ធ្លាប់ស្គាល់មេរោគ HPV អត់? ឈ្មោះពេញរបស់វា Human papillomavirus មេរោគនេះឧស្សាហ៍ឆ្លងណាស់ មិនរើសភេទ ឬអាយុទេ។ ស្រីៗភាគច្រើន ដឹងហើយ HPV គ្រោះថ្នាក់ខ្លាំងណាស់ ព្រោះអាចបង្កទៅជាបញ្ហាសុខភាពធ្ងន់ធ្ងរ មហារីកមាត់ស្បូន។ “Hello គ្រូពេទ្យ” ធ្លាប់លើកឡើងពាក់ព័ន្ធមេរោគនេះ ក៏ដូចជាវិធីបង្ការ ដោយចាក់វ៉ាក់សាំងការពារ ហើយគ្រប់គ្នាមិនមែនសុទ្ធតែអាចចាក់បានដែរ។ បើអ៊ីចឹង គួរប្រុងប្រយ័ត្ន ហើយត្រូវស្គាល់សញ្ញាឆ្លងមេរោគនេះជាមុន ទើបអាចការពារខ្លួន។
ដឹងមូលហេតុបង្ក និងរោគសញ្ញា ទើបអាចការពារខ្លួនពីមេរោគ HPV បាន
ត្រួតពិនិត្យដោយ គឹម កាណែល
១- ដឹងអ្វីខ្លះពីមេរោគ HPV ?
មេរោគ HPV (Human papillomavirus) ជាមេរោគមួយប្រភេទងាយបង្កជំងឺនៅតំបន់ជុំវិញ និងក្នុងប្រដាប់ភេទ។ HPV ច្រើនកើតឡើងនៅលើមនុស្សពេញវ័យទាំងពីរភេទ។ គេបានរកឃើញថា ពាក់កណ្ដាល ក្នុងចំណោមអ្នកធ្លាប់រួមភេទ មានឆ្លងមេរោគ HPV យ៉ាងហោចណាស់ម្ដងក្នុងមួយជីវិត។ ប៉ុន្តែរឿងដែលភ្ញាក់ផ្អើលនោះ មនុស្សភាគច្រើនមិនបានដឹងថា បានឆ្លងមេរោគមួយនេះឡើយ ដោយសារតែមេរោគ មិនងាយបង្ហាញរោគសញ្ញាឲ្យយើងដឹង។
ម្យ៉ាងដោយសារមេរោគ HPV មានច្រើនប្រភេទ រោគសញ្ញាក៏អាស្រ័យលើប្រភេទមេរោគនីមួយៗ។ គេរកឃើញមានមេរោគ HPV ជាង ១០០ប្រភេទ អាចបង្កឲ្យកើតជំងឺសិរមាន់ ទោះបីជាពេលខ្លះយើងមិនអាចមើលវាឃើញដោយប្រើភ្នែកទទេក្ដី។
មានមេរោគ HPV ប្រភេទខ្លះទៀត បង្កឲ្យកើតជា ជំងឺមហារីកមាត់ស្បូន ទាំងមិនមានបញ្ចេញរោគសញ្ញាអ្វីទាំងអស់ ខណៈមេរោគមួយចំនួនទៀត អាចបង្កជាជំងឺសិរមាន់លើស្បែកដៃ ឬជើង។
២- គ្រោះថ្នាក់បង្កដោយមេរោគ HPV
គ្នាយើងមួយចំនួនសំណាងល្អ ព្រោះពេលឆ្លងមេរោគ HPV នឹងជាទៅវិញដោយខ្លួន ដោយមិនចាំបាច់ព្យាបាលអ្វីទាំងអស់។ ប៉ុន្តែយើងត្រូវប្រុងប្រយ័ត្នជានិច្ច ព្រោះបើមានឆ្លងមេរោគ HPV ហើយមិនព្យាបាលត្រឹមត្រូវ អត្រាប្រឈមជំងឺកាចសាហាវមានកាន់តែខ្ពស់ ដូចជា ជំងឺមហារីកមាត់ស្បូន ឬមហារីករន្ធគូទជាដើម។
អត្ថបទពាក់ព័ន្ធ៖
- ខ្លាចមហារីកមាត់ស្បូនអត់? បើខ្លាចត្រូវស្វែងយល់អំពីវ៉ាក់សាំង HPV
- ដឹងពីប្រភេទវ៉ាក់សាំងមហារីកមាត់ស្បូនសិន ចាំសម្រេចចិត្តចាក់មួយណា
៣- រោគសញ្ញាឆ្លងមេរោគ HPV
មេរោគ HPV អាចមាននៅតាមស្រទាប់ទឹករងៃ ដូចជាតំបន់ប្រដាប់ភេទ ឬនៅលើស្បែកជាដើម។ ប្រសិនយើងសង្កេតឃើញមានសិរមាន់នៅលើប្រដាប់ភេទ មានន័យថា យើងឆ្លងមេរោគ HPV ហើយ។
សិរមាន់អាចកើតឡើងក្នុងទម្រង់ និងពណ៌ជាច្រើនខុសៗពីគ្នា អាចមានពណ៌ផ្កាឈូក ពណ៌ភ្លឺស្រស់ និងអាចមានទម្រង់រាប ឬពកឡើង។ ពេលខ្លះ អាចមានរាងស្រដៀងទៅនឹងផ្កាខាត់ណា ខណៈគ្នាយើងម្នាក់ឆ្លងមេរោគនេះ អាចកើតសិរមាន់តែមួយកន្លែង ឬកើតឡើងច្រើនកន្លែង។ ជំងឺសិរមាន់អាចកើតឡើងនៅតាមកន្លែងជាច្រើនមានដូចជា មាត់ស្បូន ក្រលៀន លិង្គ ពងស្វាស រន្ធគូទ ឬនៅលើភ្លៅជាដើម។
៤- មូលហេតុនាំឲ្យឆ្លងរោគ HPV
យើងមិនអាចដឹងខ្លួន កើតជំងឺសិរមាន់ចាប់តាំងពីពេលណាទេ ព្រោះអាចបង្ហាញខ្លួនឡើងបន្ទាប់ពីមួយសប្ដាហ៍ ឬមួយខែក្រោយ យើងរួមភេទជាមួយដៃគូមានផ្ទុកមេរោគ HPV។ ពេលខ្លះដៃគូយើង ក៏មិនបានដឹងថាខ្លួនមានមេរោគ HPV ដូចគ្នា។ ចាំបាច់បំផុត ត្រូវទៅពិនិត្យ និងពិគ្រោះជាមួយគ្រូពេទ្យឲ្យបានទៀងទាត់ ដើម្បីដឹងថាខ្លួនអ្នកបញ្ហាអ្វីកើតឡើង។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
គឹម កាណែល
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម