងៃ បរិមាណដ៏ច្រើននោះនឹងបង្កបញ្ហាដល់ប្រព័ន្ធរំលាយអាហារ។ ការបរិភោគវិតាមីន C ច្រើនជាង ២០០០ មិល្លីក្រាមក្នុងមួយថ្ងៃ អាចនាំឲ្យមានបញ្ហាប្រព័ន្ធរំលាយអាហារដោយរួមមានរោគសញ្ញាដូចជា រាក និងចង្អោរ។ ជាទូទៅផលរំខានដោយសារវីតាមីននេះ គឺកើតឡើងដោយសារការលេបវីតាមីននេះក្នុងទម្រង់ជាថ្នាំបំប៉ន ប៉ុន្តែមិនកើតមានដោយសារតែការញ៉ាំអាហារដែលមានជាតិវីតាមីន C នោះទេ។
អត្ថបទពាក់ព័ន្ធ៖
- វីតាមីន និងជាតិរ៉ែសំខាន់ៗទាំងនេះ អាចកែខៃបញ្ហាជ្រុះសក់ ជួយសក់មានសុខភាពល្អ
- ចង់ឲ្យស្បែកសតាមធម្មជាតិ សាកតិចនិកពិសេសនេះលមើល៍!
វីតាមីន C មាននាទីមួយទៀតគឺជួយឲ្យរាងកាយស្រូបយកជាតិដែកបានល្អ។ ប្រសិនបើរាងកាយយើងទទួលបានវិតាមីនC ក្នុងកម្រិតច្រើន នោះវាក៏អាចធ្វើឲ្យរាងកាយស្រូបយកជាតិដែកកាន់តែច្រើនលើសតម្រូវការដែលនាំឲ្យពុលដល់ថ្លើមបាន។ ជាមួយគ្នានោះ វីតាមីននេះក៏បង្កបន្ទុកឱ្យតម្រងនោម ត្រូវធ្វើការធ្ងន់ផងដែរ ដោយសារបរិមាណវីតាមីន C ច្រើននឹងក្លាយជាសំណល់មួយក្នុងទឹកនោម ក្នុងទម្រង់ជា Oxalate។ នៅពេលសំណល់ Oxalate បញ្ចេញច្រើនពីរាងកាយតាមទឹកនោម វានឹងភ្ជាប់ជាមួយនឹងសារធាតុរ៉ែជាច្រើនពីរាងកាយផ្សេងទៀត ដែលធ្វើឱ្យក្លាយជាគ្រួសក្នុងតម្រងនោម។
តាមវេជ្ជបណ្ឌិតជំនាញ សម្រាប់វីតាមីន C សម្រាប់រាងកាយមនុស្សពេញវ័យ ត្រូវការជាប្រចាំថ្ងៃ គឺប្រមាណ ៧៥ មិលី្លក្រាម/១ថ្ងៃ ចំពោះនារី និង ៩០មិលី្លក្រាម/១ថ្ងៃ ចំពោះបុរស នឹងអាចទៅដល់កម្រិតរាងកាយទទួលយកខ្ពស់បំផុត គឺត្រឹម ២០០០មិលី្លក្រាមក្នុងមួយថ្ងៃប៉ុណ្ណោះ៕
អត្ថបទពាក់ព័ន្ធ៖
- ម៉េចបានខែក្ដៅ យើងម្នាក់ៗត្រូវការវីតាមីន C បំផុត?
- ចង់ឲ្យសាច់ដុំកាន់តែល្អ មិនងាយឈឺ ញ៉ាំវីតាមីនប៉ុន្មានមុខនេះ ល្អបំផុត
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmr]
