ការដើរក៏ជាលំហាត់ប្រាណមួយដែរ និងមានភាពងាយស្រួល ហើយក៏មិនចំណាយច្រើនអ្វីដែរ។ ការដើរគឺមានប្រយោជន៍ច្រើនសម្រាប់យើង បើអាចដើរយ៉ាងតិច ៣០ នាទីក្នុងមួយថ្ងៃ។
ដើរ ៣០ នាទី ក្នុងមួយថ្ងៃ ផ្ដល់គុណប្រយោជន៍យ៉ាងតិច ៧ យ៉ាងដល់សុខភាព
ត្រួតពិនិត្យដោយ គឹម កាណែល
១. ជួយដល់ចរន្តឈាម
ការដើរអាចជួយបង្ការជំងឺបេះដូង បង្កើនអត្រាចង្វាក់បេះដូង បញ្ចុះសម្ពាធឈាម និងពង្រឹងសុខភាពបេះដូង។ សម្រាប់ស្ត្រីអស់រដូវដែលដើរ ១ ទៅ ៣ គីឡូម៉ែត្រក្នុងមួយថ្ងៃអាចបញ្ចុះសម្ពាធឈាមបានរហូតជិតដល់ ១១ ពិន្ទុក្នុងរយៈពេល ២៤ សប្ដាហ៍។ រីឯស្ត្រីដែលដើរ ៣០ នាទីក្នុងមួយថ្ងៃអាចបន្ថយហានិភ័យជំងឺដាច់សរសៃឈាមខួរក្បាលរហូតដល់ ២០%។ នេះបើយោងតាមអ្នកស្រាវជ្រាវនៅសាកលវិទ្យាល័យ Harvard ផ្នែកសុខភាពសាធារណៈនៅទីក្រុង Boston។
២. ពង្រឹងឆ្អឹង
ការដើរអាចបញ្ឈប់ការបាត់បង់ម៉ាស់ឆ្អឹងសម្រាប់អ្នកមានជំងឺពុកឆ្អឹង។ ការសិក្សាមួយទៅលើស្ត្រីអស់រដូវបានបង្ហាញថាការដើរ៣០នាទីរាល់ថ្ងៃអាចកាត់បន្ថយហានិភ័យការបាក់ឆ្អឹងត្រគាកបានរហូតដល់ ៤០%។
៣. បន្ថយការឈឺចាប់នៅសន្លាក់
ការដើរអាចជួយការពារសន្លាក់រួមទាំងជង្គង់ និងត្រគាក។ នេះមកពីការដើរជួយផ្តល់ជាតិរំអិល និងពង្រឹងសាច់ដុំដែលទ្រទ្រង់សន្លាក់។ ម៉្យាងទៀត ការដើរក៏ផ្ដល់ប្រយោជន៍ដល់អ្នកមានជំងឺរលាកសន្លាក់ដោយកាត់បន្ថយការឈឺចាប់ ហើយការដើរ៨ទៅ៩គីឡូម៉ែត្រក្នុងមួយសប្ដាហ៍ក៏អាចជួយបង្ការជំងឺរលាកសន្លាក់ដែរ។
៤. សម្រកទម្ងន់
ការដើរត្រឹមតែ ៣០ នាទីអាចដុតបាន ២០០ កាឡូរី។ ការដើរច្រើននាំឲ្យការដុតកាឡូរីក៏បានច្រើន ដែលនេះអាចជួយឲ្យយើងស្រកទម្ងន់បាន។
៥. បង្កើនថាមពល
ចេញដើរនៅពេលយើងមានអារម្មណ៍ថាហត់នឿយអាចមានប្រសិទ្ធភាពក្នុងការបង្កើនថាមពលបានល្អជាងយើងផឹកកាហ្វេទៅទៀត។ ការដើរជួយបង្កើនអុកស៊ីសែនក្នុងរាងកាយ និងបង្កើនកម្រិតអ័រម៉ូន cortisol អ័រម៉ូន epinephrine និងអ័រម៉ូន norepinephrineដែលអ័រម៉ូនទាំងនេះអាចជួយបង្កើនថាមពលបាន។
៦. ជួយឲ្យមានអារម្មណ៍ល្អ
ការដើរអាចជួយដល់សុខភាពផ្លូវចិត្តបាន។ ការសិក្សាជាច្រើនបង្ហាញថាការដើរអាចជួយកាត់បន្ថយអាការៈថប់បារម្ភ ជំងឺបាក់ទឹកចិត្ត និងអារម្មណ៍អវិជ្ជមាន។ ដើម្បីទទួលបានអត្ថប្រយោជន៍នេះយើងអាចដើរ ៣០ នាទី ឬអាចហាត់ប្រាណ ៣ ថ្ងៃក្នុងមួយសប្ដាហ៍។
៧. ពង្រឹងប្រព័ន្ធភាពស៊ាំ
ការដើរអាចកាត់បន្ថយហានិភ័យការឆ្លងជំងឺផ្ដាសាយ។ ការសិក្សាមួយបានតាមដានមនុស្សពេញវ័យ ១០០០នាក់អំឡុងរដូវកាលផ្ដាសាយ និងបានរកឃើញថាអ្នកដែលដើរ៣០ទៅ ៤៥ នាទីក្នុងមួយថ្ងៃឈឺតិចថ្ងៃ និងមិនសូវមានការឆ្លងជំងឺប្រព័ន្ធផ្លូវដង្ហើមផ្នែកខាងលើទេ។ បើប្រៀបធៀបទៅនឹងអ្នកមិនសូវដើរវិញ ឃើញថាអ្នកដើរមានអាការៈតិចតួចជាងអ្នកមិនសូវដើរនៅពេលឈឺម្ដងៗ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
គឹម កាណែល
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម