ជាធម្មតា បញ្ហាធ្វើការហើយ អត់បើកប្រាក់ខែឲ្យបុគ្គលិក ភាគច្រើនកើតឡើងនៅប្រទេសក្រីក្រ ដែលរដ្ឋខ្សត់លុយ។ តែសឹងមិនគួរឲ្យជឿ នៅប្រទេសជប៉ុន ពេទ្យប្រមាណ ២.០០០នាក់ ធ្វើការអត់បានប្រាក់ខែ ចាប់តាំងពីចុងឆ្នាំមុនមកម្ល៉េះ។
ក្រសួងអប់រំជប៉ុន បានប្រកាសកាលពីសប្ដាហ៍មុនថា ពេទ្យជាង ២.០០០នាក់ នៅតាមមន្ទីរពេទ្យសាកលវិទ្យាល័យ ចំនួន ៥០ ធ្វើការដោយអត់ទទួលបានប្រាក់ខែនោះទេ ដោយខ្លះពុំមានកិច្ចសន្យាការងារ ឬការធានារ៉ាប់រងលើសំណង។
មន្ទីរពេទ្យសាកលវិទ្យាល័យនានា ក្នុងប្រទេសជប៉ុន មានទម្លាប់មិនផ្ដល់បៀវត្ស ទៅគ្រូពេទ្យ ដែលភាគច្រើនជាសិស្សថ្នាក់បញ្ចប់ការសិក្សា ហើយទៅព្យាបាលអ្នកជំងឺ ជាផ្នែកមួយនៃការស្រាវជ្រាវ ឬហាត់ការងារ។ ប៉ុន្ដែទម្លាប់នេះ បានធ្វើឲ្យគ្រូពេទ្យជាច្រើន ងាកទៅធ្វើការក្រៅម៉ោង តាមក្រុមហ៊ុន ដើម្បីបានប្រាក់ខែ ហើយជាញឹកញាប់ អស់កម្លាំងពេលទៅបំពេញការងារនៅតាមមន្ទីរពេទ្យសាកលវិទ្យាល័យ។
ការរកឃើញនេះ គឺតាមរយៈការស្ទង់មតិមួយ ពីខែមករា-មីនា លើវេជ្ជបណ្ឌិត និងទន្ដពេទ្យ ៣១.៨០១នាក់ ដែលធ្វើការនៅតាមមន្ទីរពេទ្យសាកលវិទ្យាល័យ ចំនួន ១០៨ ចាប់តាំងពីខែកញ្ញា ឆ្នាំ២០១៨។ ក្នុងនោះ ពេទ្យ ៧៥១នាក់ រកឃើញថា បម្រើការងារអត់មានប្រាក់ខែ ដោយពុំមានការបញ្ជាក់មូលហេតុច្បាស់លាស់នោះទេ ខណៈពេទ្យ ១.៤៤០នាក់ទៀត ធ្វើការអត់ប្រាក់ខែ ដោយមានការបញ្ជាក់មូលហេតុ ហើយមន្ទីរពេទ្យ សម្រេចបើកបៀរវត្សឲ្យវិញ ចាប់ពីពេលនេះ។
សិស្សពេទ្យវ័យ ៣០ឆ្នាំម្នាក់ និយាយថា “មន្ទីរពេទ្យសាកលវិទ្យាល័យ តែងតែទទួលផលប្រយោជន៍ពីមនសិការរបស់យើង ហើយកេងប្រវ័ញ្ចយើង“។ ដើម្បីចំណាយថ្លៃសិក្សា និងរស់នៅ សិស្សពេទ្យរូបនេះ បានធ្វើការក្រៅម៉ោង នៅពេលយប់រយៈពេល ១៥ថ្ងៃ។ លោកបន្ដថា លោកអស់កម្លាំង និងងងុយគេង ពេលទៅបម្រើការងារនៅមន្ទីរពេទ្យសាកលវិទ្យល័យវិញ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
