គ្នាយើងដឹងហើយថា ជំងឺទឹកនោមផ្អែមអាចបង្កផលប៉ះពាល់ច្រើនមែនទែនទៅលើអ្នកជំងឺ ហើយអាចប្រឈមហានិភ័យដល់ជីវិតថែមទៀត។ ជំងឺទឹកនោមផ្អែម កំពុងហក់ឡើងទ្វេគុណ ធ្វើឲ្យអ្នកជំនាញបារម្ភពីការរាលដាលជំងឺរបេងទៅលើអ្នកជំងឺទឹកនោមផ្អែម។ នេះបើតាមការផ្សព្វផ្សាយឲ្យដឹងរបស់មន្ទីរពេទ្យ កាល់ម៉ែត។
ហេតុអ្វីបានអ្នកជំនាញខ្លាចជំងឺរបេងរាលដាលដល់អ្នកជំងឺទឹកនោមផ្អែមវិញ?
ចំពោះអ្នកជំងឺទឹកនោមផ្អែម មានកាយសម្បទាថយចុះ ប្រព័ន្ធការពាររាងកាយមិនល្អ ជាហេតុបណ្ដាលឲ្យមេរោគរបេងងាយនឹងជ្រៀតចូលក្នុងខ្លួនរបស់អ្នកជំងឺ។ បើយើងប្រៀបធៀបគ្នាទៅ អ្នកទឹកនោមផ្អែមមានអាត្រាកើតជំងឺរបេងច្រើនជាង ២-៣ដង ជាងអ្នកមិនកើតទឹកនោមផ្អែម ជាពិសេសក្រុមមនុស្សកើតទឹកនោមផ្អែមដែលមិនបានព្យាបាល និងត្រួតពិនិត្យជាតិស្ករឲ្យបានត្រឹមត្រូវ។
ម៉្យាងវិញ បើយើងធៀបអត្រាស្លាប់នៃអ្នកដែលកើតរបេង និងទឹកនោមផ្អែមគឺខ្ពស់ជាង ៤-៥ដង ប្រៀបជាមួយអ្នកដែលកើតជំងឺរបេង និងគ្មានទឹកនោមផ្អែម។
អ្នកជំងឺទឹកនោមផ្អែម គួរសម្គាល់សញ្ញាបែបណា បើកើតជំងឺរបេង?
ពេលអ្នកជំងឺទឹកនោមផ្អែមចេញរោគសញ្ញាគួរចំណាំដូចជា៖
- អស់កម្លាំង ល្ហិតល្ហៃ ញ៉ាំមិនបាន
- ក្អកមានស្លេស្មលើសពី ៣ខែ
- មានអារម្មណ៍ក្ដៅខ្លួនស្ទេញៗ ពិសេសនៅពេលរសៀល
- ស្រកទម្ងន់ដោយឥតមូលហេតុ។ល។
ចំពោះការព្យាបាលជំងឺរបេងដែលកើតលើអ្នកជំងឺទឹកនោមផ្អែម ទាមទារឲ្យមានការសហការគ្នារវាងគ្រូពេទ្យជំនាញច្រើនផ្នែក និងត្រូវពិនិត្យមើលកំហាក និងថតពិនិត្យមើលសួត ជាដើម។ ដូចនេះ វាចាំបាច់ណាស់ដែលអ្នកជំងឺទឹកនោមផ្អែម ត្រូវយល់ច្បាស់ និងបង្ការរុករកជំងឺរបេង មុនពេលរាលដាលកាន់តែធ្ងន់ធ្ងរ។
[embed-health-tool-vaccination-tool]
