មិនមែនតែនៅស្រុកខ្មែរទេ អត្រាអ្នកផឹកស្រា ស្របៀរ ទូទាំងពិភពលោក កើនឡើងដល់ទៅ ៧០% ហើយនៅអាស៊ី ផឹកកាន់តែច្រើនជាងមុន ប៉ុន្តែនៅអឺរ៉ុប បែរជាផឹកកាន់តែតិចជាងមុន។
ការរកឃើញនេះ គឺតាមរយៈការសិក្សាចេញផ្សាយលើគេហទំព័រវេជ្ជសាស្ត្រ Medical News Today ដោយអ្នកស្រាវជ្រាវ ព្រមានពីគ្រោះថ្នាក់ដោយសារផឹកស្រាកាន់តែច្រើនឡើង និងអំពាវនាវឲ្យរៀបចំគោលនយោបាយជាចាំបាច់ ចាត់វិធានការដោះស្រាយបញ្ហានេះ។
ការសិក្សានេះធ្វើឡើងដោយមជ្ឈមណ្ឌលសុខភាពផ្លូវចិត្ត និងសារធាតុញៀនរបស់កាណាដា សហការជាមួយវិទ្យាស្ថានស្រាវជ្រាវ Technische Universitat Dresden របស់អាល្លឺម៉ង់។ អ្នកស្រាវជ្រាវវិភាគលើទិន្នាការផឹកស្រា នៅប្រទេសចំនួន ១៨៩ ពីឆ្នាំ១៩៩០-២០១៧ និងប៉ាន់ស្មានអត្រានេះ ទៅឆ្នាំ២០៣០ ខាងមុខ។
ឆ្នាំ ១៩៩០ ចំនួនស្រាមនុស្សផឹកក្នុងមួយឆ្នាំមានត្រឹមតែ ២០.៩៩៩លានលីត្រ ប៉ុន្តែឆ្នាំ ២០១៧ កើនឡើងដល់ទៅ ៣៥.៦៧៦ លានលីត្រ។
មុនឆ្នាំ១៩៩០ ការផឹកស្រាច្រើន មានតែនៅក្នុងប្រទេសចំណូលខ្ពស់ ដូចជា សហភាពអឺរ៉ុប ប៉ុន្ដែនិន្នាការនេះ បានផ្លាស់ប្ដូរ ដោយវាបានកើតមាននៅក្នុងប្រទេសមានចំណូលមធ្យមវិញ ដូចជា ចិន ឥណ្ឌ វៀតណាម និងតំបន់អាស៊ីអាគ្នេយ៍។ នៅអឺរ៉ុប មនុស្សចាស់ផឹកស្រា ថយចុះ ១២% ពី ១១,២ លីត្រ/ឆ្នាំ នៅឆ្នាំ ២០១០ មកនៅត្រឹម ៩,៨ លីត្រ/ឆ្នាំ នៅឆ្នាំ ២០១៧។ ចំណែកនៅអាស៊ីអាគ្នេយ៍វិញ កើនឡើង ៣៤% ពី ៣,៥ លីត្រ/ឆ្នាំ នៅឆ្នាំ ២០១០ ទៅ ៤,៧ លីត្រ/ឆ្នាំ នៅឆ្នាំ ២០១៧។
អត្ថបទពាក់ព័ន្ធ៖
- សាហាវណាស់ វៀតណាមស្លាប់ជាង ៣០០នាក់រាល់ថ្ងៃដោយសារមហារីក ព្រោះផឹកស្រាច្រើន
- ម៉េចបានពុលស្រា? ស្រាអីងាយពុលជាងគេ?
អ្នកស្រាវជ្រាវ ប៉ាន់ស្មានថា ការផឹកស្រាក្នុងមួយឆ្នាំ ទូទាំងពិភពលោក ទំនងកើនឡើង ៥,៩លីត្រ នៅឆ្នាំ ១៩៩០ ទៅ ៧,៦លីត្រ នៅឆ្នាំ ២០៣០ ដោយមនុស្សពេញវ័យ ពាក់កណ្ដាលពិភពលោក នឹងផឹកស្រា ខណៈមនុស្សពេញវ័យ ២៣% នឹងផឹកស្រាយ៉ាងតិច ១ដង/ខែ។
ជាមួយគ្នានេះ អ្នកស្រាវជ្រាវក៏ព្រមានថា ស្រានឹងបន្ដជាកត្ដាហានិភ័យនាំមុខមួយ បង្កជំងឺនៅពេលខាងមុខ ហើយគោលនយោបាយមានប្រសិទ្ធភាព ចាំបាច់អនុវត្តនៅប្រទេសកំពុងអភិវឌ្ឍន៍ មានអត្រាកើនឡើងអ្នកផឹកស្រា។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
