៤ យ៉ាង ម៉ាក់ប៉ាគួរដឹង មុននាំកូនទៅពេទ្យអំឡុងផ្ទុះកូវីដ ១៩

យើងដឹងស្រាប់ហើយថា ចង់ទៅណាមកណាអំឡូងពេលផ្ទូះ COVID-19 ពិបាកបន្តិច ដោយសារហានិភ័យក្នុងការឆ្លង។ បើតាមការណែនាំពីក្រសួងសុខាភិបាល បើពុំចាំបាច់ កុំចេញពីផ្ទះឲ្យសោះ តែចៃដន្យ បើកូនយើងឈឺ មានអាការៈមិនស្រួល ចង់នាំកូនទៅពេទ្យ យើងគួរធ្វើម៉េចល្អ? ខាងក្រោមនេះ ជាអ្វីដែលម៉ាក់ប៉ាគួរដឹង ដើម្បីត្រៀមខ្លួន មុនចង់យកអាអូនទៅពិនិត្យនៅពេទ្យ៖

១. សួរមន្ទីរពេទ្យពីការប្រុងប្រយ័ត្នសុវត្ថិភាព

មន្ទីរពេទ្យ ក៏ដូចជាការិយាល័យគ្រូពេទ្យ ច្បាស់ជាយកចិត្តទុកដាក់ខ្ពស់ចំពោះសុវត្ថិភាពសុខភាពរបស់អ្នកជំងឺនីមួយៗហើយ។ ប៉ុន្តែ បើយើងមានចម្ងល់ពាក់ព័ន្ធនឹងវិធានការការពាររបស់ខាងមន្ទីរពេទ្យ ឬគ្លីនិក យើងគួរតែខលទៅសួរព័ត៌មានជាមុន។ វិធានការការពាររបស់មន្ទីរពេទ្យភាគច្រើនមានដូចជា៖

គ្រប់បុគ្គលិកត្រូវពាក់ឯកសណ្ឋានការពារត្រឹមត្រូវ
តម្រូវឲ្យអ្នកជំងឺ និងអ្នកកំដរពាក់ម៉ាសក្នុងទីធ្លាមន្ទីរពេទ្យ
កំណត់ចំនួនអ្នកជំងឺដែលត្រូវពិនិត្យក្នុងមួយថ្ងៃ។ល។

២. ជួបជាមួយគ្រូពេទ្យតាមទូរស័ព្ទ បើអាច

នៅតាមមន្ទីរពេទ្យច្បាស់ជាមានវិធានការការពារសុវត្ថិភាពសុខភាពរបស់មនុស្សគ្រប់រូបដែលចេញចូលមន្ទីរពេទ្យហើយ។ ប៉ុន្តែ យើងអាចសាកសួរមន្ទីរពេទ្យ ឬគ្លីនិក ថាតើមានផ្ដល់សេវាពិនិត្យមើលស្ថានភាពសុខភាពតាមរយៈអនឡាញដែរ ឬអត់? ចំពោះជំងឺទូទៅមួយចំនួន អាចពិនិត្យមើលតាមរយៈអនឡាញបានដូចជា អាលែកហ្ស៊ី ផ្ដាសាយធម្មតា កន្ទួល រមាស់ ឬឆ្លងមេរោគលើស្បែក។ល។

៣. ពាក់ម៉ាស់ និងលាងដៃ

មធ្យោបាយមួយចំនួនដែលមានប្រសិទ្ធភាពក្នុងការការពារឆ្លងវីរុស COVID-19 ក៏សាមញ្ញបំផុតដែរ នោះគឺការពាក់ម៉ាស់ និងការលាងដៃជាមួយសាប៊ូ ទឹកស្អាត ឬប្រើអាល់កុល ឬជែលលាងដៃ។ ម៉ាក់ប៉ាត្រូវប្រាកដថា កូនៗរបស់យើង (អាយុ២ឆ្នាំឡើងទៅ) ពាក់ម៉ាស់ពេលទៅជួបគ្រូពេទ្យ និងលាងដៃបានញឹកញាប់។

៤. រៀបចំខ្លួនសម្រាប់ការជួបពេទ្យ

មិនថាយើងណាត់ជួបពេទ្យដោយផ្ទាល់ ឬតាមរយៈអនឡាញទេ យើងគួរតែត្រៀមសំណួរ ឬកត់ទុកបញ្ហាដែលធ្វើឲ្យយើងបារម្ភជាមុន ដើម្បីបង្ការ ការភ្លេចរាល់ចម្ងល់ ឬសំណួរសំខាន់អ្វីមួយទាក់ទងនឹងជំងឺ និងការថែទាំអាអូន។

Covid-19