ប្រុសៗ ក៏មិនខុសពីស្រីៗដែរ ជំងឺបេះដូងអាចបង្កគ្រោះថ្នាក់ដល់ជីវិតបាន។ សមាគមសុខភាពបេះដូងអាមេរិក (AHA) បង្ហាញថា ក្នុងចំណោមមនុស្ស ៣នាក់ មានលើសពីម្នាក់ ដែលមានបញ្ហាទាក់ទងជំងឺបេះដូង ដូចជា ខ្សោយបេះដូង សរសៃឈាមបេះដូង ឈឺទ្រូង ចង្វាក់បេះដូងដើរមិនទៀង ឆ្លងមេរោគក្នុងបេះដូង និងខូចទ្រង់ទ្រាយពីកំណើត ជាដើម។ ឯរោគសញ្ញាវិញ អាស្រ័យលើប្រភេទជំងឺ។

១- សញ្ញាដំបូងជំងឺបេះដូង

ដំណាក់កាលដំបូង សញ្ញាអាចមកហើយបាត់ទៅវិញ ដូចជា ចង្វាក់បេះដូងដើរមិនទៀង ធ្វើឲ្យយើងពិបាកដកដង្ហើមក្រោយពេលហាត់ប្រាណ មានថាអារម្មណ៍គាប ឬតឹងទ្រូង វិលមុខ និងសន្លប់ ជាដើម។

ជំងឺបេះដូងដែលបណ្ដាលមកពីសរសៃឈាមបេះដូង ឲ្យសញ្ញាដោយការឈឺទ្រូង ហត់ និងសញ្ញានៅដៃជើង ដូចជា ឈឺ ហើម មានអារម្មណ៍ដូចមានអ្វីចាក់ ស្ពឹក ត្រជាក់ដៃ ជើង និងខ្សោយ ផងដែរ។ សញ្ញាទាំងនេះបង្ហាញថា សរសៃឈាមបេះដូងរួមតូច ដោយសារមានកំណករាំងស្ទះ ធ្វើឲ្យបេះដូងពិបាកច្របាច់ឈាម នាំអុកស៊ីហ្សែនទៅចិញ្ចឹមជាលិកា។ មានសញ្ញាចម្លងរោគក្នុងបេះដូង ដូចជា ក្អកស្ងួត ក្តៅខ្លួន និងឡើងកន្ទួលលើខ្លួន។

បើមានទឹកនោមផ្អែម និងលើសសម្ពាធឈាម (លើសឈាម) ទៀតនោះ ការប្រឈមកើតជំងឺបេះដូងទៅថ្ងៃមុខ មានអត្រាកាន់តែខ្ពស់។

គំាងបេះដូង

២- សញ្ញាទូទៅជំងឺគាំងបេះដូង និងដាច់សរសៃឈាមក្នុងខួរក្បាល

ជំងឺគាំងបេះដូង កើតឡើងពេលឈានដល់កម្រិតមួយដែលឈាមឈប់ហូរទៅសាច់ដុំបេះដូង នាំឲ្យវាលែងកន្ត្រាក់ដូចធម្មតា។ យើងគិតថា សញ្ញាគាំងបេះដូង មានតែការឈឺទ្រូងមែនទេ? ប្រុសៗមួយចំនួនតែងជួបសញ្ញា ដូចជា គាប តឹង ឬឈឺទ្រូង និងបញ្ហានៅដៃ ខ្នង ក ពោះ ឬចុករួយថ្គាម អាចពិបាកដកដង្ហើម ចង្អោរ វិលមុខ ឬនៅសុខៗបែកញើសខ្លាំង។

ស្ទើរគ្រប់ប្រុសៗដែលមានជំងឺដាច់សរសៃឈាមខួរក្បាល មានអារម្មណ៍ស្ពឹក ឬខ្សោយមួយចំហៀងខ្លួន អាចស្ពឹកមុខ ដៃ ឬជើង។ សញ្ញាដទៃទៀត មាន វង្វេង ពិបាកនិយាយ មិនអាចយល់អ្វីដែលអ្នកជិតខ្លួននិយាយ បាត់បង់តុល្យភាពរាងកាយ ទិសដៅ និងឈឺក្បាលខ្លាំង។

ត្រូវចាំថា សញ្ញាទាំងអស់នេះ អាចកើតមានភ្លាមៗដោយមិនដឹងខ្លួន អ៊ីចឹងគួរប្រញាប់ទៅពេទ្យ បើជួបសញ្ញាទាំងនេះ។

សញ្ញាជំងឺ​បេះដូង​សំខាន់ៗ​ ​ប្រុសៗគួរ​យក​ចិត្ត​ទុកដាក់​ឲ្យ​មែន​ទែន

១- សញ្ញាដំបូងជំងឺបេះដូង

២- សញ្ញាទូទៅជំងឺគាំងបេះដូង និងដាច់សរសៃឈាមក្នុងខួរក្បាល

សញ្ញាជំងឺបេះដូងសំខាន់ៗ ប្រុសៗគួរយកចិត្តទុកដាក់ឲ្យមែនទែន