ជំងឺបេះដូង ជាជំងឺដ៏កាចសាហាវមួយ និងបានសម្លាប់មនុស្សរាប់លាននាក់ជារៀងរាល់ឆ្នាំ ប៉ុន្តែការផ្លាស់ប្ដូរបែបបទរស់នៅ និងរបបអាហារ ពិតជាអាចការពារខ្លួនយើងពីជំងឺនេះបានយ៉ាងមានប្រសិទ្ធភាព។ យ៉ាងណាមិញ ការស្វែងយល់ពីសញ្ញាមួយចំនួន ដែលបង្ហាញពីការស្ទះសរសៃឈាម អាចឲ្យយើងមានការប្រុងប្រយ័ត្នខ្ពស់ និងដោះស្រាយបញ្ហានេះបានទាន់ពេលវេលា។ ខាងក្រោមនេះជារោគសញ្ញាស្ទះសរសៃឈាមចំនួន៤ ដែលអ្នកគួរយកចិត្តទុកដាក់ និងព្យាបាលឲ្យបានទាន់ពេលវេលា។
អ្នកអាចមានបញ្ហាស្ទះសរសៃឈាម បើមានរោគសញ្ញាទាំងនេះ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. លិង្គមិនឡើងរឹង
ចំពោះបុរស បញ្ហាលិង្គមិនឡើងរឹងអាចជាសញ្ញានៃការស្ទះសរសៃឈាមនៅក្នុងឆ្អឹងអាងត្រគាក ដែលកើតឡើងមុនពេលឈានដល់អាការៈគាំងបេះដូង។ ជាមធ្យម វាមានរយៈពេលពី៣ទៅ៥ឆ្នាំនៅពេលចាប់ផ្ដើមជួបប្រទះបញ្ហាលិង្គមិនឡើងរឹង មុនពេលកើតមានជំងឺសរសៃឈាមបេះដូង។ ដូចនេះ យើងមានពេលវេលាគ្រប់គ្រាន់ក្នុងការកំណត់ពីស្ថានភាពជំងឺ និងស្វែងរកការព្យាបាលដ៏សមស្រប។
២. ទំពែក
ការសិក្សាមួយបានបង្ហាញថា បញ្ហាក្បាលទំពែកអាចសន្មតពីវត្តមានរបស់ជំងឺសរសៃឈាមបេះដូង នៅគ្រប់វ័យទាំងអស់។ បន្ថែមពីនេះ អ្នកដែលមានក្បាលទំពែកកម្រិតមធ្យមដល់ធ្ងន់ធ្ងរ មានហានិភ័យកាន់តែខ្ពស់នៃការស្លាប់ពីជំងឺបេះដូង។
៣. ឈឺកំភួនជើងពេលដើរ
ជំងឺក្រិនសរសៃឈាមបេះដូង អាចបង្កជាការរាំងស្ទះដល់សរសៃឈាមជើង ជាហេតុធ្វើឲ្យយើងមានការឈឺចាប់នៅត្រង់កំភួនជើងនៅពេលដើរ។ អាការៈនេះកើតឡើងជាពិសេស ចំពោះអ្នកជក់បារី។ ប្រសិនបើយើងគ្នាយើងមានរោគសញ្ញានេះ គប្បីធ្វើរោគវិនិច្ឆ័យភ្លាមៗ ដើម្បីបញ្ចៀសហានិភ័យធ្ងន់ធ្ងរ។
៤. រឹងថ្គាម
ជាមួយគ្នានេះដែរ រឹងថ្គាមអាចជារោគសញ្ញាមួយនៃការស្ទះសរសៃឈាម ដែលកើតឡើងជាញឹកញាប់ចំពោះស្ត្រី។ ជាក់ស្ដែង ការឈឺចាប់នៅត្រង់ថ្គាម និងក គឺជារោគសញ្ញាទូទៅនៃជំងឺខ្វះឈាមទៅចិញ្ចឹមបេះដូង។ វាកើតឡើងដោយសារតែសរសៃប្រសាទ vagus (ជាសរសៃប្រសាទសំខាន់ដែលបញ្ជូនសញ្ញាឈឺចាប់ពីបេះដូង) មានទំនាក់ទំនងជាប់លាប់ជាមួយនឹងក ថ្គាម ក្បាល និងដៃឆ្វេង។
ក្នុងករណីនេះ ចូរពិគ្រោះយោបល់ជាមួយនឹងគ្រូពេទ្យ ដើម្បីកំណត់ពីមូលហេតុច្បាស់លាស់នៃអាការៈរឹងថ្គាមនេះ ថាតើវាគ្រាន់តែជាបញ្ហាតូចតាច ដូចជាការសង្កៀតធ្មេញ ឬក៏ជារោគសញ្ញានៃជំងឺធ្ងន់ធ្ងរ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម