ដំណឹងល្អសម្រាប់អ្នកជំងឺរបេងស៊ាំការព្យាបាល ដោយពេលនេះ រដ្ឋបាលចំណីអាហារ និងឱសថអាមេរិក (FDA) បានឯកភាពឲ្យប្រើប្រាស់ថ្នាំរបេងថ្មីមួយប្រភេទ ដើម្បីព្យាបាលលើអ្នកជំងឺរបេងដែលលែងមានប្រសិទ្ធភាពជាមួយថ្នាំមុនៗ។
ថ្នាំថ្មីនេះ ត្រូវគេឲ្យឈ្មោះថា Pretomanid ដោយលេបជាមួយថ្នាំ ២មុខទៀត គឺ Bedaquiline និង Linezolid ដើម្បីព្យាបាលអ្នកជំងឺរបេង ស៊ាំនឹងថ្នាំ ឬការព្យាបាលអត់ប្រសិទ្ធភាព ប៉ុន្តែថ្នាំនេះប្រើប្រាស់បាន សម្រាប់តែមនុស្សពេញវ័យប៉ុណ្ណោះ។
ថ្នាំរបេង Pretomanid មានសុវត្ថិភាព និងប្រសិទ្ធភាព ក្រោយបានសាកល្បងលើអ្នកជំងឺរបេងសួត ១០៩នាក់ ដែលស៊ាំនឹងថ្នាំ ហើយជាលទ្ធផល ក្នុងចំណោមអ្នកជំងឺទាំងអស់ គឺបានជាសះស្បើយរហូតដល់ ៩៥% ក្រោយលេបថ្នាំរយៈពេល ៦ ខែ។
ការព្យាបាលជំងឺរបេងដោយថ្នាំ ៣មុខ និងប្រើរយៈពេល ៦ខែ គឺងាយស្រួល និងត្រូវការពេលខ្លីជាងមុន ខណៈការព្យាបាលជំងឺរបេងស៊ាំនឹងថ្នាំពីមុនមក ត្រូវការថ្នាំពី ៦-៨ មុខ និងរយៈពេលយ៉ាងតិច ២ ឆ្នាំ។
អត្ថបទពាក់ព័ន្ធ៖ ថៃ ជាប្រទេសមានអត្រាជំងឺរបេងខ្ពស់បំផុតលើពិភពលោក
យោងតាមអង្គការសុខភាពពិភពលោក (WHO) នៅឆ្នាំ ២០១៧ មនុស្ស ១០លាននាក់ ទូទាំងពិភពលោក មានជំងឺរបេង ដោយ ១,៦លាននាក់ បានស្លាប់។ អង្គការដដែលបញ្ជាក់ថា តាមការប៉ាន់ស្មាន មកទល់នឹងពេលនេះ យ៉ាងហោចណាស់មានអ្នកជំងឺ ៤៩.០០០នាក់ មានដែលស៊ាំនឹងថ្នាំច្រើនមុខ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
