តើអ្នកទាំងអស់គ្នាធ្លាប់ញ៉ាំ ឬខ្ពុរទឹកត្រជាក់ហើយមានអារម្មណ៍ថាឈឺធ្មេញដែរទេ? ឬធ្មេញយើងមិនអាចទ្រាំនឹងខ្យល់ត្រជាក់បាន? ពេលខ្លះសូម្បីតែទឹកតែក្ដៅឧណ្ហៗមួយពែងក៏ធ្វើឲ្យយើងពិបាកលេបដោយសារឈឺធ្មេញនៅពេលផឹកបានតែបន្តិច។ ប្រសិនបើយើងជួបបញ្ហាណាមួយដូចខាងលើនេះ យើងប្រាកដជាមានបញ្ហាស្រៀវធ្មេញជាមិនខាន។
១. ហេតុអ្វីយើងមានបញ្ហាស្រៀវធ្មេញ
មានមូលហេតុជាច្រើនធ្វើឲ្យយើងរងគ្រោះដោយសារការឈឺចាប់នេះ។ ដំបូងឡើយធ្មេញមួយឬច្រើនអាចមើលឃើញដល់ឬសធ្មេញ។ ជាធម្មតាស្រទាប់នេះ គឺជាភ្លុកធ្មេញដែលនៅក្រោមជាលិកាអញ្ចាញធ្មេញ និងសម្បូរទៅដោយបំពង់តូចៗ មើលឃើញដោយមីក្រូទស្សន៍។ រាល់បំពង់នីមួយៗ គឺភ្ជាប់ទៅនឹងចុងសរសៃប្រសាទ។ បញ្ហាពីរ ជាទូទៅឧស្សាហ៍កើតឡើងក្នុងមាត់ធ្មេញគឺការស្រកអញ្ចាញធ្មេញ ឬសឹកស្រទាប់ការពារធ្មេញ ដែលជាមូលហេតុចម្បងព្រោះដោយសារបំពង់តូចៗត្រូវបានចំហរ។ ជាក់ស្ដែងស្រទាប់ភ្លុកធ្មេញត្រូវបានចំហរមិនបានការពារ ដោយសារការស្រកអញ្ចាញធ្មេញ ដុសសម្អាតធ្មេញខ្លាំងពេក ការសង្កៀតធ្មេញ និងរបបអាហារដែលសម្បូរជាតិអាស៊ីដ។
២. ការដុសសម្អាតធ្មេញខ្លាំងជ្រុល
វាពិតជាគួរឲ្យភ្ញាក់ផ្អើលដែលការដុសសម្អាតធ្មេញខ្លាំងជ្រុលអាចបង្កឲ្យមានបញ្ហាធ្ងន់ធ្ងរទៅលើមនុស្សមួយចំនួន។ លោក MarkS.Wolff ដែលមានងារជា សាស្រ្តាចារ្យ និងជាប្រធានគ្រប់គ្រងដេប៉ាតឺម៉ង់ Cariologyនិង Comprehensive Care នៃសកលវិទ្យាល័យ NYU ផ្នែកទន្តសាស្ត្របានបង្ហាញថា៖ «ការសឹករិចរឹលខ្លាំងនៃជាលិកាអញ្ចាញធ្មេញព្រមទាំងស្រទាប់ការពារធ្មេញធ្វើឲ្យស្រទាប់បំពង់ភ្លុកធ្មេញតូចៗងាយរងផលប៉ះពាល់ទៅនឹងអ្វីដែលវាប៉ះជាមួយ រួមមានធាតុក្ដៅ ត្រជាក់ ទន់ឬរឹង»។
៣. ភេសជ្ជៈដែលមានជាតិអាស៊ីដ
ភេសជ្ជៈដែលយើងឧស្សាហ៍ផឹកក៏អាចធ្វើឲ្យខូចធ្មេញបានផងដែរ។ ជាធម្មតា ភេសជ្ជៈដែលមានជាតិអាស៊ីដខ្ពស់ដូចជាទឹកសូដាភេសជ្ជៈកីឡា គ្រឿងស្រវឹង ទឹកក្រូច កាហ្វេ ភេសជ្ជៈសុខភាព សុទ្ធតែអាចកម្ទេចស្រទាប់ការពារធ្មេញ និងធ្វើឲ្យឈឺចាប់។
៤. សារធាតុធ្វើធ្មេញឲ្យស
សារធាតុធ្វើឲ្យធ្មេញសដែលមានផ្ទុកធាតុផ្សំដែលអាក្រក់សម្រាប់កម្ចាត់ស្នឹមកំប៉ុង ហេតុនេះនៅពេលដែលប្រើប្រាស់វាច្រើននឹងប៉ះពាល់ដល់ស្រទាប់ភ្លុកធ្មេញ។ ជាអកុសលស្រទាប់ការពារធ្មេញ(កាចាធ្មេញ)ក៏អាចត្រូវបានកម្ទេចចេញដែរធ្វើឲ្យបំពង់តូចៗចំហរមិនបានការពារ។
យើងគួរតែទៅជួបពិគ្រោះជាមួយគ្រូពេទ្យធ្មេញប្រសិនបើភាពស្រៀវធ្ងន់ធ្ងរ។ គ្រូពេទ្យនឹងផ្ដល់ដំបូន្មានក្នុងការដោះស្រាយត្រង់តំបន់ដែលស្រៀវ ឬលាបថ្នាំលើធ្មេញ តែវាមិនបានយូរអង្វែងនោះទេ។
[embed-health-tool-vaccination-tool]
