ក្រៅកត្តាអាយុកាន់តែចាស់ទៅ នៅមានបញ្ហាប្រឈមជាច្រើនទៀតដែលធ្វើឲ្យភ្នែកយើងចុះខ្សោយទៅ ឬអាចមើលលែងឃើញតែម្តង។ បើតាមអង្គការសុខភាពពិភពលោក (WHO) បញ្ហា ឬជំងឺភ្នែកដែលបានរៀបរាប់ខាងក្រោមនេះ ធ្វើឲ្យភ្នែកយើងមើលលែងសូវឃើញ។

១- ឡើងបាយភ្នែក៖ ជាជំងឺដែលកើតនៅលើកែវភ្នែក ស្ថិតនៅក្រោយកូនក្រមុំ ដោយកែវភ្នែកដែលមានភាពថ្លាច្បាស់ បែរជាស្រអាប់ ឬឡើងពណ៌ស បណ្តាលឲ្យពន្លឺ និងរូបភាពមិនអាចឆ្លងកាត់ទៅចំកន្លែងចាប់រូបភាពនៅបាតភ្នែកបាន ធ្វើឲ្យមើលមិនច្បាស់។

២- ទឹកដក់ក្នុងភ្នែក៖ កើតឡើងពេលសម្ពាធទឹកកើនឡើងនៅក្នុងភ្នែក ហើយទឹកនោះហូរចេញមកក្រៅមិនបាន ធ្វើឲ្យសរសៃឈាម និងសរសៃប្រសាទភ្នែកខូច អាចឈានទៅពិការភ្នែក។

៣- ដុះកន្ទុយថ្លែន៖ ដុះកន្ទុយថ្លែន ជាប្រភេទជំងឺដែលកើតមាននៅលើភ្នាសសនៃភ្នែក ដោយមានការដុះឡើងនូវភ្នាសពណ៌ស រាងដូចស្លាបសត្វ ឬត្រីកោណ និងមានសរសៃឈាមដុះមកជាមួយ។ ភ្នាសកន្ទុយថ្លែនអាចលូតលាស់ពីតូចស្តើង ទៅធំក្រាស់ ដុះគ្របលើកញ្ចក់ភ្នែក ដោយចាប់ផ្តើមលូនបន្តិចម្តងៗ ពីគែមនៃកញ្ចក់ភ្នែកទៅផ្នែកកណ្តាលកញ្ចក់ភ្នែក រហូតដល់បាំងកូនក្រមុំ។

អត្ថបទពាក់ព័ន្ធ៖ លម្អិតពីជំងឺដុះកន្ទុយថ្លែន និងវិធីការពារ

៤- ប្រែងចាក់ភ្នែក៖ ត្រាក់ក្រូមជាប្រភេទជំងឺរលាកភ្នាសត្របកភ្នែកអាចបណ្តាលឱ្យមានប្រែងដុះចាក់កញ្ចក់ភ្នែកធ្វើឱ្យរមាស់ ឱ្យភ្នែកពព្រៀក ឬហៅថាភ្នែកដុះប្រែងចាក់ភ្នែក។

៥- មានជំងឺទឹកនោមផ្អែម៖ កម្រិតជាតិស្ករជាតិក្នុងឈាមខ្ពស់ អាចនាំឲ្យភ្នែកមានបញ្ហា ដូចជា ស្រវាំងភ្នែក ជំងឺសរសៃឈាមបាតភ្នែក ទឹកដក់ក្នុងភ្នែក ឬភ្នែកឡើងបាយ។

អត្ថបទពាក់ព័ន្ធ៖ ប្រយ័ត្នខ្វាក់ដោយមិនដឹងខ្លួន បើអត់ខ្វល់រឿងជាតិស្ករ

៥- កំហុសកំណុំ៖ មានន័យថាភ្នែកស្រលៀង ឬកែក ដែលជំងឺភ្នែកស្រលៀងកើតឡើងដោយសារសាច់ដុំភ្នែកមិនប្រក្រតី ទៅជាទាញគ្រាប់ផ្នែកម្ខាងឲ្យចូល ឬចេញខុសទិស ពេលសម្លឹងម្តងៗភ្នែកមិនអាចសម្លឹងមកត្រង់បានទេ ពេលខ្លះមើលឃើញរូបភាពមិនច្បាស់នោះទេ បែកជា២។

អត្ថបទពាក់ព័ន្ធ៖ ភ្នែកស្រលៀង ឬកែក មកអី ហើយព្យាបាលកើតអត់?

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

មានបញ្ហាទាំងនេះ ទើបភ្នែកមើលលែងសូវឃើញដូចមុន