សក់ និងសុខភាពស្បែកក្បាល កុំថាស្រី កុំថាប្រុស សុទ្ធតែចង់បានដូចគ្នា ប៉ុន្តែស្រីៗប្រហែលខ្វាយខ្វល់ជាង។ គ្នាយើងខ្លះចំណាយប្រាក់យ៉ាងច្រើន ដោយគ្រាន់តែចង់បានសក់វែង ស្អាត មើលទៅទាក់ទាញ តែពេលខ្លះបែរធ្វើឲ្យខូចសក់លើសដើម។ បើអ៊ីចឹង សាកតិចនិកងាយៗ ណែនាំដោយអ្នកឯកទេសស្បែកក្បាលនៅអាមេរិក លោកស្រី Francesca Fusco ប្រហែលអាចជួយបាន។
១- ញ៉ាំអាហារបំប៉នអាចជួយសក់លូតលាស់ល្អជាងមុន
លេបថ្នាំបំប៉នជាមួយបរិមាណវីតាមីនត្រឹមត្រូវ អាចជួយយើងទទួលបាននូវប្រវែងសក់អតិបរមា។ ស្វែងរករូបមន្តសម្រាប់ សក់ ស្បែក និងក្រចក ពីអាហារបំប៉ន ឬអាហារណាមានផ្ទុកនូវសារធាតុ ប៊ីយូទីន (វីតាមីន B7) ជាតិស៊ីលីកា (silica) វិតាមីន B វីតាមីន C វីតាមីន E និងជាតិដែក ក៏ដូចជាអាស៊ីដខ្លាញ់ អូមេហ្គា ៣ ជាដើម។
២- បញ្ហាអ័រម៉ូនអាចធ្វើឲ្យសក់ស្តើង
កម្រិតអ័រម៉ូនតេស្តូស្តេរ៉ូនរបស់មនុស្សស្រី ពិតណាស់អាចធ្វើឲ្យសក់ស្តើង ក្នុងនោះរាប់ទាំង វិធីពន្យារកំណើត ក៏ធ្វើឲ្យជ្រុះសក់ផងដែរ។ បើឃើញថា សក់ចាប់ផ្តើមស្តើងគ្មានទម្ងន់ មានន័យថា ដល់ពេលគួរតែណាត់ជួបជាមួយពេទ្យហើយ ដើម្បីពិនិត្យក្រពេញទីរ៉ូអ៊ីត ព្រោះអាចជាមូលហេតុនាំឲ្យជ្រុះសក់។
៣- សក់នឹងទទួលឥទ្ធិពលដោយផ្ទាល់ពីអាហារយើងញ៉ាំ
បើស្បែកក្បាលស្ងួត ព្យាយាមបន្ថែមអាស៊ីដខ្លាញ់អូម៉េហ្កា ៣ និងខ្លាញ់ត្រីក្នុងរបបអាហារភ្លាម ហើយការញ៉ាំសាច់សត្វ ត្រូវប្រាកដថា របបអាហារនោះ គឺមានបរិមាណប្រូតេអ៊ីន និងជាតិដែកគ្រប់គ្រាន់សម្រាប់សុខភាពសក់។
៤- ប្រើប្រាស់ថ្នាំជំនួយសក់មុនពេលមករដូវ
កំណត់ពេលធ្វើសក់ សម្រួលសរសៃសក់ និងលាបពណ៌ក្នុងសប្តាហ៍មិនទាន់មករដូវ។ មុនពេលទៅកន្លែងធ្វើសក់ លោកស្រី Fusco ណែនាំឲ្យប្រើថ្នាំជួយឲ្យស្បែកក្បាលរលោង ២៤ម៉ោង ជាមុនសិន ដើម្បីរក្សា pH រួចជាស្រេច។ គ្នាយើងអាចញ៉ាំថ្នាំប្រឆាំងការរលាក ១ម៉ោង មុននឹងធ្វើសក់ ប្តូរពណ៌សក់។
៥- រមាស់ពេលលាបពណ៌ជាសញ្ញាមានបញ្ហាសក់
គ្នាយើងខ្លះ មានបញ្ហាស្បែកក្បាលដោយមិនដឹងថាមកបញ្ហាអ្វី។ លោកស្រី Fusco បានចែករំលែកបទពិសោធ ពេលស្រីប្តូរពណ៌សក់ មានអារម្មណ៍ឈឺថើៗ នោះអាចបណ្តាលមកពីស្បែកក្បាលស្ងួត។ លើសពីនេះ ករណីនេះអាចនឹងធ្វើឲ្យមានបញ្ហាអាក្រក់ទៅៗ បង្កជាអង្គែ រលាកឫសសក់ និងប្រហែលជាបាត់បង់ ឬជ្រុះសក់ទៀតផង។
អត្ថបទពាក់ព័ន្ធ៖
- ជ្រុះសក់ ប្រើអីក៏មិនត្រូវ អាចសាកល្បងវិធីសាស្ត្រនេះ
- ផ្លែឈើ ៥មុខ ជួយបង្ការមិនឲ្យជ្រុះសក់
៦- ស្បែកក្បាលត្រូវការកម្ចាត់កោសិកាងាប់ៗចេញ
ករណីនេះ ដូចជាការរបកស្បែកចាស់នៅលើមុខដែរ ស្បែកក្បាលអាចនឹងទទួលបានអត្ថប្រយោជន៍ពីការដុសខាត់។ លោកស្រី Fusco ណែនាំថា បន្ថែមស្ករ ២-៣ ស្លាបព្រាទៅក្នុងសាប៊ូកក់សក់ ដើម្បីជួយកម្ចាត់ស្បែកងាប់ៗទាំងនោះចេញ។ ប្រើម្រាមដៃអេះកក់ឲ្យសព្វ និងចៀសវៀងប្រើក្រចកពេលខាត់ តែពេលខ្លះបច្ចេកទេសនេះ ក៏នៅតែភ្លាត់ម្តងម្កាលធ្វើឲ្យយើងឈឺដូចគ្នា។ ដើម្បី ទទួលបានលទ្ធផលល្អ គួរតែព្យាយាមប្រើសាប៊ូអាស៊ីដស៊ីលីស៊ីលីក (Salicylic) ម្តងក្នុងមួយសប្តាហ៍។
៧- ប្រើថ្នាំជួយឲ្យរលោង
តាមរយៈលោកស្រី Fusco ដដែល ស្រីៗជាច្រើន គ្មានភ័យខ្លាចរឿងស្ទះរន្ធញើស ឬ ធ្ងន់សក់ឡើយ។ ប៉ុន្តែ ដូចជាស្បែកតំបន់ដទៃទៀត ដែលសុទ្ធតែត្រូវការសំណើម ស្បែកក្បាលនឹងទទួលបានអត្ថប្រយោជន៍ពីសារជាតិទឹកដូចគ្នា។ រឿងមួយ គ្នាយើងត្រូវចាំទុក ថ្នាំធ្វើឲ្យសក់រលោងនេះ គឺមិនប៉ះពាល់ស្បែកក្បាលទេ ហេតុនេះអាចលាបពីឫសសក់ ដល់ចុងសក់បាន។ លោកស្រី Fusco ក៏ណែនាំដែរថា សូមបន្ថែមជាតិប្រេងចូលទៅក្នុងក្រែមបន្ទន់សក់នេះ ដើម្បីធ្វើសក់មានសំណើម។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
