នេះជាមូលហេតុ និងវិធីព្យាបាលបញ្ហាញៀនរួមភេទ

“Hello គ្រូពេទ្យ’ ធ្លាប់ចេញផ្សាយអត្ថបទមួយពាក់ព័ន្ធបញ្ហាញៀនរួមភេទ ឲ្យគ្នាយើងបានដឹងរួចមកហើយ។ សម្រាប់ពេលនេះ យើងនឹងណែនាំពីមូលហេតុ និងវិធីដោះស្រាយបញ្ហាញៀនរួមភេទឲ្យបានដឹងវិញម្តង។

១- និយមន័យញៀនរួមភេទ

ញៀនរួមភេទ ជាវិបត្តិមួយនៅពេលមនុស្សម្នាក់មានអារម្មណ៍រួមភេទខ្លាំង ហើយរួមភេទញឹកញាប់ និងមិនអាចខ្វះបានទាល់តែសោះក្នុងជីវិតប្រចាំថ្ងៃ។ បញ្ហាញៀនរួមភេទ នាំឲ្យមានផលអវិជ្ជមានច្រើន ទៅលើជីវិតប្រចាំថ្ងៃ ទាំងផ្លូវចិត្ត និងផ្លូវកាយ ទាមទារការព្យាបាលត្រឹមត្រូវមួយ ដើម្បីធ្វើឲ្យជីវិតមានផាសុកភាពឡើងវិញ។

២- ញៀនរួមភេទជះឥទ្ធិពលអ្វីខ្លះដល់ជីវិតយើង?

ជាការពិត បញ្ហាញៀនរួមភេទ អាចនាំឲ្យមានផលអាក្រក់ដល់ជីវិតប្រចាំថ្ងៃ ដូចជា៖

– បាត់បង់ទំនាក់ទំនង ទាំងជាមួយខ្លួនយើងផ្ទាល់ មិត្តភក្តិ ក្រុមគ្រួសារ ក៏ដូចជាឃ្លាតឆ្ងាយពីសង្គម។

– ពិបាកផ្ចង់អារម្មណ៍ធ្វើការងារ ឬរៀន ដែលនាំឲ្យទទួលបានលទ្ធផលទាប។

– ងាយឆ្លងជំងឺកាមរោគ ដូចជា ជំងឺអេដស៍ មេរោគ HPV រើម ប្រមេះទឹកថ្លា (Clamydia) ដុះសាច់លើប្រដាប់ភេទ (Genital warts) ជាដើម។

– សុខភាពទ្រុឌទ្រោម

– អាចខូចមុខងារផ្លូវភេទ។

ញៀនរួមភេទ អាចបណ្ដាលមកពីបញ្ហាផ្លូវចិត្ត។ អ្នកមានបញ្ហានេះ អាចមានអារម្មណ៍មិននឹងន ខ្មាសអៀន មានទុក្ខព្រួយ។ ញៀនរួមភេទ ក៏អាចនាំឲ្យកើតជំងឺផ្លូវចិត្ត ដូចជា បាក់ទឹកចិត្ត ថប់បារម្ភ ប្រើថ្នាំញៀន និងស្រា មិនអាចគ្រប់គ្រងអារម្មណ៍បាន និងបញ្ហាផ្លូវចិត្តមិនប្រក្រតី អាចឈានទៅដល់រោគសញ្ញាផ្លូវចិត្តមិនអាចគ្រប់គ្រងបានទៀតផង (Obsessive-compulsive type symptoms) ។

៣- ធ្វើម៉េចទើបដឹងយើងមានបញ្ហាញៀនរួមភេទ?

វិធីល្អបំផុត គួរប្រឹក្សាជាមួយគ្រូពេទ្យជំនាញ។ យ៉ាងណា មុនទៅពេទ្យដើម្បីវាយតម្លៃយើងពិតជាមានបញ្ហានេះ ឬអត់ យើងអាចពិនិត្យមើលដោយខ្លួនឯងសិនថាតើមានសញ្ញាបញ្ហាញៀនរួមភេទ ឬយ៉ាងណា ខណៈរោគសញ្ញាបញ្ហាមានដូចជា៖

– មានអារម្មណ៍ខ្មាសអៀន សោកស្ដាយ ឬបន្ទោសខ្លួនឯង ចំពោះសកម្មភាពរួមភេទធ្លាប់បានធ្វើ។

– អារម្មណ៍រួមភេទ និងជម្រើសចង់រួមភេទ ធ្វើឲ្យជីវិតអ្នកមិនអាចគ្រប់គ្រង ឬបញ្ឈប់បាន។

– សន្យា និងព្យាយាមផ្លាស់ប្ដូរ តែធ្វើមិនបាន។

– ចូលចិត្តខ្លាំង ឬញៀនខ្លាំងជាមួយការរួមភេទ ប្រៀបស្មើរឿងសំខាន់ មិនអាចខ្វះបានក្នុងជីវិតប្រចាំថ្ងៃ។

– រួមភេទជាមួយដៃគូច្រើន និងញឹកញាប់ ច្រើនតែធ្លាក់ចូលក្នុងប្រភេទស្នេហាមួយរាត្រី។

– តែងចង់រកការរួមភេទដោយការទិញដូរ (ពេស្យាចារ)។

– ងាយរួមភេទគ្មានសុវត្ថិភាព។

– ចូលចិត្តមើលរឿងសិចក្នុងអ៊ីនធឺណេត។

ញៀនរួមភេទ Hello គ្រូពេទ្យ

អត្ថបទពាក់ព័ន្ធ៖

បើសង្ស័យថាខ្លួនកំពុងញៀនរួមភេទមិនដឹងខ្លួន ចម្លើយមានក្នុងអត្ថបទនេះ
រួមភេទញឹកញាប់ពេក ខ្លាំងៗពេក ប៉ះពាល់សុខភាពអត់?

៤- មូលហេតុនាំឲ្យញៀនរួមភេទ

រហូតមកដល់ពេលនេះ មិនទាន់មានចម្លើយតាមបែបវិទ្យាសាស្ត្រ បញ្ជាក់ពីមូលហេតុនាំឲ្យមានបញ្ហាញៀនរួមភេទនេះទេ។ បើតាមសារព័ត៌មានវេជ្ជសាស្ត្រ MEDICAL NEWS TODAY នៅអាមេរិក បញ្ហាញៀនរួមភេទ អាចបណ្ដាលមកពីផ្លាស់ប្ដូរសារធាតុគីមីនៅក្នុងខួរក្បាល។

៥- វិធីព្យាបាលបញ្ហាញៀនរួមភេទ

ការព្យាបាលបញ្ហានេះ ជាញឹកញាប់ផ្ដោតលើការគ្រប់គ្រងកត្តាដែលជំរុញឲ្យយើងមានអារម្មណ៍ចង់រួមភេទ។ គោលបំណងធំក្នុងការព្យាបាល គឺគ្រប់គ្រងកត្តាធ្លាប់នាំឲ្យយើងគិតតែចង់រួមភេទ ដើម្បីធ្វើឲ្យចំណង់ចង់រួមភេទ មិនដាក់សម្ពាធលើផ្លូវជីវិតយើងតទៅទៀត។

វិធីព្យាបាលដោយថ្នាំពេទ្យ ក៏ជាជម្រើសមួយទៀតដែរដើម្បីដោះស្រាយបញ្ហានេះ ដោយគ្រូពេទ្យអាចនឹងណែនាំមួយចំនួនខាងក្រោម៖

– ពពួកថ្នាំ Serotonergic (SSRI)៖ ថ្នាំនេះ ប្រើសម្រាប់ព្យាបាលជំងឺជាច្រើន ដូចជា ជំងឺបាក់ទឹកចិត្ត ថប់បារម្ភ និងធ្វើឲ្យមានស្ថិរភាពផ្លូវចិត្ត អាចជួយបន្ថយចំណង់ផ្លូវភេទ កុំឲ្យកើនឡើងខ្លាំងបាន។

– ថ្នាំ Naltrexon៖ ជាថ្នាំបន្សាបថ្នាំញៀន ឬថ្នាំមានជាតិអាភៀន អាចប្រើដើម្បីបន្ថយអារម្មណ៍ចង់រួមភេទបានដូចគ្នា។

– ថ្នាំទម្លាក់ចុះអ័រម៉ូនភេទបុរស (Anti-androgenic)៖ អាចប្រើដោះស្រាយបញ្ហាញៀនរួមភេទ ដូចជាថ្នាំ Medroxyprgesterone acetate។

មុនសម្រេចចិត្តដោះស្រាយបញ្ហាដោយប្រើថ្នាំ គប្បីត្រូវពិភាក្សាជាមួយអ្នកឯកទេស ឬគ្រូពេទ្យជំនាញជាមុនសិន ដើម្បីទទួលបានការណែនាំត្រឹមត្រូវ។

ក្នុងករណីមានសំណួរ ឬមន្ទិលសង្ស័យជុំវិញបញ្ហាសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Groupមិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូន៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ គឹម កាណែល · កែ 27/06/2019