ចំពោះប្តីប្រពន្ធដែលចង់បានកូន ប្រាកដជាចង់ដឹងហើយថា រួមភេទថ្ងៃណាទើបឆាប់មានកូននឹងគេ? ទាល់តែរួមភេទពេលមេជីវិតញីធ្លាក់ទើបអាចមានកូន ឬក៏ត្រូវរួមភេទញឹកញាប់?
ស្រាយចម្ងល់នេះ លោកសាស្ត្រាចារ្យវេជ្ជបណ្ឌិត គាន់ អូន ប្រធានផ្នែករោគស្ត្រី នៃមន្ទីរពេទ្យកាល់ម៉ែតថា ទាក់នឹងការមានកូន បើពេលមេជីវិតញីមិនធ្លាក់ ទោះបីជាយើងរួមភេទញឹកញាប់យ៉ាងណាក៏មិនអាចមានកូនដែរ។
នៅពេលសួរថា ថ្ងៃណាដែលមេជីវិតញីធ្លាក់? សាស្ត្រាចារ្យផ្នែកសម្ភព និងរោគស្ត្រី នៃសាកលវិទ្យាល័យ វិទ្យាសាស្ត្រសុខាភិបាលរូបនេះឆ្លើយថា ជាទូទៅស្ត្រីដែលមានវដ្តរដូវទៀងទាត់ មេជីវិតញីនឹងធ្លាក់នៅអំឡុងថ្ងៃទី១៣ ១៤ ១៥ មុនរដូវបន្ទាប់មកដល់។
“ទាក់ទងនឹងការមានកូន ទោះបីជាយើងរួមភេទញឹកញាប់ម៉េចក៏មិនអាចមានដែរ សំខាន់គឺយើងនៅជាមួយគ្នានៅពេលដែលស្ត្រីមានមេជីវិត ថ្ងៃទី១៣ ១៤ ១៥ ជាទូទៅមេជីវិតធ្លាក់ថ្ងៃទី១៤”។
ផ្ទុយទៅវិញពេលមករដូវរួចភ្លាមៗ ពេលជិតមករដូវ លោកវេជ្ជបណ្ឌិតថា ស្រ្តីអត់មានមេជីវិតទេ មេជីវិតអស់ រួមភេទអំឡុងពេលនេះ មិនអាចមានកូននោះទេ។
ពងមេជីវិតញី ជាមធ្យមអាចរស់បានរយៈពេល ២៤ម៉ោង បន្ទាប់ពីទុំជ្រុះ ហើយរយៈពេល ២៤ ម៉ោងនេះ គឺសំខាន់ណាស់ដើម្បីបង្កកំណើត ដោយចាំបាច់ត្រូវបានជួបជាមួយមេជីវិតឈ្មោល ទើបការបង្កកំណើតអាចដំណើរការទៅបាន។ បើពងមេជីវិតញី អាចជួបជាមួយមេជីវិតឈ្មោលមានសុខភាពល្អ នៅតាមផ្លូវមកកាន់ស្បូននោះ របត់នៃការបង្កើតជីវិតថ្មីមួយ នឹងកើតឡើងភ្លាម។ តែបើមិនដូចនោះទេ ពងទុំធ្លាក់មកនោះ ពេលមកដល់ស្បូន វានឹងរលាយបាត់ដោយឯកឯង។
[embed-health-tool-ovulation]
