ជារឿយៗ ក្មេងអាយុចន្លោះពី ១-៥ឆ្នាំ ចូលចិត្តយករបស់របរផ្សេងៗដាក់ចូលក្នុងមាត់ បៀមលេង។ ឲ្យតែឆ្ងល់ពីវត្ថុនោះ អាអូនតែងតែយកដាក់ចូលក្នុងមាត់ មិនស្គាល់តូច ឬធំឡើយ។ ជួនកាល បើអាអូនលេបរបស់តូចៗចូល អាចបណ្ដាលឲ្យអាអូនស្លាក់ចូលបំពង់ខ្យល់ បង្កជាគ្រោះថ្នាក់ដល់កូនបាន។
ការឈ្លក់ ឬស្លាក់វត្ថុតូចៗ ចំពោះក្មេងៗគឺជាការប្រឈមគ្រោះថ្នាក់ខ្ពស់។ ជួនកាលម៉ាក់ប៉ាខំប្រយ័ត្នគ្រប់ពេល តែគ្រាន់ងាកចេញបន្តិច អាអូនក៏អាចឈ្លក់បានដែរ។ មិនថាតែរបស់លេងទេ សូម្បីតែគ្រាប់សណ្ដែកដី និងគ្រាប់ធញ្ញជាតិដទៃទៀតមានទំហំប៉ុនផ្លូវដង្ហើម (ទងសួត) របស់ក្មេងអាយុចន្លោះពី៤-៥ឆ្នាំ។ នេះបើតាមការឲ្យដឹងពីលោកវេជ្ជបណ្ឌិត ច័ន្ទ រស្មី។
លោកបន្តថា ហានិភ័យនៃការស្លាប់ដោយសារការថប់ដង្ហើមខ្ពស់ណាស់ ប៉ុន្តែយើងអាចចៀសវាងបាន ដោយមិនផ្ដល់ឲ្យកុមារតូចៗ ជាពិសេសកុមារមិនទាន់ចេះទំពាដូចជា ផ្លែឈើមានសំបក ឬគ្រាប់ គ្រាប់ធញ្ញជាតិ ស្ករគ្រាប់ វត្ថុលេងតូចៗ ដែលក្មេងអាចបៀមក្នុងមាត់បាន និងត្រូវសង្កេតមើល ប្រសិនបើឃើញក្មេងយករបស់អ្វីបៀមចូលមាត់ ត្រូវយកចេញភ្លាម។ នេះជាវិធានការល្អបំផុតក្នុងការការពារបញ្ហាស្លាក់ ឬឈ្លក់ផ្លូវដង្ហើមទៅលើក្មេង។
មួយវិញទៀត បើយើងឃើញមានក្មេងឈ្លក់ ឬស្លាក់អាហារ ឬវត្ថុអ្វីនោះ អាចប្រើតិចនិកខាងក្រោមនេះ ដើម្បីសង្គ្រោះអាអូនបានដោយ៖
១. បើយើងអាចមើលឃើញវត្ថុក្មេងឈ្លក់ ព្យាយាមយកវាចេញ (ចៀសវាងបុកវត្ថុនោះចូលកាន់តែជ្រៅនៃបំពង់ខ្យល់ក្មេង)
២. បើអាអូនក្អកខ្លាំង លើកទឹកចិត្តឲ្យក្មេងក្អកឲ្យខ្លាំងៗ ដើម្បីឲ្យវត្ថុឈ្លក់នោះចេញមកក្រៅ
៣. បើក្មេងពិបាកក្អក (នៅស្ងៀម) ឬពិបាកដកដង្ហើម ស្រែករកជំនួយឲ្យបានលឿន ឬគួរយកកូនទៅមន្ទីរពេទ្យក្បែរបំផុត។ល។
[embed-health-tool-vaccination-tool]
