ទ្វារមាសត្រូវការការថែទាំជាពិសេសដែលអាចផ្ទុយស្រឡះពីការថែទាំស្បែកនៅតំបន់ផ្សេងៗនៃរាងកាយដែលស្រ្តីយើងភាគច្រើនធ្វើការថែទាំខុស ហើយបង្កឱ្យមានការឆ្លងមេរោគ ឬអាចបង្កឱ្យកើតរោគស្រ្តី។ ដូច្នេះទើបស្រ្តីយើងមានចម្ងល់ជាច្រើនទាក់ទងនឹងការថែទំាំទ្វារមាស។ តើសំណួរទាក់ទងនឹងការថែរក្សាសុខភាពទ្វារមាសអ្វីខ្លះដែលស្រ្តីយើងចង់ដឹងច្រើនជាងគេ?
៥ សំណួរ ទាក់ទងនឹងការថែទាំសុខភាពទ្វារមាស ស្រីៗគួរដឹង!
ត្រួតពិនិត្យដោយ គ្រូពេទ្យឯកទេស. សាស្ត្រាចារ្យវេជ្ជបណ្ឌិត គាន់ អូន · សម្ភពនិងរោគស្រ្តី · មន្ទីរពេទ្យកាល់ម៉ែត
ភាគច្រើនស្រ្តីយើងចង់ដឹងពីវិធីសាស្រ្តក្នុងការថែទាំសុខភាពទ្វារមាសដូចខាងក្រោម៖
១. យើងគួរសម្អាតទ្វារមាសដោយរបៀបណា?
សាស្ត្រាចារ្យវេជ្ជបណ្ឌិត គាន់ អូន ឯកទេសសម្ភព និងរោគស្ត្រី និងជាប្រធានមន្ទីរពហុព្យាបាល និងសម្ភពត្បូងពេជ្របានលើកឡើងថា ជាទូទៅយើងអាចលាងសម្អាតទ្វារមាសដោយប្រើទឹកស្អាត ហើយគួរចៀសវាងលាងសម្អាតជាមួយសាប៊ូ និងធ្វើការបាញ់លាងទ្វារមាសខ្លាំងៗ ជាពិសេសផ្នែកខាងក្នុងទ្វារមាស (ចាប់ពីសន្ទះព្រហ្មចារីទៅក្នុង) ព្រោះអាចធ្វើឱ្យទ្វារមាសបាត់បង់បាតេរីល្អៗដែលជួយការពារភ្នាសកោសិការទ្វារមាសឱ្យមានការរីកលូតលាស់ និងការពារទ្វារមាសពីការបង្ករោគនានា។
២. យើងគួរកោររោមទ្វារមាសដែរឬទេ?
ទាក់ទងនឹងសំណួរនេះ លោកវេជ្ជបណ្ឌិតបានបកស្រាយថា យើងមិនគួរកោររោមប្រដាប់ភេទទេ ព្រោះរោមទ្វារមាសមាននាទីការពារទ្វារមាសពីការឆ្លងមេរោគផ្សេងៗ ជាពិសេសមេរោគកាមរោគ ឬ HPV ដែលឆ្លងតាមរយៈការប៉ះពាល់ប្រដាប់ភេទផ្ទាល់ ឬរួមភេទ។
ឧទារហណ៍ ជំងឺសិរមាន់ ប្រមេះ ស្វាយជាដើម បើទ្វារមាសមានរោមការពារ ក្រោយពីការប៉ះពាល់ផ្ទាល់ជាមួយមេរោគទំាងនេះក្នុងអំឡុងពេលរួមភេទ មេរោគដែលជាប់តោងនឹងរោមអាចត្រូវបានលាងសម្អាតចេញ ហើយមិនបង្កឱ្យឆ្លងដល់ទ្វារមាសខាងក្នុងទេក្នុងករណីយើងប្រើស្រោយអនាម័យពេលរួមភេទ។
តែបើយើងកោររោមនៅប្រដាប់ភេទចេញអស់ មេរោគទាំងនោះអាចប៉ះពាល់ផ្ទាល់ទៅលើស្បែកទ្វារមាស ហើយឆ្លងតាមរន្ធរោមចូលក្នុងខ្លួនយើង រួចសង្ងំនៅក្នុងនោះ ពេលភ្លាមៗមេរោគទាំងនេះមិនមានការបង្ករោគទេ តែបើពេលសរីរាង្គយើងចុះខ្សោយ មេរោគនឹងបង្កចេញជារោគសញ្ញា។
៣. បន្ទាប់ពីរួមភេទរួច យើងគួរថែរក្សាទ្វារមាសដោយរបៀបណា?
ក្រោយពេលរួមភេទរួច យើងគួរបត់ជើងតូចដើម្បីបញ្ចេញ ឬសម្អាតមេរោគទាំងឡាយដែលចូលទៅក្នុងបង្ហួរនោមក្នុងអំឡុងពេលរួមភេទ។ បន្ទាប់មក យើងអាចលាងសម្អាតទ្វារមាសជាមួយទឹកធម្មតា ហើយចៀសវាងលាងសម្អាតជាមួយសាប៊ូ។
ចង់គណនារង្វាស់ចង្វាក់បេះដូង ចុចទីនេះ!
ចងពិនិត្យជំងឺសរសៃឈាមបេះដូង ចុចទីនេះ!
៤. ពេលចូលបន្ទប់ទឹក យើងគួរជូតសម្អាតទ្វារមាសរបៀបម៉េច?
ពេលជូតសម្អាតទ្វារមាស ឬពេលជូតទ្វារមាសឱ្យស្ងួត យើងគួរជូតពីមុខទៅក្រោយ ចៀសវាងចម្លងមេរោគពីរន្ធគូទចូលទ្វារមាស រួចចូលទៅប្រព័ន្ធផ្លូវទឹកនោម ហើយអាចបង្ករោគនៅប្លោកនោម និងតម្រងនោម។
៥. យើងគួស្លៀកខោបែបណាទើបល្អចំពោះទ្វារមាស?
ការស្លៀកខោ ឬខោក្នុងដែលចង្អៀត ឬតឹងក៏អាចធ្វើឱ្យទ្វារមាសយើងឈឺ ឬរមាស់ដែរ ដូច្នេះយើងគួរស្លៀកខោ ឬខោក្នុងដែលរលុងបន្តិច កុំឱ្យតឹង ឬចង្អៀតដែលធ្វើឱ្យទ្វារមាសហប់ ឬកកិត។ លើសពីនេះទៅទៀត យើងគួរដូរខោក្នុងជារៀងរាល់ថ្ងៃដើម្បីចៀសវាងការឆ្លងមេរោគ ហើយបើអាចនៅពេលយប់ យើងមិនគួរស្លៀកខោក្នុងទេដើម្បីឱ្យមានខ្យល់ចេញចូលខ្លះ។
តាមពិតទៅការថែទាំទ្វារមាសគឺសាមញ្ញណាស់ ហើយយើងមិនចាំបាច់ទិញសាប៊ូ ឬទឹកអនាម័យថ្លៃៗមកសម្អាតទ្វារមាសទេ។ ផ្ទុយមកវិញ ការប្រើផលិតផលទាំងនេះអាចធ្វើឱ្យប៉ះពាល់ដល់សុខភាពទ្វារមាសទៅវិញ។
អត្ថបទគួរអាន៖
- ក្រោយសម្រាលកូនដោយធម្មជាតិ ទ្វារមាសស្រ្តីអាចវិលមករកសភាពដើមវិញអត់?
- ធ្វើរឿងទាំងនេះដោយមិនប្រើទឹកអនាម័យ ទ្វារមាសនឹងមានក្លិនធម្មជាតិ
- គួរប្រយ័ត្ន! បើទ្វារមាសឆ្លងមេរោគផ្សិតស្រីៗអាចប្រឈមជំងឺមហារីកមាត់ស្បូន
- ស្រីៗគួរដឹង នេះជាមូលហេតុនិងរោគសញ្ញារលាកទ្វារមាសដោយបាក់តេរី
- ស្រីៗសម្អាតកន្លែងសម្ងាត់ជារឿងសំខាន់ តែបើសម្អាតដោយវិធីនេះនឹងគ្រោះធំមិនខាន
- ហេតុអ្វីស្ត្រីមានដុំពកក្នុងទ្វារមាសក្រោយសម្រាល? គ្រោះថ្នាក់ឬអត់?
ចំណុចសំខាន់
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ គ្រូពេទ្យឯកទេស.
សាស្ត្រាចារ្យវេជ្ជបណ្ឌិត គាន់ អូន
សម្ភពនិងរោគស្រ្តី · មន្ទីរពេទ្យកាល់ម៉ែត
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម