រឿងរ៉ាវអំពីថ្នាំពន្យារភាពចាស់ ឬថ្នាំអាយុវែង បានធ្វើឲ្យអារម្មណ៍មនុស្សស្ថិតក្នុងចម្ងល់ជាច្រើនសតវត្ស។ នៅក្នុងសម័យកាលវិទ្យាសាស្រ្ត យើងបានដឹងខ្លះមកហើយថា ភាពចាស់ ឬចម្រើនវ័យ គឺកំណត់ដោយហ្សែនរបស់យើង ហើយអ្វីដែលអាចធ្វើបាននោះទទួលយកភាពចម្រើនវ័យនោះ។ យ៉ាងណាមិញ អ្នកវិទ្យាសាស្រ្តជនជាតិអូស្រ្តាលី គឺលោក David Sinclair ជឿជាក់ថា ភាពចាស់គឺជាជំងឺមួយតែប៉ុណ្ណោះ ហើយវាអាចព្យាបាលបាន។
តាមរយៈវិបសាយ Bright Side បានបង្ហាញពីការស្រាវជ្រាវមួយចំនួនដែលពាក់ព័ន្ធនឹងអំណះអំណាងខាងលើ៖
តាមការស្រាវជ្រាវរបស់លោកសាស្រ្តាចារ្យ David Sinclair ផ្តោតទៅលើម៉ូលេគុល” ប្រឆាំងភាពចាស់” ដោយលោកអះអាងថា នឹងបង្កើនអាយុរបស់មនុស្សបានប្រមាណ ១០ ឆ្នាំទៀត ព្រមទាំងនៅមានសុខភាពល្អទៀតផង។ សាស្រ្តាចារ្យវ័យ ៥០ ឆ្នាំខាងលើរូបនេះ ក៏បានបន្ថែមទៀតថា ម្តាយរបស់លោកអាចនៅមានអាយុវែងរហូត ២០ ឆ្នាំទៀត ទោះកើតមហារីកសួត ព្រោះបានប្រើម៉ូលេគុលខាងលើនេះ ជាពិសេសឪពុករបស់លោក រួមទាំងភរិយា និងក្រុមការងារសុទ្ធសឹងតែបាន និងកំពុងប្រើប្រាស់ម៉ូលេគុលនេះប្រកបដោយប្រសិទ្ធភាព។
សាស្រ្តាចារ្យជនជាតិអូស្រ្តាលីបញ្ជាក់ទៀតថា មនុស្សជាច្រើនមិនជឿទេថា ភាពចាស់គឺជាជំងឺ ដូចនេះពុំមានថ្នាំសម្រាប់ព្យាបាលជំងឺនេះឡើយ។ លោកសាស្រ្តាចារ្យចង់ឲ្យអូស្រ្តាលី ជាប្រទេសដំបូងគេដែលប្រកាសថា ភាពចាស់ជាជំងឺអាចព្យាបាលបាន។ យ៉ាងណាមិញ មកទល់ពេលនេះ ឱសថស្ថាន ឬក្រុមហ៊ុនបច្ចេកទេសវេជ្ជសាស្រ្តទើបតែអាចផលិតផលិតផលវេជ្ជសាស្រ្តដែលជួយពន្រយាភាពចាស់ និងរក្សាសរីរាង្គមនុស្សឲ្យនៅមានសុខភាពល្អប៉ុណ្ណោះ។
មនុស្សជាច្រើនជឿថា ភាពចាស់គឺកំណត់ដោយ DNA ដែលមាននៅក្នុងខ្លួន ប៉ុន្តែលោកសាស្រ្តាចារ្យ Sinclair ច្រានចោលជំនឿនេះ។ ការសិក្សារបស់លោកបង្ហាញថា ម៉ូលេគុលនៃសមាសធាតុ Epigenome បញ្ជូនសញ្ញាទៅកាន់ Genome (ហ្សែនដែលជាមរតកពីឪពុកម្តាយ) ដែលនាំឲ្យមនុស្សឈានទៅរកវ័យចំណាស់។ ដូចនេះ តាមរយៈការស្រាវជ្រាវជាច្រើនឆ្នាំ លោកសន្និដ្ឋានថា ភាពចំណាស់អាចហាមឃាត់បាន ប្រសិនបើអ្នកជំនាញអាចកែប្រែម៉ូលេគុល Epigenome។
នៅពេលមនុស្សកើនអាយុហ្សែនចាប់ផ្តើមប្រែប្រួល និងអន់ថយគុណភាព។ ប៉ុន្តែនៅពេលគេដាស់ប្រូតេអ៊ីនពិសេសម្យ៉ាងឈ្មោះថា Sirtuin ក្នុងរាងកាយ វាបានរារាំងដំណើរការហ្សែនវិវត្ដភាពចាស់មួយចំនួន ដែលនេះបានធ្វើឲ្យរាងកាយទទួលបានអត្ថប្រយោជន៍យ៉ាងពិសេស។
អ្វីដែលគួរឲ្យកត់សម្គាល់នោះគឺ អ្នកវិទ្យាសាស្រ្តក៏បានរកឃើញ ដើម្បីជំរុញឲ្យមានប្រូតេអ៊ីន Sirtuin ក្នុងរាងកាយ គឺត្រូវកាត់បន្ថយជាតិកាឡូរី និងបង្កើតទម្លាប់ហាត់ប្រាណ។ ក្រៅពីនេះ គេក៏បានរកឃើញថាម៉ូលេគុល Resveratrol ដែលមាននៅក្នុងសម្បកផ្លែទំពាំងបាយជូរ និងស្រាទំពាំងបាយជូរក្រហម អាចជួយជំរុញឲ្យមានប្រូតេអ៊ីន Sirtuin ក្នុងរាងកាយផងដែរ។
ការស្រាវជ្រាវថ្មីមួយទៀតរបស់លោកសាស្រ្តាចារ្យដដែលបានរកឃើញថា ម៉ូលេគុល oxidized nicotinamide adenine dinucleotide ឬហៅកាត់ថា (NAD+) ជាមូលដ្ឋានធ្វើឲ្យវ័យនៅក្មេង។ ម៉ូលេគុលនេះជំរុញដំណើរការសំខាន់ៗក្នុងរាងកាយ ប៉ុន្តែវាបាត់បង់នៅពេលមនុស្សមានវ័យចាស់។ ដូចនេះលោក David Sinclair អះអាងថា ការផ្លាស់ប្តូរកម្រិតម៉ូលេគុល NAD+ ថ្មីក្នុងរាងកាយ នឹងមានប្រសិទ្ធភាពរក្សាសរីរាង្គមួយចំនួន ដូចជា ថ្លើម បេះដូង ក្រលៀន សាច់ដុំ…។
ជាមួយការពិសោធខាងលើនេះទៅលើសត្វកណ្តុរ អ្នកវិទ្យាសាស្រ្តផ្សេងទៀតឃើញថា កណ្តុរវ័យចាស់ក្រោយពេលដាស់ម៉ូលេគុល NAD+ កាន់តែរហ័សរហួនដូចកណ្តុរវ័យជំទង់ ចំណែកកណ្តុរវ័យក្មេងក៏កាន់តែសកម្មឡើង ក្រោយពេលជំរុញម៉ូលេគុលនេះ។
គួររម្លឹកឡើងវិញដែរថា ការស្រាវជ្រាវរបស់លោកសាស្រ្តាចារ្យ David Sinclair ធ្វើឡើងក្នុងបំណងដើម្បីរកឲ្យឃើញនូវវិធីពន្យារភាពចាស់ និងធ្វើឲ្យមនុស្សនៅតែមានសុខភាពល្អ។ តែយ៉ាងណាមិញ នេះគ្រាន់តែជាការស្រាវជ្រាវប៉ុណ្ណោះ ហើយលោករំពឹងវាថាជាចំណែកមួយជួយជាប្រយោជន៍នាថ្ងៃអនាគត៕
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
