ក្នុងអាហារប្រចាំថ្ងៃដែលយើងញ៉ាំត្រូវផ្សំឡើងពីបន្លែ សាច់ គ្រឿងទេស និងគ្រឿងផ្សំជាច្រើនមុខ ទើបអាចមានរសជាតិឈ្ងុយឆ្ងាញ់។ ក្នុងនោះបើយើងឧស្សាហ៍បានញ៉ាំគ្រឿងទេសមួយចំនួន អាចជួយសម្រួលដល់ការដុតបំផ្លាញកាឡូរីលើសក្នុងខ្លួនបានថែមទៀតផង។ នេះជាការលើកឡើងរបស់វេជ្ជបណ្ឌិតផ្នែកទូទៅ លី ឫទ្ធីគុណ។
១- ខ្ញី
ខ្ញីជាបន្លែ និងជាគ្រឿងទេសដ៏ពេញនិយមមួយសម្រាប់ប្រជាពលរដ្ឋកម្ពុជា ហើយវាក៏ជាភ្នាក់ងារ រំញោចមេតាប៉ូលីសដែលបង្កើតកម្ដៅនៅក្នុងកាកសំណល់សរីរាង្គ មានប្រសិទ្ធភាពដុតរំលាយជាតិខ្លាញ់កាឡូរីបានយ៉ាងប្រសើរ តាមរយៈការបង្កើនសីតុណ្ហភាពក្នុងរាងកាយ។ ខ្ញីក៏មានសមត្ថភាពបង្កើនការរំលាយអាហារ និងពន្លឿនការដុតរំលាយអាហារក្នុងរាងកាយដែលប្រសើរបំផុតជួយក្នុងការសម្រកទម្ងន់។
២- ម្ទេស
ម្ទេសជាគ្រឿងបន្ថែមរសជាតិដែលមិនអាចខ្វះបានក្នុងគ្រួសារនីមួយៗ ដើម្បីធ្វើឲ្យអាហារកាន់តែឆ្ងាញ់ ហើយវាក៏ល្អក្នុងការជួយដុតកាឡូរីចេញពីក្នុងរាងកាយ។ ក្រោយការញ៉ាំអាហារហឹរ ជួយកាត់បន្ថយការឃ្លានចំណីផ្អែមៗបានទៀតផង។ នៅក្នុងម្ទេសមានសារធាតុ capsaicin ដែលជួយបង្កើនសីតុណ្ហភាពរាងកាយ ដើម្បីដុតកាឡូរី។
៣- ខ្ទឹមស
ខ្ទឹមសមានមុខងារល្អជាច្រើនចំពោះសុខភាព ហើយក្នុងនោះវាក៏មានសមត្ថភាពជួយពន្លឿន ការដុតរំលាយអាហារផងដែរ។ ការបន្ថែមខ្ទឹមសក្នុងរបបអាហារប្រចាំថ្ងៃនឹងជួយឲ្យអ្នកធាត់ៗ ឆាប់ស្រកទម្ងន់បានមួយចំណែកទៀត។
៤- ម្រេច
ម្រេច គឺជាគ្រឿងទេសដ៏សំខាន់នៅក្នុងការចម្អិនម្ហូបអាហារប្រចាំថ្ងៃ ហើយវាក៏មានផ្ទុកនូវវីតាមីនជាច្រើនដូចជា វីតាមីន A, C, K និងសារធាតុរ៉ែសំខាន់ៗមួយចំនួនទៀត ដែលមិនត្រឹមតែជំនួយសុខភាព តែក៏មានប្រយោជន៍ជំនួយដល់មុខងារមេតាប៉ូលីស ក្នុងការរំលាយអាហារ ដ៏ល្អបំផុតនៅក្នុងការដុតរំលាយជាតិខ្លាញ់ ជំនួយដល់ការសម្រកទម្ងន់។
[embed-health-tool-heart-rate]
